អង្គការសហប្រជាជាតិស្វែងរកជំនួយមនុស្សធម៌ ៥១ពាន់លានអឺរ៉ូ សម្រាប់ឆ្នាំ២០២៣
នៅថ្ងៃព្រហស្បតិ៍ទី ១ធ្នូនេះ អង្គការសហប្រជាជាតិបានចាប់ផ្តើមប្រកាសស្វែងរកជំនួយមនុស្សធម៌ សម្រាប់ឆ្នាំ២០២៣។ ដោយហេតុសង្គ្រាមនៅអ៊ុយក្រែន និងការប្រែប្រួលអាកាសធាតុ ភ្នាក់ងារអង្គការសហប្រជាជាតិប៉ាន់ប្រមាណថាពិភពលោកត្រូវថវិកាដល់ទៅ ៥១,៥ពាន់លានអឺរ៉ូ សម្រាប់ជួយប្រជាពលរដ្ឋរងគ្រោះនៅលើពិភពលោក។ ជាមូលនិធិដ៏ច្រើនខ្លាំងណាស់ និងមិនធ្លាប់មានទេ។
ចុះផ្សាយនៅថ្ងៃ៖
ស្តាប់ - ០២:០៤
គម្រោងជំនួយមនុស្សធម៌ឆ្នាំ២០២៣ ជាកម្មវិធីដ៏ធំកំរិតពិភពលោកមិនធ្លាប់មានទេ ហើយត្រូវការថវិកាច្រើនខ្លាំង ដល់ទៅ ៥១,៥ពាន់លានអឺរ៉ូ ដើម្បីសង្គ្រោះជនរងគ្រោះជាងគេបំផុតចំនួន ២៣០លាននាក់ នៅក្នុងប្រទេសចំនួន ៦៨។ សេចក្តីត្រូវការនេះមានទំហំច្រើនជាងឆ្នាំមុន២៥% ប៉ុន្តែនៅមិនទាន់អាចជួយគ្រប់ជនរងគ្រោះទេ។ នេះបើតាមការប្រសាសន៍របស់លោក Martin Griffiths ប្រធានភ្នាក់ងារមនុស្សធម៌អង្គការសហប្រជាជាតិ ដែលបញ្ជាក់ថា មានមនុស្សដល់ទៅ ៣៣៩លាននាក់ នៅលើពិភពលោក ត្រូវការជំនួយមនុស្សធម៌បន្ទាន់នៅឆ្នាំក្រោយ ទល់នឹង២៧៤លាននាក់នៅឆ្នាំ ២០២២។
បើតាមអង្គការសហប្រជាជាតិ ការស្វះស្វែងរកជំនួយមនុស្សដ៏ច្រើន ជាកញ្ចក់ឆ្លុះបញ្ចាំងឱ្យឃើញអំពីស្ថានភាពដ៏អាក្រក់របស់ពិភពលោក។
តម្រូវការមនុស្សធម៌ បានស្គាល់កំណើនដល់កំពូលតាំងពីផ្ទុះរោគរាតត្បាតកូវីដ១៩មក និងមិនដែលថយចុះទេ តាំងពីពេលនោះមក។ ក្រៅអំពីវិបត្តិកូវីដ ភាពរាំងស្ងួត ទឹកជំនន់ ដែលបង្កឡើងដោយការប្រែប្រួលអាកាសធាតុនិងធ្វើឱ្យមានគ្រោះទុរ្ភិក្ស សង្គ្រាមអ៊ុយក្រែន បានធ្វើឱ្យតំបន់អឺរ៉ុបមួយផ្នែកក្លាយជាសមរភូមិ។ ជាសរុបមានមនុស្សជាង១០០លាននាក់ ត្រូវធ្វើបំលាស់ទី។ យ៉ាងហោចជាង២២២លាននាក់ រស់ក្នុង៥៣ប្រទេសប្រឈមនឹងអស្ថិរភាពស្បៀងអាហាររ៉ាំរ៉ៃនៅចុងឆ្នាំ ២០២២។ ៤៥លាននា់ ក្នុង៣៧ប្រទេស មានហានិភ័យស្លាប់ដោយគ្រោះអត់ឃ្លាន។ អាហ្វហ្កានីស្ថាន អេត្យូពី ហាវៃ សូម៉ាលី និងស៊ូដង់ ធ្លាក់ក្នុងស្ថានភាពដែលអាចហៅថាគ្រោះទុរ្ភិក្សបាន ព្រោះមានមនុស្សស្លាប់ដោយធ្វើបំលាស់ទី និងដោយអត់អាហារ។
នៅឆ្នាំ២០២២ ភ្នាក់ងារប្រមូលជំនួយមនុស្សធម៌ត្រឹមតែ៤៧%នៃគម្រោង (មិនមែនដល់៦០ទៅ៦៥%ដូចឆ្នាំមុនៗទេ) តែសង្ឃឹមថាឆ្នាំ២០២៣ ពិភពលោកមានសាមគ្គីភាពជាងមុន។ នេះបើតាមការទទូចរបស់អង្គការសហប្រជាជាតិដោយបញ្ជាក់ថា ស្ថាប័នមានឱនភាពជំនួយ៥៣% ដែលជំរុញឱ្យអង្គការមនុស្សធម៌បង្ខំចិត្តផ្តល់ជំនួយដោយរើសមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ