សមាជិកអូតង់១៤ប្រទេស ព្រមតាមអាល្លឺម៉ង់ ពង្រឹងប្រព័ន្ធការពារដែនអាកាស
នៅថ្ងៃព្រហស្បតិ៍ទី ១៣តុលា២០២២នេះ ក្នុងជំនួបប្រជុំថ្នាក់រដ្ឋមន្ត្រីក្រសួងការពារជាតិអូតង់ សមាជិកអង្គការចំនួន ១៤ប្រទេស បានព្រមព្រៀងជាមួយអាល្លឺម៉ង់ រួមគ្នាទិញសម្ភារៈបរិក្ខារ ការពារដែនអាកាសនិងខែលប្រឆាំងមីស៊ីល ក្នុងក្របខ័ណ្ឌនៃការបំពាក់ប្រព័ន្ធការពារអាកាសអឺរ៉ុប។ នេះជាគម្រោងសម្រួលការទិញប្រព័ន្ធការពារដែនអាកាស ដែលស្នើឡើងដោយនាយករដ្ឋមន្ត្រីអាល្លឺម៉ង់ អូឡាហ្វ ស្ហុលស៍ កាលពីរដូវក្តៅ។
ចុះផ្សាយនៅថ្ងៃ៖
ស្តាប់ - ០២:០០
ផ្តួចផ្តើមដោយអាល្លឺម៉ង់ សម្ព័ន្ធមិត្តអង់គ្លេស ប៊ែលហ្សិក ប៊ុលហ្ការី សាធារណរដ្ឋឆែក អេស្តូនី លីទុយអានី លេតូនី ហុងគ្រី ហូឡង់ ន័រវេស ស្លូវាគី ស្លូវេនី និងរូម៉ានី ព្រមទាំងហ្វាំងឡង់ដែលទើបសុំចូលជាសមាជិកអង្គការអូតង់ បានចុះហត្ថលេខាលើលិខិតជូនដំណឹងទៅអង្គការអូតង់ ស្តីអំពី ចេតនាចង់ទិញរួមគ្នា នូវប្រព័ន្ធការពារដែនអាកាស ដូចជាArrow3របស់អ៊ីស្រាអែល ដែលអាចបាញ់បានរយៈឆ្ងាយ ឬ Partiot របស់អាមេរិក និង Iris-Tផលិតដោយក្រុមហ៊ុនអាល្លឺម៉ង់។ សម្រាប់លោកស្រីរដ្ឋមន្ត្រីក្រសួងការពារជាតិអាល្លឺម៉ង់ Christine Lambrecht ការប្រជុំធនធានបែបនេះ ជាទំនួលខុសត្រូវការពារសន្តិសុខអឺរ៉ុបរួម។
អគ្គលេខាធិការរងអង្គការអូតង់ លោក Mircea Geoana បានចេញសេចក្តីថ្លែងការណ៍អបអរភ្លាមថា មធ្យោបាយថ្មី អន្តរប្រតិបត្តិការនិងអាចបញ្ចូលប្រកបដោយតម្លាភាពក្នុងប្រព័ន្ធការពារដែនអាកាសនិងប្រព័ន្ធប្រឆាំងមីស៊ីលអូតង់ នឹងមកពង្រឹងសមត្ថភាពការពារសម្ព័ន្ធអាត្លង់ទិក ពីការគំរាមកំហែងផ្លូវអាកាសនិងមីស៊ីល។ ជាគំនិតផ្តួចផ្តើមដ៏ល្អ ព្រោះអូតង់ត្រូវការប្រព័ន្ធការពារដែនអាកាស ប្រព័ន្ធខែលប្រឆាំងនឹងមីស៊ីល និងប្រព័ន្ធប្រឆាំងនឹងដ្រូន។ នេះជាការលើកសរសើររបស់បារាំង ដែលមិនបានភ្ជាប់ខ្លួននឹងគម្រោងរបស់អាល្លឺម៉ង់នេះទេ។
ហេតុអ្វី ? មកពីបារាំងមានប្រព័ន្ធការពារអាកាស រយៈមធ្យម MAMBA កំពុងដំណើរការយ៉ាងពេញទំហឹងទៅហើយ ក្នុងបណ្តាញត្រួតពិនិត្យអាកាសអូតង់។ ប្រព័ន្ធការពារអាកាសបារាំង កំពុងធានាការពារអាកាសនិងការពារកងទ័ពបារាំង ប្រចាំការនៅប្រទេសរូម៉ានី ក្នុងក្របខ័ណ្ឌនៃការពង្រឹងការការពារព្រំដែនខាងកើតអូតង់។
សូមបញ្ជាក់ថា បណ្តាប្រទេសលោកខាងលិចភាគច្រើន ដែលមាននយោបាយកំហិតថវិកាយោធាតាំងពីចប់សង្គ្រាមត្រជាក់មក ពុំសូវមានបំពាក់ប្រព័ន្ធការពារដែនអាកាសទេ ប៉ុន្តែចាប់ផ្លាស់ជំហរនៅពេលឃើញសង្គ្រាមផ្ទុះឡើងនៅអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ