មេបញ្ជាការកងទ័ពអង់គ្លេសទាត់ចោលពាក្យចចាមអារ៉ាមស្តីពីសុខភាពរបស់លោកពូទីន
ពាក្យចចាមអារ៉ាមដែលថា លោកប្រធានាធិបតីរុស្ស៊ី ពូទីនមានជំងឺប្រចាំកាយ ឬថា លោកពូទីនអាចនឹងត្រូវគេលបធ្វើឃាតសម្លាប់។ ទាំងនោះគឺគ្រាន់តែជាការគិតស្រមើស្រមៃតែប៉ុណ្ណោះ។ នេះបើតាមការអះអាងរបស់ប្រធានសេនាធិការកងទ័ពអង់គ្លេស លោកTony Radakin នៅក្នុងបទសម្ភាសន៍ជាមួយទូរទស្សន៍អង់គ្លេស BBC កាលពីថ្ងៃអាទិត្យម្សិលមិញ។ តាមមេបញ្ជាការកងទ័ពអង់គ្លេស កងទ័ពអ៊ុយក្រែនជឿជាក់យ៉ាងខ្លាំងថា នឹងអាចប្រយុទ្ធយកឈ្នះសង្រ្គាមឈ្លានពាន ដែលរុស្ស៊ីបានចាប់ផ្តើមជាង៥ខែមកហើយ នៅទឹកដីអ៊ុយក្រែន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៧
តាមការវាយតម្លៃរបស់កងទ័ពអង់គ្លេស នៅក្នុងសង្រ្គាមឈ្លានពានអ៊ុយក្រែនជាង៥ខែមកនេះ រុស្ស៊ីបានបាត់បង់កម្លាំងប្រយុទ្ធរបស់ខ្លួនប្រមាណ ៣០% នៅក្នុងសមរភូមិជើងគោក។ មានន័យថា កងទ័ពរុស្ស៊ីប្រមាណ ៥ម៉ឺននាក់បានស្លាប់ ឬរងរបួស ចំណែក រថក្រោះ ១៧០០គ្រឿង និងរថពាសដែក ជិត ៤០០០គ្រឿង របស់រុស្ស៊ី ត្រូវបំផ្លាញ នៅក្នុងសមរភូមិប្រយុទ្ធ នៅទឹកដីអ៊ុយក្រែន។
នៅក្នុងបទសម្ភាសន៍ជាមួយទូរទស្សន៍BBC មេបញ្ជាការកងទ័ពអង់គ្លេស លោកTony Radakinបាននិយាយថា រុស្ស៊ីបានថមថយកម្លាំងទ័ពជើងគោកនៅក្នុងសង្រ្គាមអ៊ុយក្រែនមែន ប៉ុន្តែ គេត្រូវយល់ថា រុស្ស៊ីនៅតែជាមហាអំណាចនុយក្លេអ៊ែរ ដែលមានសមត្ថភាពធ្វើសង្រ្គាមព័ត៌មានវិទ្យា មានមធ្យោបាយក្នុងទីអវកាស និងមានកម្មវិធីពិសេស នៅក្រោមទឹកសមុទ្រដែលអាចគំរាមបំផ្លាញ បណ្តាញខ្សែកាបក្រោមសមុទ្រ ដែលជាមធ្យោបាយសម្រាប់ការឆ្លើយឆ្លង ទាក់ទងគ្នា នៅជុំវិញពិភពលោក។
រុស្ស៊ីនៅតែមហាអំណាចនុយក្លេអ៊ែរមិនអាចប្រកែកបាន ហើយលោកពូទីនក៏នៅតែជាមេដឹកនាំដ៏មានអំណាចនៅរុស្ស៊ី យូរឆ្នាំទៅមុខទៀត។ នៅត្រង់ចំណុចនេះ មេបញ្ជាការទ័ពអង់គ្លេសបានទាត់ចោលពាក្យចចាមអារ៉ាមទាំងឡាយដែលថា លោកពូទីនកំពុងមានជំងឺប្រចាំកាយ ឬថា ប្រធានាធិបតីរុស្ស៊ី អាចត្រូវគេលបធ្វើឃាត និងថា លោកពូទីនអាចត្រូវគេផ្តួលចេញពីអំណាច ដោយសារនយោបាយធ្វើសង្រ្គាមនៅអ៊ុយក្រែន។
តាមប្រធានសេនាធិការកងទ័ពអង់គ្លេស ក្នុងនាមជាអ្នកបម្រើការនៅក្នុងជួរកងទ័ព លោកមើលឃើញស្ថិរភាពនយោបាយ នៅក្នុងរបបលោកពូទីន ព្រោះថា លោកប្រធានាធិបតីរុស្ស៊ីបានបង្រ្កាប ក្រុមប្រឆាំងឲ្យរាបដល់ដី។ ចំណែកមន្រ្តី អ្នកមានអំណាចរុស្សីជាច្រើនបោះទុនវិនិយោគ ឈរនៅខាងលោកពូទីន និងគ្មានអ្នកណាម្នាក់ហ៊ានចេញមុខប្រឆាំង ប្រជែងអំណាចជាមួយ លោកពូទីននោះទេ។ ដូច្នេះ ពាក្យចចាមអារ៉ាមដែលថា លោកពូទីន មានជំងឺប្រចាំកាយ ឬអាចត្រូវគេលួចធ្វើឃាត គ្រាន់តែជាការស្រមើស្រមៃតែប៉ុណ្ណោះ។
ការគំរាមកំហែងរបស់រុស្ស៊ី និងសង្រ្គាមអ៊ុយក្រែនជាសំណុំរឿងនាំមុខគេ នៅក្នុងបទបង្ហាញរបស់កងទ័ពអង់គ្លេសទៅកាន់នាយករដ្ឋមន្រ្តីអង់គ្លេសថ្មី ដែលត្រូវចូលកាន់តំណែងបន្តពីលោកបូរីស ចនសុន នៅខែកញ្ញាខាងមុខ។ តាមមេបញ្ជាការកងទ័ពអង់គ្លេស អនាគតនាយករដ្ឋមន្រ្តីអង់គ្លេសថ្មី ត្រូវតែដឹងថា រុស្ស៊ី ជាមេគំរាមកំហែង ដ៏ធំបំផុតរបស់អង់គ្លេស ហើយការប្រឈមមុខជាមួយរុស្ស៊ីនឹងមានរយៈពេលយូរ ជាច្រើនទសវត្សរ៍។
អនាគតនាយករដ្ឋមន្រ្តីអង់គ្លេសថ្មីនឹងត្រូវរំលឹកឲ្យដឹងផងដែរ ពីការទទួលខុសត្រូវដ៏ធំរបស់អង់គ្លេស ក្នុងនាមជាមហាអំណាចនុយក្លេអ៊ែរ នៅចំពោះមុខការគំរាមកំហែងរបស់រុស្ស៊ី។ នេះបើតាមតាមប្រធានសេនាធិការកងទ័ពអង់គ្លេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ