លោកអូឡាហ្វ ស្ហុលស៍ ចង់ធ្វើឲ្យកងទ័ពអាល្លឺម៉ង់ មានគ្រឿងសព្វាវុធល្អ ទំនើបផុតគេនៅអឺរ៉ុប
លោកអូឡាហ្វ ស្ហុលស៍ ប្រមុខដឹកនាំរដ្ឋាភិបាលអាល្លឺម៉ង់ បានថ្លែងកាលពីថ្ងៃសុក្រទី១៦កញ្ញាថា អាល្លឺម៉ង់ ត្រូវតែធ្វើយ៉ាងណា ដើម្បីឲ្យមានកងទ័ព ដែលបំពាក់ដោយគ្រឿងសព្វាវុធល្អ និងទំនើបជាងគេបំផុតនៅអឺរ៉ុប។ លោកក៏បានថ្លែងអំពាវនាវផងដែរ ថាប្រទេសអឺរ៉ុប ត្រូវតែពង្រឹងតួនាទីឲ្យបានកាន់តែធំ នៅក្នុងក្របខណ្ឌអង្គការអូតង់ ដើម្បីការពារសន្តិសុខ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៣
ក្នុងនាមអាល្លឺម៉ង់ ជាប្រទេសដែលមានប្រជាជនច្រើនជាងគេ ព្រមទាំងមានសេដ្ឋកិច្ចនាំមុខគេនៅអឺរ៉ុប គឺកងទ័ពអាល្លឺម៉ង់ ត្រូវតែក្លាយជាសសរទ្រូងដ៏សំខាន់ ដើម្បីការពារអឺរ៉ុប។ កងទ័ពអាល្លឺម៉ង់ ត្រូវតែក្លាយជាកងទ័ព ដែលមានសមត្ថភាព និងគ្រឿងសព្វាវុធ ទំនើបជាងគេបំផុតនៅអឺរ៉ុប។ នេះគឺជាសម្តីថ្លែងការណ៍ របស់លោក អូឡាហ្វ ស្ហុលស៍ ប្រមុខរដ្ឋាភិបាលអាល្លឺម៉ង់ នៅចំពោះមុខថ្នាក់ដឹកនាំកងទ័ពអាល្លឺម៉ង់ កាលពីថ្ងៃសុក្រទី១៦កញ្ញា។
គួររំលឹកថា ការលើកទ័ពឈ្លានពានរបស់រុស្ស៊ី ទៅលើអ៊ុយក្រែន បានធ្វើឲ្យប្រែប្រួលទាំងស្រុង នូវគោលនយោបាយការពារជាតិអាល្លឺម៉ង់ ដែលពីមុនមក មិនសូវចាប់អារម្មណ៍ទៅលើវិស័យកងទ័ព។ ដោយឃើញស្ថានការណ៍នេះ អាល្លឺម៉ង់ បានចាប់ផ្តើមបើកកញ្ចប់ទឹកប្រាក់ចំនួន ១០ម៉ឺនលានអឺរ៉ូ ដើម្បីធ្វើទំនើបកម្មកងទ័ពខ្លួន ទាំងផ្នែកហ្វឹកហាត់បច្ចេកទេស បំពាក់គ្រឿងសព្វាវុធទំនើប និងរៀបចំយុទ្ធសាស្ត្រថ្មី។
អតីតរដ្ឋមន្ត្រីការពារជាតិអាល្លឺម៉ង់ម្នាក់ បានលើកឡើងថា “អ្នកនៅជុំវិញអាល្លឺម៉ង់ មិនមែនមានតែមិត្តទៀតនោះទេ”។ ក៏ប៉ុន្តែគំនិតយល់ឃើញនេះ មិនត្រូវបានថ្នាក់ដឹកនាំនយោបាយ សេដ្ឋកិច្ច ព្រមទាំងសង្គម ទទួលស្គាល់នោះទេ ហើយទើបតែភ្ញាក់រលឹកនៅពេលនេះតែប៉ុណ្ណោះ។ អតីតរដ្ឋមន្ត្រីរូបនេះ បានអះអាងថា បើក្រឡេកទៅមើលស្ថានភាពរបស់កងទ័ពអាល្លឺម៉ង់ បច្ចុប្បន្ន នោះទើបយើងដឹងថា វាគឺជាផលវិភាគនៃការគិតខុស។
គួរបញ្ជាក់ថា ក្រៅពីបានបង្ហាញចេតនាចង់ធ្វើទំនើបកម្មកងទ័ព លោកអូឡាហ្វ ស្ហុលស៍ បានលើកឡើងថា អាល្លឺម៉ង់បានត្រៀមខ្លួនហើយ ដើម្បីទទួលខុសត្រូវ ឈានមុខគេ ក្នុងការការពារសន្តិសុខរបស់ទ្វីបអឺរ៉ុប។ ទន្ទឹមគ្នានេះ លោកបានបន្ថែមថា ក្រុមប្រទេសអឺរ៉ុបទាំងអស់ ត្រូវចាប់ផ្តើមពង្រឹង និងទទួលស្គាល់តួនាទីខ្លួន ឲ្យច្បាស់លាស់ នៅក្នុងក្របខណ្ឌអង្គការអូតង់។ លោកក៏បានអះអាងផងដែរថា ថាលោកគាំទ្រគំនិត បង្កើតអគ្គបញ្ជាការដ្ឋានកងទ័ពអឺរ៉ុប ដែលនឹងក្លាយជាទីចាត់ការរួមមួយ សម្រាប់ចាត់ចែងប្រតិបត្តិការនានា តួយ៉ាងដូចជាការរំដោះជន្លៀសមនុស្ស ប្រតិបត្តិការបណ្តុះបណ្ដាលជាដើម។
យ៉ាងណាក៏ដោយ លោកអូឡាហ្វ ស្ហុលស៍ បានលើកឡើងពីឧបសគ្គមួយចំនួន ដើម្បីពង្រឹងចំណងសហប្រតិបត្តិការកងទ័ពរវាងប្រទេសសមាជិកអឺរ៉ុប។ ក្នុងនោះលោកបានអះអាងថា អ្វីដែលអឺរ៉ុបត្រូវដោះស្រាយបន្ទាន់ គឺប្រព័ន្ធគ្រឿងសព្វាវុធនៅអឺរ៉ុប ដែលមានច្រើនជ្រុល បច្ចេកទេសមិនដូចគ្នា មិនស៊ីសង្វាក់គ្នា សម្ភារៈប្រើប្រាស់ក៏ខុសគ្នា ហើយជាងនេះទៀត គឺការបញ្ហាប្រកួតប្រជែងគ្នា រវាងសហគ្រាសផលិតគ្រឿងសព្វាវុធនៅអឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ