សន្និបាតក្រុមប្រឹក្សាសិទ្ធិមនុស្ស បើកឆាកជាមួយការថ្កោលទោសរុស្ស៊ី ស្តីពីការរំលោភសិទ្ធិមនុស្ស
ថ្ងៃចន្ទទី១២កញ្ញា ក្រុមប្រឹក្សាសិទ្ធិមនុស្សនៃអង្គការសហប្រជាជាតិ មានទីតាំងនៅទីក្រុងហ្សឺណែវ បានចាប់ផ្តើមបើកសន្និបាទប្រចាំឆ្នាំរបស់ខ្លួន ដែលមានរយៈពេល១ខែ។ នៅក្នុងសុន្ទរកថាបើកសន្និបាទនេះ លោកស្រី ណាដា អាល់ ណាស្ហ៊ីហ្វ អគ្គស្នងការស្តីទី នៃក្រុមប្រឹក្សាសិទ្ធិមនុស្ស បានថ្លែងថ្កោលទោសរុស្ស៊ី ដោយប្រើពាក្យយ៉ាងធ្ងន់ៗ ស្តីពីស្ថានភាពរំលោភសិទ្ធិមនុស្សនៅក្នុងប្រទេសរុស្ស៊ី តួយ៉ាងការគំរាម សំឡុត ដាក់សំពាធ ដើម្បីបំបិទសំឡេងប្រឆាំងរិះគន់។
ចុះផ្សាយនៅថ្ងៃ៖
ស្តាប់ - ០២:៣៨
ថ្វីបើក្នុងនាមជាអគ្គស្នងការបណ្តោះអាសន្ន ទំរាំលោក Volker Türk ឡើងមកធ្វើជាអគ្គស្នងការថ្មី តែលោកស្រី Nada al-Nashif មិនបានតមមាត់ទេ ក្នុងការថ្លែងរិះគន់រុស្ស៊ីទាក់ទិននឹងការរំលោភសិទ្ធិមនុស្ស។ លោកស្រីបានលើកឡើងថា អាជ្ញាធររុស្ស៊ី បានធ្វើសកម្មភាពជាច្រើន ផ្ទុយពីគោលការណ៍គ្រិះនៃសិទ្ធិសេរីភាព ដែលត្រូវបានការពារដោយរដ្ឋធម្មនុញ្ញរុស្ស៊ី។ អំពើទាំងនោះ មានដូចជា ការគំរាម សំឡុត ការដាក់សំពាធ ទៅលើអ្នកដែលចង់បញ្ចេញមតិ មិនថាអ្នកនយោបាយ ឬអ្នកកាសែតឯករាជ្យ។ សិទ្ធិសេរីភាពបញ្ចេញមតិ សិទ្ធិសេរីភាពជួបជុំ បង្កើតជាសមាគមផ្សេងៗ ត្រូវរួចខើចសឹងតែលែងមាននៅរុស្ស៊ី។
លោកស្រីបានបន្តទៀតថា ការងាររបស់បណ្តាញសារព័ត៌មាននៅរុស្ស៊ី ត្រូវបានគេរំខានយារយី តាមរយៈការបិទខ្ទប់ប្រភពចំណូល បានមកពីបណ្តាញអ៊ីនធ័រនិត ព្រមទាំងទម្រង់រូបភាពរារាំងផ្សេងៗទៀត ដែលវាប្រឆាំងនឹងពហុភាពនៃវិស័យព័ត៌មានសេរី។ លោកស្រី Nada al-Nashif បានអំពាវនាវផងដែរ ឲ្យរដ្ឋាភិបាលរុស្ស៊ី ត្រូវពិចារណាឡើងវិញ ចំពោះវិធានការកណ្តាប់ដៃ ដែលខ្លួនបានប្រើបណ្តាញសារព័ត៌មាន ឬអង្គការសង្គមស៊ីវីល ដោយចោទថា “បានទទួលប្រាក់ឧបត្ថម្ភពីបរទេស” “មនុស្សទទួលឥទ្ធិពលពីបរទេស” “ស្ថាប័នមានទំនាក់ទំនងជាមួយប្រទេសផ្សេង” ឬ “ស្ថាប័នដែលធ្វើសកម្មភាពប្រឆាំងនឹងសន្តិសុខរបស់រុស្ស៊ី” ជាដើម ។ល។
គួរបញ្ជាក់ថា រុស្ស៊ីបានដកខ្លួនចេញពីក្រុមប្រឹក្សាសិទ្ធិមនុស្សហើយ បន្ទាប់ពីមហាសន្និបាតនៃអង្គការសហប្រជាជាតិ បានបោះឆ្នោតដកបេក្ខភាពរុស្ស៊ី។ តែរុស្ស៊ី នៅមាននាមជាប្រទេសសង្កេតការណ៍ ក្នុងក្រុមប្រឹក្សាសិទ្ធិមនុស្ស។ ដូច្នេះ តាមការគ្រោងទុក នៅថ្ងៃអង្គារទី១៣កញ្ញានេះ តំណាងរដ្ឋាភិបាលរុស្ស៊ី អាចមានសិទ្ធិឆ្លើយតបវិញ នៅក្នុងសន្និបាទ ចំពោះសម្តីថ្កោលទោសរបស់លោកស្រី Nada al-Nashif។
គួរបញ្ជាក់ដែរថា កាលពីខែឧសភា ក្រុមប្រឹក្សាសិទ្ធិមនុស្សនៃអង្គការសហប្រជាជាតិ បានចាប់ផ្តើមបើកការស៊ើបអង្កេតមួយដែរ ទាក់ទិននឹងសកម្មភាពរំលោភសិទ្ធិមនុស្ស បង្កឡើងដោយកងទ័ពរុស្ស៊ី នៅក្នុងសង្គ្រាមអ៊ុយក្រែន។ ថ្ងៃទី២៣កញ្ញាខាងមុខនេះ ក្រុមការងារស៊ើបអង្កេតនឹងអានសេចក្តីសន្និដ្ឋាន ចំពោះមុខអង្គសន្និបាទនៃក្រុមប្រឹក្សាសិទ្ធិមនុស្ស។
ដោយឡែក មានមតិខ្លះទៀតក្នុងចំណោមមន្ត្រីការទូត បានលើកឡើងថាក្រុមប្រឹក្សាសិទ្ធិមនុស្ស ត្រូវតែបើកការស៊ើបអង្កេតឯករាជ្យមួយទៀត ស្តីពីការរំលោភសិទ្ធិមនុស្ស នៅក្នុងប្រទេសរុស្ស៊ី ហើយត្រូវតែងតាំងអ្នករាយការណ៍ពិសេសម្នាក់ផង។ តែយ៉ាងណាក៏ដោយ ក្រុមប្រទេសអឺរ៉ុបអះអាងថា គេពុំសូវមានសង្ឃឹមថា គំនិតនេះនឹងបានទទួលការគាំទ្រ សម្លេងភាគច្រើន ក្នុងចំណោមសមាជិកទាំង៤៧ នៃក្រុមប្រឹក្សាសិទ្ធិមនុស្សឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ