សង្រ្គាមនៅអ៊ុយក្រែនជាប្រធានបទនៃកិច្ចសន្ទនាថ្នាក់ប្រមុខការទូតរវាងអាមេរិក និងចិន
នៅព្រឹកថ្ងៃចន្ទ ទី៣១ តុលា រុស្ស៊ីបានបាញ់មីស៊ីលជាច្រើនគ្រាប់ទៅបំផ្លាញហេដ្ឋារចនាសម្ព័ន្ធអគ្គិសនីក្នុងតំបន់ជាច្រើនរបស់អ៊ុយក្រែន ពិសេសតំបន់ក្បែរទីក្រុងកៀវ។ យោងតាមទាហានអ៊ុយក្រែន មានមីស៊ីលជាង ៥០គ្រាប់ត្រូវបានទាហានរុស្ស៊ីបាញ់ចេញពីសមុទ្រកាភ្ជៀន និងពីតំបន់រ៉ូស្តូវ។ ចៅហ្វាយក្រុងកៀវបានបញ្ជាក់ថា តំបន់មួយភាគរបស់ក្រុងកៀវគ្មានភ្លើងអគ្គិសនីប្រើប្រាស់ ហើយមានតំបន់ខ្លះគ្មានទឹកប្រើប្រាស់។ គួររម្លឹកថាកាលពីថ្ងៃចន្ទ ទី១០ និងថ្ងៃចន្ទ ទី១៧ តុលា រុស្ស៊ីធ្លាប់បានវាយប្រហារទ្រង់ទ្រាយដូចគ្នាដោយប្រើដ្រូនរបស់ប្រទេសអ៊ីរ៉ង់។
ចុះផ្សាយនៅថ្ងៃ៖
ស្តាប់ - ០២:១០
ថ្ងៃចន្ទ ទី៣១ តុលានេះជាថ្ងៃចន្ទលើកទី៣ ដែលរុស្ស៊ីបានវាយប្រហារទ្រង់ទ្រាយធំលើហេដ្ឋារចនាសម្ព័ន្ធអគ្គិសនីរបស់អ៊ុយក្រែនជាច្រើនកន្លែង ពិសេសក្នុងទីក្រុងកៀវដោយប្រើដ្រូនអ៊ីរ៉ង់ ឬមីស៊ីល។ តែកំណត់សម្គាល់នៃការវាយប្រហារជាថ្មីនេះបានកើតមានឡើង ២ថ្ងៃក្រោយពីមានការវាយប្រហារលើនាវាចម្បាំងរុស្ស៊ីក្នុងតំបន់គ្រីមេដែលក្រសួងការពារជាតិរុស្ស៊ីបានទម្លាក់ការទទួលខុសត្រូវលើអ៊ុយក្រែនដោយមានជំនួយពីទាហានជើងទឹកអង់គ្លេស។ តែការចោទប្រកាន់នេះត្រូវបានអ៊ុយក្រែន និងអង់គ្លេសបដិសេធយ៉ាងដាច់អហង្ការ។
មួយវិញទៀត ការស្រោចមីស៊ីលជាថ្មីរបស់រុស្ស៊ីលើអ៊ុយក្រែនក្នុងថ្ងៃចន្ទ ទី៣១ តុលាបានកើតមានឡើង ក្រោយពីប្រមុខការទូតអាមេរិកលោកអង់តូនី ប៊្លីនកិន និងសមភាគិចិនលោកវ៉ាង យីបានជួបសន្ទនាតាមទូរស័ព្ទក្នុងថ្ងៃអាទិត្យ ទី៣០ តុលា។ ក្រៅពីទំនាក់ទំនង និងកិច្ចសប្រតិបត្តិការទ្វេភាគីអាមេរិក ចិន ឥស្សរជនទាំងពីរក៏បាននិយាយច្រើនពីសង្រ្គាមនៅអ៊ុយក្រែន។ អ្នកនាំពាក្យក្រសួងការបរទេសអាមេរិកលោកនេដ ប្រៃស៍បានបញ្ជាក់ថា លោកអង់តូនី ប៊្លីនកិនបាននិយាយជាមួយលោកវ៉ាង យីពីភាពចាំបាច់ក្នុងការរក្សាខ្សែទូរគមនាគមន៍ឲ្យនៅចំហ និងត្រូវគ្រប់គ្រងទំនាក់ទំនងអាមេរិក ចិនដោយមានការទទួលខុសត្រូវ។
ចំណែកក្រសួងការបរទេសចិនបានបញ្ចាក់ថា ការនាំទំនាក់ទំនងចិន អាមេរិកទៅរកផ្លូវនៃការអភិវឌ្ឍន៍ស្ថិរភាពមិនត្រឹមជាផលប្រយោជន៍សម្រាប់ចិន និងអាមេរិកប៉ុណ្ណោះទេ តែវាក៏ជាការរង់ចាំចង់បានពីសហគមន៍អន្តរជាតិដែរ។ ទាក់ទងនឹងសង្រ្គាមអ៊ុយក្រែន លោកវ៉ាង យីបានអំពាវនាវឲ្យភាគីទាំងអស់មានការអត់ធ្មត់ និងឲ្យមានកិច្ចខិតខំប្រឹងប្រែងការទូតបន្ថែមទៀតដើម្បីទប់ស្ថានភាពកុំឱ្យធ្លាក់កាន់តែអាក្រក់ទៅ។ គួរបញ្ជាក់ថា កិច្ចសន្ទនារវាងលោកវ៉ាង យីនិងសមភាគីអាមេរិកបានធ្វើឡើង ក្រោយពីលោកវ៉ាង យីបានជួបសន្ទនាជាមួយសមភាគីរុស្ស៊ីលោកស៊ែរហ្កី ឡាវរ៉ូវកាលពីថ្ងៃព្រហស្បតិ៍ ទី២៧ តុលា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ