រដ្ឋមន្រ្តីការពារជាតិអូស្រ្តាលីបំពេញទស្សនកិច្ចនៅអឺរ៉ុបដើម្បីពង្រឹងកិច្ចសហប្រតិបត្តិការសន្តិសុខ
រដ្ឋមន្រ្តីការពារជាតិអូស្រ្តាលីលោក Richard Marles ផ្តើមទស្សនកិច្ចរយៈពេល ៣ថ្ងៃនៅអឺរ៉ុបដោយចាប់ផ្តើមនាថ្ងៃចន្ទ ទី២៩ សីហារហូតដល់ថ្ងៃទី១ កញ្ញា។ បារាំងជាប្រទេសដែលលោក Marles បំពេញទស្សនកិច្ចមុនគេ មុននឹងលោកបន្តដំណើរទៅកាន់ប្រទេសអង់គ្លេស និងបញ្ចប់នៅក្នុងប្រទេសអាល្លឺម៉ង់។ តាំងពីគណបក្សពលករនៅអូស្រ្តាលីឈ្នះឆ្នោតនាការបោះឆ្នោតសភាក្នុងខែឧសភាកន្លងទៅ នេះជាលើកទី១ ដែលលោក Marles បំពេញទស្សនកិច្ចនៅអឺរ៉ុប។
ចុះផ្សាយនៅថ្ងៃ៖
ស្តាប់ - ០២:២១
កម្មវត្ថុនៃទស្សនកិច្ចលើកដំបូងនៅអឺរ៉ុបរបស់ប្រមុខការពារជាតិអូស្រ្តាលីលោក Richard Marles មានច្រើន។ នៅក្នុងប្រទេសបារាំង លោក Marles សង្ឃឹមភ្ជាប់ និងផ្តល់សន្ទុះឡើងវិញនូវទំនាក់ទំនងការទូត និងសេដ្ឋកិច្ចរវាងបារាំង និងអូស្រា្តលី។ ទំនាក់ទំនងដែលបានស្គាល់ភាពល្អក់ កករ និងរកាំរកូសដោយសារតែរដ្ឋាភិបាលអូស្រា្តលីក្នុងជំនាន់នាយករដ្ឋមន្រ្តីលោកស្កុត ម៉ូរីសុនបានលុបចោលវិញនូវកុងត្រាទិញនាវាមុជទឹកបារាំងក្នុងខែកញ្ញា ឆ្នាំ ២០២១ និងបានងាកទៅទិញនាវាមុជទឹកអាមេរិកវិញ។ គួររម្លឹកថា នៅក្នុងកុងត្រាដែលរដ្ឋាភិបាលរបស់លោកស្កុត ម៉ូរីសុនបានចុះហត្ថលេខាជាមួយក្រុមហ៊ុនបារាំង Naval Group កាលពីខែធ្នូ ឆ្នាំ ២០១៦ អូស្រ្តាលីបានសន្យាទិញនាវាមុជទឹកបារាំងចំនួន ១២គ្រឿងក្នុងប្រាក់ចំនួន ៥៦ ០០០លានអឺរ៉ូ។
គឺទើបនៅក្រោយការជាប់ឆ្នោតរបស់គណបក្សពលករនៅអូស្រា្តលីដែលទំនាក់ទំនងរវាងក្រុងប៉ារីស និងក្រុងកង់បេរ៉ាបានស្គាល់ភាពប្រសើរឡើងវិញបន្តិច។ នៅក្នុងជំនួបជាមួយប្រធានាធិបតីបារាំងលោកម៉ាក្រុងនាដំណើរទស្សនកិច្ចក្នុងប្រទេសបារាំងកាលពីខែកក្កដាកន្លងទៅ នាយករដ្ឋមន្រ្តីថ្មីអូស្រា្តលីលោកអង់តូនី អាល់បានីស៊ីបានសន្យាបិទជាស្ថាពរនូវទំព័រអាប់អួរនៃទំនាក់ទំនងរវាងប្រទេសទាំងពីរ។ កាលណោះ លោកអាល់បានីស៊ីបានចាត់ទុកបារាំងជាដៃគូចាស់ជាងគេមួយរបស់អូស្រា្តលី។ ដូច្នេះ បេសកកម្មរបស់ប្រមុខការពារជាតិអូស្រា្តលីនៅបារាំងពេលនេះជាការបន្តស្តារ និងពង្រឹងឡើងវិញនូវទំនាក់ទំនងរវាងបារាំង និងអូស្រា្តលី។
បន្ទាប់ពីបារាំង លោក Richard Marles បន្តដំណើរទៅកាន់ប្រទេសអង់គ្លេសដែលនៅទីនោះ លោកនឹងទៅទស្សនកិច្ចនៅការដ្ឋានរបស់ក្រុមហ៊ុន Naval អង់គ្លេស។ ជាទស្សនកិច្ចខានមិនបាន ព្រោះអូស្រា្តលីត្រូវសម្រេចចិត្តពីពេលនេះទៅខែមីនា ឆ្នាំ ២០២៣ ថា តើនឹងត្រូវទិញនាវាមុជទឹកដើរដោយនុយក្លេអ៊ែររបស់អង់គ្លេស ឬរបស់អាមេរិក។ ប្រទេសចុងក្រោយ គឺអាល្លឺម៉ង់ដែលលោក Richard Marles ត្រូវចូលរួមនៅក្នុងតុមូលជាមួយក្រុមអ្នកទទួលខុសត្រូវក្នុងវិស័យការពារ។ ក្រៅពីពង្រឹងភាពជាដៃគូផ្នែកសន្តិសុខជាមួយប្រទេសអឺរ៉ុបទាំង ៣ ទស្សនកិច្ចរបស់ប្រមុខការពារជាតិអូស្រា្តលីនៅអឺរ៉ុបធ្វើឡើងនៅក្នុងបរិបទនៃការឡើងឥទ្ធិពលរបស់ចិននៅក្នុងតំបន់យុទ្ធសាស្រ្តឥណ្ឌូប៉ាស៊ីហ្វិកដែលសហភាពអឺរ៉ុបមិនបានមើលរំលងទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ