អាល្លឺម៉ង់អនុញ្ញាតឱ្យចិនចូលរួមវិនិយោគកំពង់ផែហាំបួក (Hamburg)
នៅទីបំផុត រដ្ឋាភិបាលអាល្លឺម៉ង់បានសម្រេច នៅថ្ងៃពុធទី ២៦តុលា២០២២ អនុញ្ញាតឱ្យក្រុមហ៊ុនចិនចូលរួមធ្វើវិនិយោគកំពង់ផែ ហាំបួក មែន។ ជាគម្រោងវិនិយោគដ៏ចម្រូងចម្រាស ទាំងនៅផ្ទៃក្នុងប្រទេសអាល្លឺម៉ង់ផ្ទាល់ និងនៅអឺរ៉ុប។ តែដើម្បីកាត់បន្ថយសំឡេងរិះគន់ អាល្លឺម៉ង់បានកំរិតភាគហ៊ុនចូលរួមវិនិយោគរបស់ចិន ទាបជាង២៥%។
ចុះផ្សាយនៅថ្ងៃ៖
ស្តាប់ - ០២:០៦
ក្រុមហ៊ុនCoscoចិន អាចមានចំណែកចូលរួមវិនិយោគកំពង់ផែតុងតឺណឺហាំបួក ជាមួយក្រុមហ៊ុនអាល្លឺម៉ង់ HHLA ត្រឹមតែ២៤,៩%ប៉ុណ្ណោះ មិនមែនដល់៣៥%ដូចក្នុងគម្រោងដើម ទេ។ នេះបើតាមការគូសបញ្ជាក់របស់លោករដ្ឋមន្ត្រីក្រសួងសេដ្ឋកិច្ច ដោយពន្យល់ថា ការកំរិតភាគហ៊ុនដូច្នេះ ដើម្បីការពារសន្តិសុខ និងសណ្តាប់ធ្នាប់សាធារណៈ។
ការចូលរួមវិនិយោគក្រោម២៥%នេះ គ្មានឥទ្ធិពលលើសកម្មភាពកំពង់ផែទេ ហើយក៏មិនបង្កើតឱ្យមានភាពរំពឹងយុទ្ធសាស្ត្រដែរ។ នេះបើតាមអ្នកនាំពាក្យរដ្ឋាភិបាល។ Coscoមិនត្រូវបានអនុញ្ញាតឱ្យចូលចរចាដើម្បីប្រើសិទ្ធិប្រឆាំងវេតូ នៅក្នុងសេចក្តីសម្រេចបែបយុទ្ធសាស្ត្រនិងបែបបុគ្គលឡើយ។ ប៊ែរឡាំងបានធានាថា រាល់គំនិតចង់ដំឡើងភាគហ៊ុន ត្រូវឆ្លងកាត់ការត្រួតពិនិត្យពីក្រសួង។
ក្រុមប្រឹក្សារដ្ឋមន្ត្រីបានស្រុះស្រួលគ្នា កំរិតសមត្ថភាពវិនិយោគរបស់ចិន ក៏ដើម្បីបិទបញ្ចប់ពាក្យរិះគន់ទាំងឡាយដែលកើតមាននៅក្នុងប្រទេសអាល្លឺម៉ង់និងនៅសហភាពអឺរ៉ុប ប្រឆាំងនឹងលោកនាយករដ្ឋមន្ត្រីអាល្លឺម៉ង់អូឡាហ្វ ស្ហុលស៍។
សូមរំលឹកថា បើតាមសារព័ត៌មានអាល្លឺម៉ង់ លោក អូឡាហ្វ ស្ហលស៍ ដែលធ្លាប់ជាអតីតអភិបាលក្រុងហាំបួកផង មិនបានរារាំងគម្រោងបឋមកាលពីមួយឆ្នាំមុន ឱ្យចិនចូលរួមវិនិយោគកំពង់ផែ៣៥%ទេ។ តែរដ្ឋមន្ត្រីចំនួន៦រូប មានជាអាទិ៍រដ្ឋមន្ត្រីសេដ្ឋកិច្ច មហាផ្ទៃ និងការពារជាតិ បានប្រឆាំង។ ជាស្ថានភាពដែលកម្រកើតមានណាស់ក្នុងរដ្ឋាភិបាល។
សេចក្តីប្រកាសអនុញ្ញាតឱ្យចិនចូលរួមវិនិយោគកំពង់ផែហាំបួក ប្រព្រឹត្តជួនចំពេលលោកប្រមុខដឹកនាំរដ្ឋាភិបាលអាល្លឺម៉ង់ អូឡាហ្វ ស្ហុលស៍ ត្រូវអញ្ជើញទៅបំពេញទស្សនកិច្ចផ្លូវការនៅសប្តាហ៍ក្រោយនៅប្រទេសចិន ជាលើកទីមួយគិតចាប់តាំងពីខែវិច្ឆិកា២០១៩មក។
ហាំបួកជាកំពង់ផែពាណិជ្ជកម្មលេខមួយរបស់អាល្លឺម៉ង់ និងទីបីនៅអឺរ៉ុប បន្ទាប់ពី កំពង់ផែរ៉ូទែរដាំរបស់ហូឡង់និងកំពង់ផែអង់វែររបស់ប៊ែលហ្សិក។ រីឯCosco ជាក្រុមហ៊ុនដ៏ធំជាងគេរបស់ចិន។ ក្រុមហ៊ុនHHLA អាល្លឺម៉ង់ គ្រប់គ្រងច្រកកុងតឺណឺបីរបស់កំពង់ផែហាំបួក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ