រុស្ស៊ី៖ព្រឹត្តិការណ៍បាញ់រះនៅក្នុងជំរំហ្វឹកហាត់យោធាបណ្តាលឲ្យស្លាប់យ៉ាងតិច ១១នាក់ និងរបួស ១៥នាក់
នៅក្នុងប្រទេសរុស្ស៊ី ក្រសួងការពារជាតិបានបញ្ជាក់ពីមានមនុស្សស្លាប់យ៉ាងតិច ១១នាក់ និងរបួស ១៥នាក់នៅក្នុងព្រឹត្តិការណ៍បាញ់រះនៅទីលានហ្វឹកហាត់យោធាមួយស្ថិតក្នុងតំបន់ប៊ែលហ្គោរ៉ូដក្បែរព្រំដែនប្រទេសអ៊ុយក្រែន។ ឧបទ្ទរវហេតុនេះបានកើតមានឡើង ខណៈដែលរុស្ស៊ីកំពុងបន្តយុទ្ធនាការកេណ្ឌទ័ពដើម្បីយកទៅជួយទ័ពរុស្ស៊ីនៅលើសមរភូមិសង្រ្គាមអ៊ុយក្រែន និងចំពេលដែលតំបន់ប៊ែរហ្គោរ៉ូដបានរងការវាយប្រហារច្រើនដងនារយៈពេលប៉ុន្មានថ្ងៃចុងក្រោយនេះ។
ចុះផ្សាយនៅថ្ងៃ៖
ស្តាប់ - ០២:១៩
សម្រាប់ក្រសួងការពារជាតិរុស្ស៊ី ព្រឹត្តិការណ៍បាញ់រះនៅទីលានហ្វឹកហាត់យោធាក្នុងតំបន់ប៊ែលហ្គោរ៉ូដស្ថិតក្បែរព្រំដែនអ៊ុយក្រែនជាអំពើភេរវកម្មដែលបង្កឡើងដោយភេរវជនចំនួនពីររូបមានដើមកំណើតពីប្រទេសមួយជាសមាជិករបស់សហគមន៍នៃរដ្ឋឯករាជ្យ។ សហគមន៍នៃរដ្ឋឯករាជ្យដែលក្រសួងការពារជាតិរុស្ស៊ីចង់និយាយនេះ គឺសម្ព័ន្ធនៃក្រុមប្រទេសអតីតសហភាពសូវៀត។ តាមក្រសួងការពារជាតិរុស្ស៊ីដដែល ភេរវជនទាំងពីរត្រូវបានបាញ់សម្លាប់ភ្លាមៗដោយកម្លាំងប៉ូលិសតំបន់ប៊ែលហ្គោរ៉ូដ តែមិនបានផ្តល់អត្តសញ្ញាណរបស់ជនដៃដល់ទាំងពីរនាក់ អ្នកបាត់បង់ជីវិតទាំង ១១នាក់ និងអ្នករបួសទាំង ១៥នាកក់ទេ។
គួរបញ្ជាក់ថាក្នុងរយៈពេលប៉ុន្មានថ្ងៃចុងក្រោយនេះ ភាពតានតឹងបានឡើងដល់កំពូលនៅក្នុងតំបន់ប៊ែលហ្គោរ៉ូដដោយរដ្ឋអំណាចបានលើកឡើងពីវត្តមាននៃការបាញ់ផ្លោងសឹងរាល់ថ្ងៃមកពីអ៊ុយក្រែន។ ក្នុងថ្ងៃសៅរ៍ ទី១៥ តុលា រដ្ឋអំណាចតំបន់ប៊ែលហ្គោរ៉ូដបានប្រកាសឲ្យដឹងពីការវាយប្រហារលើឃ្លាំងស្តុកប្រេងមួយ ហើយកាលពីថ្ងៃសុក្រ ទី១៤ តុលា គឺការវាយប្រហារលើមជ្ឈមណ្ឌលអគ្គិសនីដែលបានបណ្តាលឲ្យដាច់ចរន្តអគ្គិសនី។ តែមកដល់ពេលនេះ អ៊ុយក្រែននៅមិនទាន់បានបញ្ចេញប្រតិកម្មយ៉ាងណាចំពោះការលើកឡើងរបស់រដ្ឋអំណាចតំបន់ប៊ែលហ្គោរ៉ូដទេ។
ព្រឹត្តិការណ៍បាញ់រះនៅទីលានហ្វឹកហាត់យោធានាថ្ងៃសៅរ៍ ទី១៥ តុលាបានកើតមានឡើង ខណៈដែលរដ្ឋអំណាចរុស្ស៊ីបានព្រមានក្នុងសប្តាហ៍នេះពីហានិភ័យនៃការវាយប្រហារភេរវកម្មពីអ៊ុយក្រែន។ មួយវិញទៀត រឿងរ៉ាវមួយនេះបានធ្លាក់មក ចំពេលដែលរុស្ស៊ីកំពុងបន្តយុទ្ធនាការកេណ្ឌទ័ពបម្រុងទៅជួយទ័ពនៅលើសមរភូមិសង្រ្គាមអ៊ុយក្រែន។ គេនៅមិនទាន់ដឹងថា តើរុស្ស៊ីនឹងឆ្លើយតបយ៉ាងណាចំពោះព្រឹត្តិការណ៍ថ្មីចុងក្រោយនៅតំបន់ប៊ែលហ្គោរ៉ូដទេ។ តែកន្លងមក រុស្ស៊ីមិនញញើតវាយបកចាស់ដៃលើទង្វើវាយប្រហារលើផលប្រយោជន៍ខ្លួន។ ថ្មីៗនេះ រុស្ស៊ីបានបាញ់មីស៊ីលស្រោចលើអ៊ុយក្រែននៅក្រោយការបំផ្ទុះលើស្ពានឆ្លងទៅតំបន់គ្រីមេដែលរុស្ស៊ីបានទម្លាក់ការទទួលខុសត្រូវលើអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ