នាយករដ្ឋមន្ត្រីអាល្លឺម៉ង់ ចង់ពង្រីកសហភាពអឺរ៉ុប ឱ្យកាន់តែធំ នាពេលអនាគត
នៅថ្ងៃចន្ទទី ២៩សីហា ២០២២នេះ លោកប្រមុខរដ្ឋាភិបាលអាល្លឺម៉ង់ អូឡាហ្វ ស្ហុលស៍ បានបង្ហាញទស្សនៈវិស័យរបស់លោកជុំវិញអនាគតរបស់សហភាពអឺរ៉ុប។ លោក អូឡាហ្វ ស្ហុលស៍ ចង់ពង្រីកសហភាពអឺរ៉ុប ឱ្យកាន់តែធំ មានសមាជិកកើនដល់ពី៣០ទៅ៣៦ប្រទេស និងលែងមានហើយសិទ្ធិប្រឆាំងវេតូ ព្រោះបើតាមលោកស្ហុលស៍ សិទ្ធិវេតូនេះ មានន័យស្មើនឹងការធ្វើឱ្យគាំងស្ថាប័នអឺរ៉ុប។
ចុះផ្សាយនៅថ្ងៃ៖
ស្តាប់ - ០២:១៥
ខុសពីមេដឹកនាំអាល្លឺម៉ង់មុនៗ លោកប្រមុខរដ្ឋាភិបាលអាល្លឺម៉ង់ អូឡាហ្វ ស្ហុលស៍ ដែលបានឡើងដឹកនាំប្រទេសកាលពី១០ខែមុន បានប្រកាសគាំទ្រគំនិតផ្តួចផ្តើមរបស់លោកប្រធានាធិបតីបារាំង អេម៉ាណុយអែល ម៉ាក្រុង ចង់បង្កើតសហគមន៍នយោបាយអឺរ៉ុប។ ជាងនេះទៅទៀត ក្នុងឱកាសថ្លែងសុន្ទរកថាស្តីពីអនាគតអឺរ៉ុប នៅទីក្រុងប្រាក ថ្ងៃចន្ទទី ២៩សីហា លោក ស្ហុលស៍ បានប្រកាសចេតនាចង់ពង្រីកសហភាពអឺរ៉ុប ឆ្ពោះទៅទិសខាងកើត ទៅរកបណ្តាប្រទេសនៅតំបន់បាល់កង់ (៦ប្រទេស ៖ សែរប៊ី ម៉ុងតេណេហ្ក្រោ ម៉ាសេដ្វានខាងជើង អាល់បានី កូសូវ៉ូ បូស្នីអែហ្សេហ្កោវីន) ព្រមទាំងអ៊ុយក្រែន ម៉ុលដាវី និងហ្សកហ្ស៊ី។ សម្រាប់លោក អូឡាហ្វ ស្ហុលស៍ អឺរ៉ុបគួរតែមានសមាជិកដល់៣០ទៅ ៣៦ប្រទេស និងខុសពីសហភាពអឺរ៉ុបនាពេលបច្ចុប្បន្ន។ ស្នូលអឺរ៉ុបនឹងរំកិលទៅទិសខាងកើត ហើយអឺរ៉ុបនឹងជាប្រយោជន៍សម្រាប់យើងគ្រប់គ្នា។ នេះបើតាមការយល់ឃើញរបស់លោក ស្ហុលស៍ដដែល។
បើអនាគតសហភាពអឺរ៉ុបមានទ្រង់ទ្រាយថ្មី ធំ មានប្រយោជន៍នយោបាយ សេដ្ឋកិច្ច និងប្រព័ន្ធសង្គមធំជាងមុន ច្បាប់វិធានផ្ទៃក្នុងក៏ត្រូវតែប្តូរផ្លាស់ដែរ មានជាអាទិ៍ “ការសម្រេចជាឯកច្ឆន្ទ”។ បើតាម លោកស្ហុលស៍ ហានិភ័យនៃការសម្រេចជាឯកច្ឆន្ទ ដែលអឺរ៉ុបប្រកាន់យកនាពេលនេះ គឺ ប្រទេសមួយអាចប្រើសិទ្ធិវេតូរារាំងប្រទេសផ្សេងមិនឱ្យវិវឌ្ឍបាន។ សមាជិកកាន់តែច្រើន វេតូក៏អាចកើនឡើងច្រើនដែរ។ ដូច្នេះ សហភាពអឺរ៉ុបនាពេលអនាគតនឹងសម្រេចការ ដោយយកតាមសំឡេង “ភាគច្រើន”វិញ ទាក់ទងនឹងប្រធានបទនយោបាយការបរទេស ហើយបន្តពង្រីកបន្តិចម្តងៗ នៅក្នុងវិស័យផ្សេងទៀត ដូចជានៅពេលសម្រេចនយោបាយពន្ធដារជាដើម។
លោកស្ហុលស៍បានទទួលស្គាល់ថា អាល្លឺម៉ង់អាចរងផលវិបាកពីនយោបាយ យកតាមសំឡេងភាគច្រើន ប៉ុន្តែគោលការណ៍ “ជាឯកច្ឆន្ទ” អាចដំណើរការបានល្អតែក្នុងករណីគ្មានសម្ពាធតឹងតែងប៉ុណ្ណោះ។ ឥលូវអឺរ៉ុបខុសពីមុន នេះគឺដោយហេតុតែរុស្ស៊ីធ្វើសង្គ្រាម ឈ្លានពានអ៊ុយក្រែន។ នេះបើតាមលោកប្រមុខរដ្ឋាភិបាលអាល្លឺម៉ង់ដដែល ដែលធានា ជាលក្ខណៈបុគ្គលជួយក្រូអាស៊ី រ៉ូម៉ានី ប៊ុលហ្ការី ឱ្យបានចូលក្នុងក្រុមប្រទេសមានចរាចរណ៍សេរី Schengen ក្នុងពេលឆាប់ៗ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ