សង្គ្រាមអ៊ុយក្រែន ៖ តំបន់គ្រីមេ ផ្ទាំងស៊ីបថ្មីនៃការវាយប្រហារដោយដ្រូន
ធ្លាក់ក្នុងកណ្តាប់ដៃរុស្ស៊ី តាំងពីឆ្នាំ២០១៤មក តែអ៊ុយក្រែនចិញ្ចឹមចិត្តចង់ដណ្តើមយកមកវិញ តំបន់យុទ្ធសាស្ត្រគ្រីមេ កំពុងក្លាយជាទិសដៅនៃការវាយប្រហារដោយដ្រូន។ ប៉ុន្តែបើតាមអាជ្ញាធរមូលដ្ឋានស្និទ្ធនឹងរុស្ស៊ី ការវាយប្រហារមិនបានបង្កឱ្យមានការខូចខាតធ្ងន់ធ្ងរទេ។
ចុះផ្សាយនៅថ្ងៃ៖
ស្តាប់ - ០២:០៦
នៅក្នុងសារទីមួយ អភិបាលក្រុងSébastopol ដែលបន្តុបដោយរុស្ស៊ី បានជូនដំណឹងអំពីការវាយប្រហារដោយដ្រូនមកលើតំបន់គ្រីមេ និងបានអំពាវនាវឱ្យប្រជាពលរដ្ឋរក្សាភាពស្ងប់ស្ងាត់ ព្រោះកងកម្លាំងការពារអាកាសកំពុងបញ្ចេញសកម្មភាពទប់ទល់ហើយ។ ក្នុងសារទីពីរ ដោយមិនបញ្ជាក់អំពីស្ថានភាពរងគ្រោះដល់ជីវិតមនុស្សនិងការខូចខាតប៉ះពាល់ដល់រចនាសម្ព័ន្ធស៊ីវិល លោកអភិបាលក្រុងដដែលនេះបានអះអាងថា ក្រុមការពារដែនអាកាសកម្ចាត់ដ្រូនបានពីរគ្រឿង នៅក្បែរមជ្ឈមណ្ឌលអគ្គីសនីBalaklava ដែលយោធាអ៊ុយក្រែនធ្លាប់វាយប្រហារពីមុន។
សម្រាប់អាជ្ញាធរគ្រីមេស្និទ្ធនឹងរុស្ស៊ី ក្រុងកំពង់ផែដែលមានមូលដ្ឋានទ័ពជើងទឹករុស្ស៊ីផង រងការវាយប្រហារដោយដ្រូន តាំងពីចុងខែតុលាមក និងជាការវាយប្រហារយ៉ាងសន្ធាប់ពីសំណាក់កងកម្លាំងយោធាអ៊ុយក្រែន។ កាលពីសប្តាហ៍មុន អាជ្ញាធរគ្រីមេ បានប្រកាសពង្រឹងកម្លាំងរបស់ខ្លួន បន្ទាប់ពីកងកម្លាំងអ៊ុយក្រែនដណ្តើមយកក្រុងនិងតំបន់ឃែរសុនមកវិញ។
បន្ទាប់ពីបំផ្លាញនាវាយោធារុស្ស៊ី និងយកជ័យជំនះនៅលើសមរភូមិ រហូតជំរុញរុស្ស៊ីឱ្យដកថយជាច្រើនសមរភូមិនៅភាគខាងត្បូងប្រទេស កងកម្លាំងយោធាអ៊ុយក្រែន ដែលកំពុងរុលទៅមុខទៅជានិច្ច មានមហិច្ឆតាដណ្តើមយកតំបន់គ្រីមេដែលធ្លាក់ក្នុងកណ្តាប់ដៃរុស្ស៊ី នៅឆ្នាំ២០១៤មកវិញ។ នៅលើសមរភូមិ ទាហានអ៊ុយក្រែន និងរុស្ស៊ីបន្តប្រយុទ្ធគ្នានៅពេលនេះ នៅត្រង់ដីចុងប៉ូចបំផុត មានបីភូមិ មុននឹងឈានដល់រំដោះបានទាំងស្រុងតំបន់ Mikolaïvភាគខាងត្បូង។
លើផ្នែកការទូតវិញ រដ្ឋមន្ត្រីការបរទេសអ៊ុយក្រែន បានអំពាវនាវឱ្យសហភាពអឺរ៉ុប ដាក់ទណ្ឌកម្មថ្មីប្រឆាំងនឹងរុស្ស៊ី និងកុំឱ្យទម្លាក់ដៃឱ្យសោះ ព្រោះអ៊ុយក្រែនផ្ទាល់មិនហត់ទេ។ ប៉ុន្តែ ក្នុងពេលក្រុមលោកខាងលិច ចោទថារុស្ស៊ីកំពុងគំរាមធ្វើសង្គ្រាមនុយក្លេអ៊ែរ ដើម្បីជំរុញបស្ចិមលោកឈប់គាំទ្រអ៊ុយក្រែន ពីប្រទេសម៉ារ៉ុក អគ្គលេខាធិការអង្គការសហប្រជាជាតិ បានព្រមានថាអំពីគ្រោះថ្នាក់នៃការបង្កើនភាពតានតឹងនុយក្លេអ៊ែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ