អ.ស.ប.៖វាជារឿងបន្ទាន់ដែលត្រូវសម្រាលបន្ទុកបំណុលរបស់ប្រទេសក្រីក្រទាំង ៥៤ប្រទេស
នៅថ្ងៃអង្គារ ទី១១ តុលា កម្មវិធីអភិវឌ្ឍរបស់អង្គការសហប្រជាជាតិហៅកាត់ជាភាសាបារាំង PNUD បានបញ្ជាក់ថា វាជារឿងបន្ទាន់ដែលត្រូវជួយសម្រាលបន្ទុកបំណុលរបស់ប្រទេសក្រីក្រទាំង ៥៤ប្រទេសក្នុងលោក។ បើមិនដូច្នោះទេ ប្រទេសទាំងនោះនឹងធ្លាក់ក្នុងវិបត្តិកាន់តែធ្ងន់ធ្ងរថែមទៀត។ ប្រមុខ PNUD លោក Achim Steiner បានទាញសញ្ញាអាសន្នថា ទោះជាមានការអំពាវនាវច្រើនឲ្យគិតគូរពីបញ្ហានេះក៏ដោយក៏គេហាក់មិនបានឃើញមានចំណាត់ការអ្វីទាំងអស់មកដល់ពេលនេះ។
ចុះផ្សាយនៅថ្ងៃ៖
បច្ចុប្បន្ន ក្រុមប្រទេសក្រីក្រដែលជំពាក់បំណុលគេកំពុងប្រឈមនឹងបាតុភូតសេដ្ឋកិច្ចដែលធ្វើឲ្យពួកគេគ្មានលទ្ធភាពសងបំណុលគេ ឬមួយក៏គ្មានសិទ្ធិទទួលបានប្រាក់កម្ចីថ្មីទៀត នេះបើតាមការបញ្ជាក់របស់ PNUD។ តាមស្ថាប័នរបស់អង្គការសហប្រជាជាតិមួយនេះដដែល វិបត្តិកំពុងមានកាន់តែខ្លាំង ខណៈដែលយន្តការព្យួរការសងបំណុលក្នុងសម័យកូវីដ១៩ បានផុតកំណត់ និងចំពេលដែលយន្តការថ្មីបង្កើតឡើងដោយក្រុមប្រទេស G២០ កំពុងមានដំណើរការយ៉ាងយឺត។ ក្នុងពេលរង់ចាំលើការអនុវត្តន៍យន្តការថ្មីនេះ ទឹកប្រាក់បំណុលកំពុងមានកាន់តែច្រើនក្នុងរយៈពេលទសវត្សរ៍កន្លងទៅ និងប្រហែលជាអាចមានច្រើនជាងតួលេខផ្លូវការទៅទៀត។
យោងតាមទិន្នន័យដែលមាន ទឹកប្រាក់បំណុលសរុបនៅក្នុង ៤៦ប្រទេសក្រីក្រក្នុងចំណោមក្រុមប្រទេសក្រីក្រទាំង ៥៤ប្រទេសមានចំនួន ៧៨២ ០០០លានដុល្លារក្នុងឆ្នាំ ២០២០។ ទឹកប្រាក់បំណុលនេះនឹងធ្លាក់នៅត្រឹមចំនួន ៥៥២ ០០០លានដុល្លារ បើគេដក ៣ប្រទេសចេញ គឺអាហ្សង់ទីន អ៊ុយក្រែន និងប្រទេសវេណេស៊ុយអេឡា។ តាម PNUD មាន ១៩ប្រទេសក្នុងចំណោម ៥៤ប្រទេសកំពុងមានស្ថានការណ៍ធ្លាក់ចុះលឿន និងអាចប្រឈមនឹងការគ្មានសិទ្ធិទទួលបានប្រាក់កម្ចីថ្មីទៀត។ បើធៀបនឹងដើមឆ្នាំ ២០២២ នេះ គឺមាន ១០ប្រទេសបន្ថែមទៀតដែលកំពុងប្រឈមនឹងស្ថានការណ៍មួយនេះ។
លោក George Gray Molina ប្រធានសេដ្ឋវិទូរបស់ PNUD បានគូសបញ្ជាក់ដោយផ្អែកតាមការវាយតម្លៃរបស់ទីភ្នាក់ងារវាយតម្លៃហានិភ័យបំណុលថា បំណុលចំនួន ១ភាគ៣ នៃក្រុមប្រទេសកំពុងអភិវឌ្ឍទាំងអស់ត្រូវបានចាត់ចំណាត់ថ្នាក់ជាបំណុលដែលមានហានិភ័យខ្លាំង។ តាមលោក George Gray Molina ក្រុមប្រទេសដែលកំពុងប្រឈមខ្លាំងជាងគេនៅចំពោះមុខភ្លាមៗមានស្រីលង្កា ប៉ាគីស្ថាន ទុយនីស៊ី ឆាដ ឬមួយក៏ប្រទេសសំប៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ