សង្រ្គាមអ៊ុយក្រែន៖បារាំងគ្រោងហ្វឹកហាត់ទាហានអ៊ុយក្រែនចំនួន ២ ០០០នាក់នៅលើទឹកដីបារាំង
នៅក្នុងប្រទេសបារាំង រដ្ឋមន្រ្តីក្រសួងការពារជាតិលោកសេបាស់ស្យៀង ឡឺក័រនុយបានប្រកាសនៅក្នុងកាសែតបារាំង Le Parisien ចេញផ្សាយក្នុងថ្ងៃអាទិត្យ ទី១៦ តុលាថា បារាំងនឹងទទួលបង្ហាត់បង្រៀនទាហានអ៊ុយក្រែនចំនួន ២ ០០០នាក់នៅលើទឹកដីបារាំង។ កន្លងមក បារាំងក៏ធ្លាប់បានបង្ហាត់បង្រៀនទាហានអ៊ុយក្រែនដែរ ពិសេសបង្រៀនឲ្យចេះប្រើកាំភ្លើងធំឈ្មោះ កាណុង សេហ្សា « Canons Caesar »។ តែកម្មវិធីហ្វឹកហ្វឺនទាហានអ៊ុយក្រែនដែលប្រកាសដោយរដ្ឋមន្រ្តីការពារជាតិពេលនេះមានទ្រង់ទ្រាយធំមិនធ្លាប់មានគិតតាំងពីរុស្ស៊ីចូលឈ្លានពានអ៊ុយក្រែន។
ចុះផ្សាយនៅថ្ងៃ៖
ស្តាប់ - ០១:៤៤
មានទាហានអ៊ុយក្រែនរហូតដល់ទៅ ២ ០០០នាក់នឹងទទួលបានការបណ្តុះបណ្តាលពីបារាំងនូវមេរៀនចំនួន ៣ គឺមេរៀនស្តីពីការប្រយុទ្ធទូទៅ មេរៀនស្តីពីឡូជីស្ទិក និងមេរៀនស្តីពីការប្រើប្រាស់ឧបករណ៍យោធាដែលបារាំងបានផ្តល់ឲ្យ។ ការបណ្តុះបណ្តាលស្តីពីការប្រើប្រាស់ឧបករណ៍យោធាផ្តោតសំខាន់លើកាំភ្លើងធំឈ្មោះ កាណុង សេហ្សា « Canons Caesar » គ្រាប់មីស៊ីល Milan ប្រឆាំងរថក្រោះ គ្រាប់មីស៊ីល Mistra ប្រឆាំងយន្តហោះ និងការប្រើប្រាស់ប្រព័ន្ធមីស៊ីលការពារដែនអាកាសឈ្មោះ Crotale។ ប្រព័ន្ធមីស៊ីលការពារដែនអាកាសនេះនឹងបញ្ជូនឪ្យអ៊ុយក្រែននាពេលឆាប់ៗខាងមុខដូចដែលប្រធានាធិបតីបារាំងលោកម៉ាក្រុងបានបញ្ជាក់ក្នុងសប្តាហ៍នេះ។
តើមានប្រព័ន្ធមីស៊ីលការពារដែនអាកាស Crotaleចំនួនប៉ុន្មានដែលបារាំងនឹងផ្តល់ឲ្យអ៊ុយក្រែន?។ រដ្ឋមន្រ្តីក្រសួងការពារជាតិលោកសេបាស់ស្យៀង ឡឺក័រនុយមិនបានបញ្ជាក់លំអិតទេ។ តែលោកបានត្រឹមអះអាងថា ចំនួននឹងមានគួរសមដើម្បីឲ្យអ៊ុយក្រែនអាចការពារដែនអាកាសរបស់ខ្លួនបាន។ ទន្ទឹមគ្នានេះ លោកសេបាស់ស្យៀង ឡឺក័រនុយមិនភ្លេចបញ្ជាក់ថា ការឲ្យទៅអ៊ុយក្រែននឹងមិនខ្វះសម្រាប់កងទ័ពបារាំងទេ ព្រោះបារាំងគ្រោងជំនួសប្រព័ន្ធការពារដែនអាកាសឈ្មោះ Crotale នេះដោយប្រព័ន្ធការពារដែនអាកាសឈ្មោះ Mamba ដែលថ្មីជាង និងល្អជាង។
បន្ទាប់មក រដ្ឋមន្រ្តីក្រសួងការពារជាតិបារាំងរូបនេះដដែលមិនភ្លេចបញ្ជាក់ថា បារាំងស្ថិតក្នុងចំណោម ៥ប្រទេសដែលបានផ្តល់ជំនួយយោធាឲ្យអ៊ុយក្រែនច្រើនជាងគេ និងថាទាក់ទងនឹងជំនួយយោធានេះ បារាំងមិនសូវនិយាយច្រើនប៉ុន្មានទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ