អាល្លឺម៉ង់ សង្ស័យ រុស្ស៊ី នៅពីក្រោយការធ្វើឲ្យខូចខាតប្រព័ន្ធខ្សែកាបរថភ្លើង ២កន្លែង
កាលពីចុងសប្តាហ៍កន្លងទៅនេះ នៅអាល្លឺម៉ង់ មានការខូចខាតប្រព័ន្ធខ្សែកាបផ្លូវដែក ដែលបង្កចេញពីចេតនាវិច្ឆេទកម្មបំផ្លិចបំផ្លាញ និងបានបង្កឲ្យកកស្ទះចរាចរណ៍រថភ្លើង ចម្ងាយប្រមាណ ៥៤០ គីឡូម៉ែត្រ និងរាំងស្ទះការធ្វើដំណើរ អស់រយៈពេលប្រមាណ ៣ ម៉ោង។ ហេតុការណ៍នេះ បានធ្លាក់ទៅលើផ្លូវរថភ្លើង ២ កន្លែង នៅប៉ែកខាងលិចនិងខាងកើតប្រទេសអាល្លឺម៉ង់។ អ្នកនយោបាយក្នុងស្រុកអាល្លឺម៉ង់ បានអំពាវនាវឲ្យបង្កើនការប្រុងប្រយ័ត្នខ្ពស់ និងបានដាក់ការសង្ស័យលើ រុស្ស៊ី ដែលអាចនៅពីក្រោយការធ្វើឲ្យខូចខាតប្រព័ន្ធខ្សែកាបរថភ្លើងនេះ។
ចុះផ្សាយនៅថ្ងៃ៖
ស្តាប់ - ០២:០៥
ប្រធានគណៈកម្មាធិការសភាទទួលបន្ទុកកិច្ចការអឺរ៉ុប របស់អាល្លឺម៉ង់ បានចោទប្រកាន់ត្រង់ៗតែម្តងថា រុស្ស៊ីមានជាប់ពាក់ព័ន្ធនឹងវិច្ឆេទកម្មបំផ្លិចបំផ្លាញនេះ ឬជាអំពើរបស់រុស្ស៊ីតែម្តង ពីព្រោះតែ អាល្លឺម៉ង់ បានគាំទ្រ អ៊ុយក្រែន និងប្រឆាំងនឹងសង្គ្រាមឈ្លានពានរបស់រុស្ស៊ី។
តាមរយៈការចុះផ្សាយរបស់កាសែតក្នុងស្រុក Funke, អ្នកនយោបាយខាងបរិស្ថាននិយម លោក Anton Hofreiter ដែលស្និទ្ធនឹងអធិការបតីអាល្លឺម៉ង់ផង ក៏បានភ្ជាប់ការបំផ្លាញនេះ ទៅនឹងការធ្វើឲ្យធ្លាយឧស្ម័នហ្គាស់ ចេញពីបំពង់បង្ហូរឧស្ម័ន Nord Steam ទី១ និងទី២ ដែលធ្វើឲ្យខូចហើយអាក់ខានផ្គត់ផ្គង់ឧស្ម័នហ្គាស់។ លោក Anton Hofreiter លើកឡើងពេញមាត់តែម្តងថា នេះក៏ជាស្នាដៃរុស្ស៊ីដែរ។
កាសែតអាល្លឺម៉ង់ជាច្រើន ឲ្យដឹងថា ការខូចខាតប្រព័ន្ធខ្សែកាបផ្លូវដែកនោះ ជាស្នាដៃរបស់អ្នកជំនាញ និងជាអ្នកក្តោបក្តាប់ព័ត៌មានផ្ទៃក្នុងបានច្រើនពីប្រព័ន្ធផ្លូវរថភ្លើង របស់ក្រុមហ៊ុនជាតិអាល្លឺម៉ង់។ កាសែត Der Spiegel ដ៏ល្បីល្បាញ បានប្រាប់ដែរថា នគរបាលក្រុងប៊ែរឡាំងទទួលបន្ទុកប្រឆាំងភេវរកម្ម និងបទគំរាមកំហែងដល់សន្តិសុខជាតិ កំពុងតែបើកការស៊ើបអង្កេតសំណុំរឿងនេះ។
ការវាយប្រហារលើហេដ្ឋារចនាសម្ព័ន្ធដឹកជញ្ចូន នៅចុងសប្តាហ៍កន្លងទៅនេះ គឺបង្កើតក្តីព្រួយបារម្ភក្នុងរង្វង់ថ្នាក់ដឹកនាំស្រុកទេស អាល្លឺម៉ង់។ អ្នកនយោបាយ និងអ្នកទទួលខុសត្រូវជាន់ខ្ពស់ បានអំពាវនាវឲ្យរឹតបណ្តឹងសុវត្ថិភាពហេដ្ឋារចនាសម្ព័ន្ធដឹកជញ្ចូនរបស់ជាតិទាំងមូល។
ហេតុដូច្នេះហើយ ទើប អ្នកនយោបាយខាងបរិស្ថាននិយម បានស្នើសុំឲ្យរដ្ឋាភិបាលអាល្លឺម៉ង់ទម្លាក់កញ្ចប់ថវិកា ២០ ពាន់លានអឺរ៉ូ ដើម្បីជួសជុលហេដ្ឋារចនាសម្ព័ន្ធចាស់ៗ ហើយពង្រឹងសុវត្ថិភាពឲ្យប្រសើរឡើង រួមទាំងសុវត្ថិភាពខាងបច្ចេកវិទ្យាព័ត៌មានវិទ្យារបស់នគរបាលសមត្ថកិច្ចត្រួតកិច្ចការហេដ្ឋារចនាសម្ព័ន្ធ នេះផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ