អ៊ុយក្រែន និងរុស្ស៊ីចោទគ្នាទៅវិញ ទៅមកថា បាញ់ផ្លោងដាក់រោងចក្រនុយក្លេអ៊ែរហ្សាប៉ូរីចា
មជ្ឈមណ្ឌលនុយក្លេអ៊ែរហ្សាប៉ូរីចា របស់អ៊ុយក្រែន ដែលកំពុងស្ថិតក្រោមការកាន់កាប់របស់កងទ័ពរុស្ស៊ី បានក្លាយជាផ្ទាំងស៊ីបរបស់គ្រាប់ផ្លោង កាលពីថ្ងៃអាទិត្យ។ ទីភ្នាក់ងារថាមពលបរិមាណូអន្តរជាតិបានព្រមានភ្លាមពីគ្រោះថ្នាក់មហន្តរាយជីវិតមនុស្សដ៏ធំធេង។ ចំណែកអ៊ុយក្រែន និងរុស្ស៊ី ដូចលើកមុនៗ បាននិយាយចង្អុរមុខ ចោទដាក់គ្នាទៅវិញទៅមកថា ជាអ្នកបាញ់គ្រាប់ផ្លោងសំដៅរោងចក្រនុយក្លេអ៊ែរហ្សាប៉ូរីចា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤០
នៅក្នុងសេចក្តីថ្លែងការណ៍កាលពីថ្ងៃអាទិត្យ ទីភ្នាក់ងារថាមពលនុយក្លេអ៊ែរអន្តរជាតិហៅកាត់ភាសាបារាំង AIEA បានលើកឡើងពីកម្លាំងផ្ទុះ នៅក្នុងបរិវេណរោងចក្រនុយក្លេអ៊ែរហ្សាប៉ូរីចា ដែលជាមជ្ឈមណ្ឌលនុយក្លេអ៊ែរធំជាងគេនៅអឺរ៉ុប។ សម្រាប់ប្រធានទីភ្នាក់ងារAIEA លោករ៉ាហ្វាអែល ហ្រ្កូស៊ី ហេតុការណ៍ផ្ទុះ នៅទីតាំងរោងចក្រនុយក្លេអ៊ែរ គឺជារឿងមិនអាចទទួលយកបានឡើយ។
ប្រធានទីភ្នាក់ងារAIEA ធ្លាប់បានព្រមានពីគ្រោះហានិភ័យនាំឲ្យមានគ្រោះថ្នាក់នុយក្លេអ៊ែរ ធ្ងន់ធ្ងរ បន្ទាប់ពី មជ្ឈមណ្ឌលនុយក្លេអ៊ែរនៅហ្សាប៉ូរីចា បានក្លាយជាផ្ទាំងស៊ីបនៃការវាយប្រហារ នៅក្នុងសង្រ្គាមអ៊ុយក្រែន។ នៅថ្ងៃអាទិត្យ លោករ៉ាហ្វាអែល ហ្រ្កូស៊ីមិនបានបញ្ជាក់អ្នកទទួលខុសត្រូវលើសំឡេងផ្ទុះនៅ រោងចក្រនុយក្លេអ៊ែរ អ៊ុយក្រែន។ ប៉ុន្តែ ភាគីរុស្ស៊ី និងអ៊ុយក្រែនបានចោទប្រកាន់គ្នាទៅវិញ ទៅមក តាំងពីព្រឹកព្រលឹមថ្ងៃអាទិត្យ។
នៅក្នុងសេចក្តីថ្លែងការណ៍ របស់ក្រសួងការពារជាតិរុស្ស៊ី គេបានទម្លាក់កំហុស ដាក់របបអ៊ុយក្រែនថា មិនព្រមឈប់ញុះញង់ ដើម្បីបង្កើតការគំរាមកំហែង គ្រោះមហន្តរាយធំធេងនៅរោងចក្រនុយក្លេអ៊ែរ។ តាមក្រសួងការពារជាតិ រុស្ស៊ី តាំងពីយប់ថ្ងៃសៅរ៍ ឈានចូលដល់ថ្ងៃអាទិត្យ កងទ័ពអ៊ុយក្រែនបានបាញ់ជាង២០គ្រាប់សំដៅរោងចក្រនុយក្លេអ៊ែរហ្សាប៉ូរីចា ដែលនៅក្នុងនោះ គ្រាប់ផ្លោងមួយចំនួនបានផ្ទុះធ្លាក់នៅចន្លោះប្លុក ម៉ាស៊ីនប្រតិករ ទី៤ និងទី៥ និងមួយចំនួនទៀតបានសំដៅដំបូលអគារពិសេស ដែលមានផ្ទុកដាក់ឥន្ធនៈនុយក្លេអ៊ែរ។
យ៉ាងណាក៏ដោយ តាមប្រធានក្រុមហ៊ុនរោងចក្រនុយក្លេអ៊ែររុស្ស៊ី ដកស្រង់សំដីដោយទីភ្នាក់ងារព័ត៌មានរុស្ស៊ី TASSការវាយប្រហារនៅចុងសប្តាហ៍មិនបានធ្វើឲ្យមានបែកលេចធ្លាយធាតុវិទ្យុសកម្ម។
ភាគីអ៊ុយក្រែន តាមរយៈ ទីភ្នាក់ងារថាមពលនុយក្លេអ៊ែរជាតិ បានចោទប្រកាន់កងទ័ពរុស្ស៊ីថា ជាអ្នកបាញ់ផ្លោងទៅលើទីតាំងរោងចក្រនុយក្លេអ៊ែរអគ្គិសនី ហ្សាប៉ូរីចា នៅព្រឹកថ្ងៃអាទិត្យ។ តាមប្រធានក្រុមហ៊ុននុយក្លេអ៊ែរអ៊ុយក្រែន ការវាយប្រហាររបស់ទាហានរុស្ស៊ីបានបំផ្លាញហេដ្ឋារចនាសម្ព័ន្ធ ដែលចាំបាច់សម្រាប់ដំណើរការផលិតអគ្គិសនីរបស់រោងចក្រនុយក្លេអ៊ែរហ្សាប៉ូរីចា។
ចាប់តាំងពីខែតុលា កងទ័ពរុស្ស៊ីបានសំរុកវាយប្រហារ បាញ់ផ្លោងគ្រាប់មីស៊ីល ទៅលើហេដ្ឋារចនាសម្ព័ន្ធស៊ីវីល ចាំបាច់ជាច្រើនរបស់អ៊ុយក្រែន ដែលភាគច្រើនគឺជារោងចក្រផលិតចរន្តអគ្គិសនី បណ្តាញខ្សែភ្លើង និងបណ្តាញផ្គត់ផ្គង់ទឹកស្អាតរបស់អ៊ុយក្រែន។ នៅថ្ងៃសុក្រទី ១៨វិច្ឆិកា ប្រធានាធិបតីអ៊ុយក្រែនបាននិយាយថា ការវាយប្រហាររបស់រុស្ស៊ីបានធ្វើឲ្យប្រជាជនអ៊ុយក្រែន ប្រមាណ១០លាននាក់ គ្មានអគ្គិសនីប្រើប្រាស់ ក្នុងខណៈពេលសីតុណ្ហភាពនៅអ៊ុយក្រែន ចាប់ផ្តើមធ្លាក់ក្រោមសូន្យ នៅមុនរដូវរងា។
មជ្ឈមណ្ឌលនុយក្លេអ៊ែរហ្សាប៉ូរីចា បានធ្លាក់ក្រោមការកាន់កាប់របស់កងទ័ពរុស្ស៊ី តាំងពីខែមីនា ពោលគឺនៅប៉ុន្មានថ្ងៃក្រោយ រុស្ស៊ីចូលធ្វើសង្រ្គាមឈ្លានពានអ៊ុយក្រែន។ រុស្ស៊ី និងអ៊ុយក្រែនធ្លាប់ចោទប្រកាន់គ្នាទៅវិញ ទៅមកថា ជាអ្នកទទួលខុសត្រូវលើការវាយប្រហារលើមណ្ឌលនុយក្លេអ៊ែរហ្សាប៉ូរីចា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ