ភេរវកម្មនៅតួកគី៖ ដឹងខ្លះពីអត្តសញ្ញាណជនដៃដល់ តែចាប់មិនទាន់បាន
សមត្ថកិច្ចតួកគី បានបង្ហើបខ្លះពីអត្តសញ្ញាណរបស់ជនដៃដល់ ដែលបានប្រព្រឹត្តិអំពើភេរវកម្ម នៅយប់ថ្ងៃឆ្លងឆ្នាំសកល ដោយបានផ្តាច់ជីវិតមនុស្ស៣៩នាក់ នៅក្នុងក្លឹបកំសាន្តរាត្រីមួយ ក្នុងក្រុងអ៊ីស្តង់ប៊ូលប្រទេសតួកគី។ តាមការផ្សាយរបស់បណ្តាញព័ត៌មានតួកគី ជនដៃដល់ អាចមានដើមកំណើតមកពីប្រទេសអាស៊ីកណ្តាល ហើយអាចជាសមាជិករបស់ក្រុមជីហាដអង្គការរដ្ឋអ៊ីស្លាម នៅស៊ីរី នឹងជាមនុស្សដែលមានបទពិសោធន៍ខ្ពស់ ក្នុងការប្រើប្រាស់អាវុធ។
ចុះផ្សាយនៅថ្ងៃ៖
ស្តាប់ - ០២:៣៨
ជនដៃដល់ នៃអំពើភេរវកម្មកាលពីយប់ថ្ងៃ៣១ធ្នូ នៅក្រុងអ៊ីស្តង់ប៊ូល នៅមិនទាន់ចាប់បាននៅឡើយទេ តែព័ត៌មានស្តីពីអត្តសញ្ញាណរបស់ជននេះ ត្រូវបានគេស្រាវជ្រាវដឹងកាន់តែច្រើន។ រូបថតជាច្រើន ត្រូវបានគេផ្សព្វផ្សាយ ហើយបើតាមការសន្និដ្ឋាន ជនដៃដល់ គឺជាបក្សពួករបស់ក្រុមជីហាតអង្គការរដ្ឋអ៊ីស្លាម ដែលមានមូលដ្ឋាននៅប្រទេសស៊ីរី។ ស្នាមម្រាមដៃ ត្រូវបានគេស្រង់បាន តែយ៉ាងណា អាជ្ញាធរតួកគី ទទួលស្គាល់ថា ការស៊ើបអង្កេត មានការលំបាកខ្លាំង។
អជ្ញាធរតួកគីសន្និដ្ឋានថា ភេរវជន មិនមែនជាមនុស្សសាមញ្ញទេ តែជាមនុស្សដែលបានទទួលការហ្វឹកហាត់ ពីរបៀបប្រើប្រាស់អាវុធយ៉ាងស្ទាត់ជំនាញ។ ជាក់ស្តែងក្នុងពេលធ្វើប្រតិបត្តិការ ជននេះបានប្រើកាំភ្លើង Fusil d’assaut ដែលមានដាក់គ្រាំដល់ទី២បង់ព្រមគ្នា ដើម្បីកុំឲ្យខាតពេល។ មួយវិញទៀត ជនដៃដល់ បានបាញ់តំរង់ ទៅលើជនរងគ្រោះសំដៅលើទ្រូង ដែលធ្វើឲ្យជនរងគ្រោះអាចស្លាប់មួយរំពេច។
តាមការចុះផ្សាយរបស់សារព័ត៌មានតួកគី Hürriyetបានឲ្យដឹងថា ជនដៃដល់អាចមានដើមកំណើតមកពីប្រទេសអាស៊ីកណ្តាល ដូចជា កៀកហ្ស៊ីស្ថាន រឺក៏អូសបេកគីស្ថានជាដើម។ លោករដ្ឋមន្ត្រីក្រសួងការបរទេសកៀកហ្ស៊ីស្ថាន បានថ្លែងថា លោកមិនជឿថាជនដៃដល់ ដែលគេកំពុងតាមរក គឺជាជនជាតិកៀកហ្ស៊ីស្ថានទេ តែយ៉ាងណាក៏ដោយ អាជ្ញាធរប្រទេសលោក កំពុងតែខិតខំជួយសហការ ក្នុងការតាមរក។
សូមរំលឹកថា ភេរវកម្មនៅក្នុងក្លឹបរាត្រីយប់ថ្ងៃឆ្លងឆ្នាំ នៅកណ្តាលក្រុងអ៊ីស្តង់ប៊ូល បានផ្តាច់ជីវិតមនុស្ស៣៩នាក់។ នៅវេលាម៉ោង ប្រមាណជា១ និង១៥នាទី រំលងអាធ្រាត្រ ជនដៃដល់ប្រដាប់ដោយកាំភ្លើង បានបាញ់សម្លាប់អ្នកយាមពីរនាក់នៅមាត់ទ្វារ រួចបានចូលទៅខាងក្នុង បាញ់រះសម្លាប់មនុស្សយ៉ាងសាហាវ មុននឹងរត់គេចខ្លួន។
រហូតមកទល់ពេលនេះ អជ្ញាធរតួកគី បានចាប់ឃាត់ខ្លួន មនុស្ស១៦នាក់ ដោយក្នុងនោះ មាន២នាក់ ជាជនបរទេស ដែលទើបតែត្រូវបានចាប់ខ្លួន កាលពីថ្ងៃអង្គារ ទី៣មករា។ ដោយឡែក ទីភ្នាក់ងារព័ត៌មាន Dogan របស់តួកគី បានផ្សាយថា ជនដៃដល់ បានបន្លំខ្លួនមករស់នៅក្នុងក្រុងKonya ភាគខាងត្បូងតួកគី ជាមួយប្រពន្ធនិងកូនពីរនាក់។ ប្រពន្ធរបស់ជននេះ ក៏ស្ថិតក្នុងចំណោមមនុស្សដែលគេចាប់ខ្លួននេះដែរ។
យោងតាមសារព័ត៌មានHürriyet ដដែល បានឲ្យដឹងថា សមត្ថកិច្ចតួកគី ចង់ចាប់ជនដៃដល់ឲ្យបានទាំងរស់ ដើម្បីអាចមានឱកាសសួរចំលើយ ហើយឈានទៅបំបែកសំបុករបស់ពួកវា។ អជ្ញាធរតួកគី ជឿថា ជនដៃដល់ គឺជាបក្សពួកតែមួយរបស់ក្រុមភេរវករ ដែលបានដាក់គ្រាប់បែកបំផ្ទុះនៅព្រលានយន្តហោះក្រុងអ៊ីស្តង់ប៊ូល កាលពីខែមិថុនាឆ្នាំ២០១៦ ដែលបានសម្លាប់មនុស្ស៤៧នាក់។ ក្នុងឆ្នាំ២០១៦កន្លងមកនេះ តួកគី បានក្លាយជាទីតាំងប្រព្រឹត្តិអំពើភេរវកម្មធំបំផុត របស់ពួកជីហាតអង្គការរដ្ឋអ៊ីស្លាម។ ក្រុមជីហាតដ៏ព្រៃផ្សៃនេះ ធ្លាប់បានចោទតួកគីថា ជាប្រទេសអ៊ីស្លាម ដែលក្បត់ព្រះអាឡា ព្រោះបានចូលដៃជាមួយពួកប្រទេសកាន់សាសនាគ្រិស្ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ