រុស្ស៊ីបន្តអះអាងជាថ្មីពីការមានភស្តុតាងដែលថា អង់គ្លេសនៅពីក្រោយការបំផ្ទុះបំពង់បង្ហូរឧស្ម័ន Nord Stream
សង្រ្គាមពាក្យសម្តីកំពុងបន្តមានយ៉ាងផុសផុលរវាងប្រទេសរុស្ស៊ី និងប្រទេសអង់គ្លេសជុំវិញការផ្ទុះបំពង់បង្ហូរឧស្ម័ន Nord Stream នៅក្នុងសមុទ្របាល់ទិកកាលពីថ្ងៃទី២៦ កញ្ញា។ នៅថ្ងៃអង្គារ ទី១ វិច្ឆិការ អ្នកនាំពាក្យវិមានប្រធានាធិបតីរុស្ស៊ីលោកឌីមីទ្រី ប៉េស្កូវបានចោទអង់គ្លេសពីបទជាអ្នកបំផ្ទុះបំពង់បង្ហូរឧស្ម័ន Nord Stream។ អង់គ្លេសតាមរយៈអ្នកនាំពាក្យនាយករដ្ឋមន្រ្តីបានឆ្លើយបកវិញដោយយល់ឃើញថា ការចោទរបស់រដ្ឋអំណាចរុស្ស៊ីមានគោលដៅបង្វែរចំណាប់អារម្មណ៍របស់ពលរដ្ឋរស្ស៊ីពីភាពបរាជ័យរបស់ទាហានរុស្ស៊ីនៅសមរភូមិសង្រ្គាមអ៊ុយក្រែន និងថា ទង្វើរបស់រដ្ឋអំណាចរុស្ស៊ីរបៀបនេះជាទម្លាប់មួយរបស់រុស្ស៊ី។ គួរបញ្ជាក់ថាក្នុងថ្ងៃសៅរ៍ ទី២៩ តុលា កងទ័ពរុស្ស៊ីក៏បានចោទអង់គ្លេសក្នុងរឿងរ៉ាវដូចគ្នានេះ។ តែនៅក្នុងការថ្លែងរបស់អ្នកនាំពាក្យវិមានក្រឹមឡាំងពេលនេះ លោកប៉េស្កូវបានព្រមានច្បាស់ៗថា រុស្ស៊ីនឹងមិនទុកឲ្យទង្វើទាំងអស់នេះបន្តគ្មានចម្លើយតបវិញទេ។
ចុះផ្សាយនៅថ្ងៃ៖
ស្តាប់ - ០១:១៦
« ទីភ្នាក់ងារស៊ើបការណ៍សម្ងាត់របស់យើងមានភស្តុតាងដែលបញ្ជាក់ថា ប្រតិបត្តិការ និងការសម្របសម្រួលនៃការវាយប្រហារលើឆកសមុទ្រសេបាស្តូប៉ូលត្រូវបានរៀបចំ និងដឹកនាំដោយក្រុមអ្នកជំនាញកងទ័ពអង់គ្លេស។ យើងក៏មានភស្តុតាងដែលបញ្ជាក់ផងដែរថា អង់គ្លេសមានជាប់ពាក់ព័ន្ធនឹងទង្វើវិច្ឆេទកម្ម ទង្វើភេរវកម្មប្រឆាំងនឹងហេដ្ឋារចនាសម្ព័ន្ធថាមពលដ៏សំខាន់។
មិនមែនហេដ្ឋារចនាសម្ព័ន្ធថាមពលរុស្ស៊ីទេ តែជាហេដ្ឋារចនាសម្ព័ន្ធថាមពលអន្តរជាតិ។ ព័ត៌មាននេះគួរតែត្រូវបានធ្វើការវិភាគដោយយកចិត្តទុកដាក់ជាទីបំផុតពីគ្រប់គ្នាទាំងអស់។ ទោះបីជាក្រុមប្រទេសលោកខាងលិចបន្តនៅស្ងៀមស្ងាត់ មិននិយាយស្តីអ្វីដែលយើងមិនអាចទទួលយកបានក៏ដោយក៏យើងសង្ឃឹមថា ការវិភាគលើព័ត៌មាននេះនឹងត្រូវធ្វើឡើង។ សកម្មភាពរបស់អង់គ្លេសទាំងអស់នេះនឹងមិនអាចបន្តទុកចោលដោយគ្មានចម្លើយនោះទេ។ នាពេលខាងមុខ យើងនឹងគិតគូរស្វែងរកវិធានការដើម្បីឆ្លើយតបវិញ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ