មានការខ្វល់ខ្វាយដល់សុខភាព ត្រីបាឡែន Beluga ដែលប្រទះឃើញនៅក្នុងទន្លេសែនប្រទេសបារាំង
ហេតុការណ៍ចម្លែកមួយបានកើតឡើង ខណៈដែលត្រីបាឡែនមួយក្បាលត្រូវបានគេប្រទះឃើញនៅតាមដងទន្លេ Seine កាលពីថ្ងៃអង្គារកន្លងទៅ ប៉ុន្តែ គិតមកដល់ពេលនេះ ត្រីបាឡែន Beluga មួយនេះមើលទៅហាក់ដូចជាមានសុខភាពមិនល្អ ហើយនេះបានបង្កឲ្យមានការព្រួយបារម្ភជាខ្លាំងពីសំណាក់អាជ្ញាធរ ដែលកំពុងរកវិធីសាស្រ្តយ៉ាងណាក្នុុងការជួយសង្គ្រោះវា។
ចុះផ្សាយនៅថ្ងៃ៖
ស្តាប់ - ០១:៣១
យោងតាមអាជ្ញាធរក្នុងតំបន់ ត្រីបាឡែន Beluga ដែលបានហែលមកដល់ដងទន្លេ សែន ក្នុងប្រទេសបារាំងមើលទៅហាក់ដូចជាស្គមជាងធម្មតា ។ ត្រីបាឡែន នេះត្រូវបានគេប្រទះឃើញលើកដំបូងកាលពីថ្ងៃអង្គារនៅក្នុងទន្លេ ហើយការពិតទៅត្រីបាឡែននេះ ជាត្រីបាឡែនទី២ ហើយដែលបានហែល មកដល់ទន្លេ សែន នេះ។ កាលពី២ខែមុន មានត្រីបាឡែនមួយប្រភេទទៀតដែលបានមកជាប់គាំងនៅលើដងទន្លេនេះដែរ តែក៏បានស្លាប់ដោយការអត់ឃ្លាន។
ត្រីបាឡែន Beluga នេះជាប្រភេទសត្វដែលជិតផុតពូជមួយ ដែលភាគច្រើនរស់នៅក្នុងតំបន់អាកទិក ប៉ុន្ដែដោយហេតុដ៏កម្រមួយ វាបានចំណាកស្រុកមកដល់ ដងទន្លេ សែន ត្រង់ចំណុចមួយ មានចម្ងាយប្រហែលជា 70 គីឡូម៉ែត្រ ពីទីក្រុងប៉ារីស។ ក្រុមអ្នកសង្គ្រោះ និងអាជ្ញាធរក្នុងតំបន់ បានធ្វើការយ៉ាងសកម្ម ក្នុងការសង្គ្រោះត្រីបាឡែននេះ ហើយយោងតាមការសង្កេត ត្រួតពិនិត្យមក ត្រីបាឡែននេះមើលទៅហាក់ដូចជាមាន ការផ្លាស់ប្តូរពណ៌ស្បែក និងស្រកទម្ងន់ជាលំដាប់។
បើយោងតាម អនុប្រធានក្រុមស្រាវជ្រាវថនិកសត្វសមុទ្របារាំង យ៉ាងណាមិញ សត្វនេះមើលទៅមានសមត្ថភាពសួតល្អនៅឡើយ តែយ៉ាងណាក្តី ក្រុមជួយសង្គ្រោះកំពុងមានការលំបាកក្នុងការជួយសង្គ្រោះត្រីបាឡែននេះចេញពីដងទន្លេ Seine ។
អាជ្ញាធរក៏បានស្នើឱ្យអ្នកទស្សនារក្សាចម្ងាយរបស់ពួកគេ ព្រោះត្រីបាឡែន នេះងាយចាញ់ជាមួយនឹងសំលេងរំខានណាស់។ គោលដៅសំខាន់ក្នុងពេលនេះ គឺការកាត់បន្ថយភាពរំខាន និងធ្វើយ៉ាងណាអោយវាមានអាហារគ្រប់គ្រាន់ ជៀសវាងការស្លាប់ដោយភាពអត់ឃ្លានដូចត្រីបាឡែនមួយទៀត ដែលបានជាប់នៅដងទន្លេ សែន កាលពី២ខែមុន។
គួរបញ្ជាក់ថាត្រីបាឡែន Beluga នេះអាចម្តងម្កាលធ្វើចំណាកស្រុកទៅភាគខាងត្បូង តែវាអាចរស់នៅក្នុងទឹកសាបបានរយៈពេលខ្លីតែប៉ុណ្ណោះ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ