រដ្ឋាភិបាលអាល្លឺម៉ង់ សម្រេចបន្ដដំណើរការស្ថានីយ៍អគ្គិសនីនុយក្លេអ៊ែរទាំង៣ចុងក្រោយ
ស្ថិតក្នុងបរិបទវិបត្តិថាមពល ខ្វះអគ្គិសនីប្រើប្រាស់ លោកអូឡាហ្វ ស្ហុលស៍ ប្រមុខរដ្ឋាភិបាលអាល្លឺម៉ង់ បានសម្រេចចិត្ត ឲ្យស្ថានីយ៍អគ្គិសនីនុយក្លេអ៊ែរ ចំនួន៣ចុងក្រោយ អាចបន្តដំណើរការ រហូតដល់ខែមេសាឆ្នាំ២០២៣។ តាមធម្មតា ស្ថានីយ៍នុយក្លេអ៊ែរទាំងនេះ ត្រូវគ្រោងបិទដំណើរការទាំងស្រុង នៅចុងឆ្នាំនេះ ដោយគោរពតាមគោលនយោបាយឈប់ប្រើនុយក្លេអ៊ែរទាំងស្រុង។ ការសម្រេច របស់លោកប្រមុខរដ្ឋាភិបាលអាល្លឺម៉ង់នាពេលនេះ កំពុងតែត្រូវបានបក្សបរិស្ថាននិយម ដែលស្ថិតក្នុងរដ្ឋាភិបាលចម្រុះ មិនពេញចិត្តជាខ្លាំង។
ចុះផ្សាយនៅថ្ងៃ៖
ស្តាប់ - ០២:៤០
នៅក្នុងលិខិតរបស់លោក អូឡាហ្វ ស្ហុលស៍ បានសរសេរបញ្ជាក់ថា ស្ថានីយ៍ អគ្គិសនីអគ្គិសនីនុយក្លេអ៊ែរចំនួន៣ចុងក្រោយ គឺស្ថានីយ៍ Isar 2 ស្ថានីយ៍ Neckarwestheim 2 នឹងស្ថានីយ៍ Emsland នឹងត្រូវបន្តដំណើរការផលិតចរន្តអគ្គិសនី រហូតដល់ថ្ងៃទី១៥ខែមេសា ឆ្នាំ២០២៣។ រដ្ឋាភិបាលនឹងបង្កើតក្របខណ្ឌច្បាប់ពិសេស ដើម្បីឲ្យស្ថានីយ៍ទាំង៣នេះ អាចបន្តដំណើរការបាន។
គួរបញ្ជាក់ថា តាមគម្រោងពីមុន គឺស្ថានីយ៍នុយក្លេអ៊ែរទាំង៣ចុងក្រោយនេះ ត្រូវបញ្ឈប់ដំណើរការទាំងស្រុងនៅដំណាច់ឆ្នាំ២០២២ ដោយអនុឡោមតាមផែនការនយោបាយ របស់រដ្ឋាភិបាលអាល្លឺម៉ង់ ឈប់ប្រើប្រាស់អគ្គិសនី ដើរដោយថាមពលនុយក្លេអ៊ែរ។ ក៏ប៉ុន្តែស្ថិតក្នុងបរិបទសង្គ្រាមនៅអ៊ុយក្រែន ដែលធ្វើឲ្យមានវិបត្តិខ្វះថាមពលអគ្គិសនី រដ្ឋាភិបាលអាល្លឺម៉ង់បានពិចារណា ចង់ឲ្យស្ថានីយ៍នុយក្លេអ៊ែរទាំងនេះ អាចបន្តដំណើរការជាបណ្តោះអាសន្ន ប្រសិនបើលក្ខខណ្ឌសុវត្ថិភាពអាចធានាបាន។ ជាគំនិត ដែលត្រូវបានក្រុមគណបក្សបរិស្ថាននិយម ដែលចូលរួមក្នុងរដ្ឋាភិបាលចម្រុះ បានតវ៉ារិះគន់ជាខ្លាំង។
ក្រោយការជជែកវែកញែក ជាច្រើនសប្តាហ៍ ទីបំផុត លោកអូឡាហ្វ ស្ហុលស៍ បានសម្រេចអារកាត់ ថាត្រូវតែបន្តដំណើរការបន្តិចទៀត។ លោក Christian Lindner រដ្ឋមន្ត្រីហិរញ្ញវត្ថុអាល្លឺម៉ង់ បានសរសេរលើTwitter ថាជាការសម្រេចដោយសមហេតុផល ព្រោះថាស្ថានីយ៍នុយក្លេអ៊ែរទាំង៣នេះ អាចផលិតចរន្តអគ្គិសនី បានចំនួន៦%ដែរ នៃតម្រូវការរួម។ លោកបន្តថា វាជាកាតព្វកិច្ចរបស់រដ្ឋាភិបាល ដែលត្រូវស្វែងរកដំណោះស្រាយ ធានាឲ្យមានការផ្គត់ផ្គង់ចរន្តអគ្គិសនីគ្រប់គ្រាន់ ដើម្បីឆ្លងកាត់រដូវរងារខាងមុខនេះ។
ដោយឡែក យោងតាមកាសែតអាល្លឺម៉ង់ Bild ការសម្រេចរបស់លោកអូឡាហ្វ ស្ហុលស៍នេះ គឺជាការបំបាក់មុខលោករដ្ឋមន្ត្រីក្រសួងសេដ្ឋកិច្ច Robert Habeck ដែលជាមនុស្សមកពីបក្សបរិស្ថាននិយម ដែលប្រឆាំងដាច់ខាតនឹងថាមពលអគ្គិសនីដើរដោយនុយក្លេអ៊ែរ ។ ភាពរកាំរកូស ដែលអាចនឹងធ្វើឲ្យដួលរលំរដ្ឋាភិបាលចម្រុះ។ ដូចគ្នាដែរ លោក Martin Kaiser នាយកប្រតិបត្តិអង្គការGreenpeace នៅអាល្លឺម៉ង់ បានលើកឡើងថា ការសម្រេចបន្តដំណើរការស្ថានីយ៍នុយក្លេអ៊ែរទាំង៣នេះ គឺជាការសម្រេច ដែលគ្មានការទទួលខុសត្រូវ ព្រោះវានឹងធ្វើឲ្យប្រជាជនអាល្លឺម៉ង់ ប្រឈមហានិភ័យ។
គួរបញ្ជាក់ដែរថា ស្ថិតក្នុងបរិបទខ្វះថាមពលប្រើប្រាស់ ដោយសារតែឈប់ទិញឧស្ម័នរបស់រុស្ស៊ី អាល្លឺម៉ង់ ក៏បានងាកទៅប្រើប្រាស់ថាមពលធ្យូងថ្មវិញដែរ បើទោះបីជាដឹងថា វាជាប្រភពបញ្ចេញឧស្ម័នកាបូនិកខ្លាំងក៏ដោយ។ ស្ថានីយ៍អគ្គិសនីដើរដោយចំហេះធ្យូងថ្មជាច្រើន ត្រូវបានរដ្ឋាភិបាលអាល្លឺម៉ង់ សម្រេចឲ្យបន្តដំណើរការដល់ពាក់កណ្តាលឆ្នាំ២០២៤៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ