ភេរវកម្មនៅអ៊ីស្តង់ប៊ុល៖រដ្ឋាភិបាលតួកគីប្រកាសចាប់មនុស្ស ២២នាក់ និងចង្អុលមុខពួក PKK
នៅក្នុងប្រទេសតួកគី អំពើភេរវកម្មក្នុងទីក្រុងអ៊ីស្តង់ប៊ុលនារសៀលថ្ងៃអាទិត្យ ទី១៣ វិច្ឆិកាបានបណ្តាលឲ្យស្លាប់មនុស្សយ៉ាងតិច ៦នាក់ និងរបួសចំនួន ៨១នាក់។ នៅព្រឹកព្រលឹមថ្ងៃចន្ទ ទី១៤ វិច្ឆិកា រដ្ឋមន្រ្តីក្រសួងមហាផ្ទៃលោកស៊ូឡេម៉ាន់ សូលូបានប្រកាសពីការចាប់ខ្លួនជនសង្ស័យចំនួន ២២នាក់ ក្នុងនោះមានស្រ្តីវ័យក្មេងម្នាក់ដែលជាប់សង្ស័យជាអ្នកដាក់គ្រាប់បែក។ លោកសូលូមិនបានបញ្ជាក់ពីអត្តសញ្ញាណរបស់ស្រ្តីវ័យក្មេងនោះទេ។ តែបើតាមរដ្ឋមន្រ្តីក្រសួងយុត្តិធម៌លោកបេកៀរ បុងដា ស្រ្តីវ័យក្មេងអ្នកដាក់គ្រាប់បែករូបនោះជាជនជាតិស៊ីរី។ យ៉ាងណាក៏ដោយ រដ្ឋមន្រ្តីក្រសួងមហាផ្ទៃលោកស៊ូឡេម៉ាន់ សូលូបានចោទកម្លាំងគួដឌីស្ថាន YPG ដែលជាសម្ព័ន្ធមិត្តរបស់គណបក្សពលករគួដឌីស្ថាន PKK (ប៉េកាកា) ថាជាអ្នករៀបចំអំពើភេរវកម្មនោះ។ តើមានហេតុផលអ្វីដែលរដ្ឋាភិបាលតួកគីចង្អុលមុខ PKK និងថា តើភេរវកម្មនេះអាចជាស្នាដៃរបស់ PKK ដែល ឬទេ?។
ចុះផ្សាយនៅថ្ងៃ៖
ស្តាប់ - ០១:៣៤
« ជាការសង្ស័យមួយនៅក្នុងចំណោមការសង្ស័យផ្សេងៗទៀត ព្រោះជាទូទៅនៅតួកគី អំពើភេរវកម្មដែលបានកើតមាននារយៈពេលប៉ុន្មានឆ្នាំចុងក្រោយនេះបានបង្កឡើងដោយក្រុមជីហាតអង្គការរដ្ឋអ៊ីស្លាម ឬមួយដោយក្រុមអង្គការភេរវនិយមផ្សេងៗ។ ជាទូទៅ គឺមិនច្បាស់ជាស្នាដៃរបស់គណបក្សពលករគួដឌីស្ថាន PKK ផ្ទាល់ទេ មានន័យថា ច្រើនបង្កឡើងដោយក្រុមអង្គការភេរវកម្មដែលមានជាប់ពាក់ព័ន្ធតិច ឬច្រើននឹងពួក PKK។
ដូច្នេះអ្វីដែលរដ្ឋាភិបាលតួកគីបានលើកឡើងអាចជាការសង្ស័យមួយ។ តែគេត្រូវរង់ចាំមើលថា តើអ្វីទៅជាប្រភពព័ត៌មានពិតប្រាកដដែលរដ្ឋមន្រ្តីមហាផ្ទៃកំពុងមានក្នុងដៃ។ បើតាមរូបរដ្ឋមន្រ្តីមហាផ្ទៃដដែល អំពើភេរវកម្មនេះត្រូវបានបញ្ជាចេញពីតំបន់កូបាណេដែលស្ថិតជាប់ព្រំដែនរវាងប្រទេសតួកគី និងប្រទេសស៊ីរី។ តំបន់កូបាណេនេះធ្លាប់បានកាន់កាប់ដោយចលនា YPG ដែលជាសាខារបស់ពួក PKK កាលពីឆ្នាំ ២០១៤ និង ២០១៥ នៅក្នុងសង្រ្គាមប្រឆាំងនឹងពួកជីហាតអង្គការរដ្ឋអ៊ីស្លាម។
ដូច្នេះគេត្រូវរង់ចាំមើលថាតើការលើកឡើងរបស់រដ្ឋមន្រ្តីមហាផ្ទៃត្រូវបានបញ្ជាក់ ឬអត់ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ