សមត្ថកិច្ចអាល្លឺម៉ង់បំបែកបណ្តាញស្តាំជ្រុលនិយម ដែលប៉ុនប៉ងវាយប្រហារដោយអាវុធនៅរដ្ឋសភា
កាលពីថ្ងៃពុធ ទី៧ធ្នូ សមត្ថកិច្ចនគរបាលអាល្លឺម៉ង់ ដោយទទួលបានការបង្គាប់ពីរដ្ឋអាជ្ញា បានបំបែកក្រុមបណ្តាញស្តាំនិយមជ្រុល ដែលមានគម្រោងប៉ុនប៉ងធ្វើរដ្ឋប្រហារ តាមរយៈការវាយប្រហារដោយអាវុធ ទៅលើស្ថាប័នរដ្ឋអាល្លឺម៉ង់ ដែលមានជាអាទិ៍រដ្ឋសភាអាល្លឺម៉ង់។ ក្នុងចំណោមមនុស្ស២៥នាក់ ដែលត្រូវបានចាប់ខ្លួន គឺមានម្នាក់ដែលត្រូវគេសង្ស័យថា អាចមានទំនាក់ទំនងជាមួយចារកិច្ចរុស្ស៊ីផងដែរ។
ចុះផ្សាយនៅថ្ងៃ៖
ស្តាប់ - ០២:៤៧
យោងតាមការចុះផ្សាយរបស់បណ្តាញព័ត៌មានអាល្លឺម៉ង់ ប្រតិបត្តិការចុះបង្ក្រាបបំបែកបណ្តាញស្តាំនិយមជ្រុល កាលពីថ្ងៃពុធ គឺជាប្រតិបតិ្តការដ៏ធំបំផុត របស់សមត្ថកិច្ចអាល្លឺម៉ង់។ នគរបាលប្រមាណ៣០០០នាក់ បានចេញប្រតិបត្តិការ ហើយការចុះឆែកឆេរ ត្រូវបានធ្វើនៅទូទាំងប្រទេស ចំនួន១៣០ទីតាំង ដើម្បីរឹបអូសភស្តុតាង និងចាប់ខ្លួនមនុស្សសរុប២៥នាក់ នៅព្រឹកព្រលឹមថ្ងៃពុធ ទី៧ធ្នូ។ ប្រតិការចាប់ខ្លួនបានធ្វើឡើងផងដែរ នៅអ៊ីតាលី និងនៅអូទ្រីស។
យោងតាមរដ្ឋអាជ្ញាអាល្លឺម៉ង់ ទទួលបន្ទុកការស៊ើបអង្កេតសំណុំរឿងនេះ គឺបណ្តាញស្តាំជ្រុលនិយមដែលត្រូវបានបង្ក្រាប គឺជាក្រុមមនុស្ស ដែលឃោសនាប្រឆាំងនឹងរបបដឹកនាំបែបប្រជាធិបតេយ្យ ព្រមទាំងប្រឆាំងចំពោះអំណាចស្ថាប័នរដ្ឋអាល្លឺម៉ង់។ លោកស្រី Nancy Faeser លើកឡើងថា ក្រុមជ្រុលនិយមរវើរវាយនេះ មានកម្រោងជាក់ច្បាស់ ប្រើប្រាស់ក្រុមប្រដាប់អាវុធមួយក្តាប់តូចរបស់ខ្លួន ចូលទៅវាយប្រហារនៅតាមស្ថាប័នរដ្ឋធំៗ ដែលមានដូចជាអាគាររដ្ឋសភាអាល្លឺម៉ង់ជាដើម។
ក្នុងចំណោមមនុស្ស២៥នាក់ដែលត្រូវបានចាប់ខ្លួន គឺមានជាអាទិ៍ បុរសចំណាស់ម្នាក់អាយុជាង៧០ឆ្នាំ ឈ្មោះ Reuss ដែលគេស្គាល់ថាជាអ្នកជាប់ខ្សែស្រឡាយ វង្សត្រកូលអតីតស្តេចនៅតំបន់ Thuringe ភាគខាងលិចអាល្លឺម៉ង់។ ក្រៅពីនេះ មានអតីតវរសេនីត្រីដឹកនាំក្រុមឆ័ត្រយោង នៃកងទ័ពអាល្លឺម៉ង់ម្នាក់ផង។ ស្ត្រីអតីតសមាជិកសភា បក្សស្តាំនិយមជ្រុលម្នាក់ ក៏មានឈ្មោះក្នុងចំណោមអ្នកត្រូវបានគេចាប់ខ្លួនដែរ។ បន្ថែមពីនេះ មនុស្ស២៧នាក់ផ្សេងទៀត កំពុងប្រឈមនឹងដីការចាប់ខ្លួន។
ដោយឡែក រដ្ឋអាជ្ញាអាល្លឺម៉ង់ អះអាងថាគេបានចាប់ខ្លួនមេក្លោងដែលរៀបគម្រោង វាយប្រហារប្រដាប់អាវុធនៅសភាអាល្លឺម៉ង់នេះ ដែលជាស្ត្រីជនជាតិរុស្ស៊ីម្នាក់។ តាមការសង្ស័យរបស់សមត្ថកិច្ច ស្ត្រីរូបនេះ បានព្យាយាមទាក់ទងជាមួយអាជ្ញាធររុស្ស៊ី ដើម្បីឲ្យជួយទំនុកបម្រុងគាំទ្រផែនការឧក្រិដ្ឋរបស់ខ្លួន។ យ៉ាងណាក៏ដោយ ស្ថានទូតរុស្ស៊ីប្រចាំក្រុងប៊ែរឡាំង បានបដិសេធច្រានចោលទាំងស្រុង ថាខ្លួនគ្មានអ្វីពាក់ព័ន្ធ ជាមួយបណ្តាញស្តាំនិយមជ្រុលអាល្លឺម៉ង់នេះទេ។
សូមបញ្ជាក់ថា នេះមិនមែនជាលើកទី១ទេ ដែលសមត្ថកិច្ចអាល្លឺម៉ង់ បានបើកប្រតិបត្តិការបំបែកក្រុមស្តាំនិយមជ្រុល ដែលប៉ុនប៉ងធ្វើសកម្មភាពហិង្សា ប្រឆាំងនឹងអាជ្ញាធររដ្ឋ ក៏ដូចជារបបលទ្ធិប្រជាធិបតេយ្យ។ បណ្តាញជ្រុលនិយមបែបរវើរវាយនេះ មានមនុស្សគាំទ្រដើរតាមយ៉ាងហោច២ម៉ឺននាក់ នៅអាល្លឺម៉ង់។ អាជ្ញាធរអាល្លឺម៉ង់ ចាត់ទុកការគំរាមកំហែងពីសំណាក់ក្រុមនេះ ថាធ្ងន់ធ្ងរនិងគ្រោះថ្នាក់ខ្លាំងជាងក្រុមភេរវកម្មជីហាតទៅទៀត។ កាលពីពាក់កណ្តាលឆ្នាំនេះ សមត្ថកិច្ចអាល្លឺម៉ង់ បានចាប់ខ្លួនសមាជិកក្រុមស្តាំនិយមជ្រុលមួយទៀត ដែលប៉ុនប៉ងចាប់ខ្លួនលោករដ្ឋមន្ត្រីក្រសួងសុខាភិបាលអាល្លឺម៉ង់ ព្រោះលោកជាអ្នកចេញវិធានការរឹតត្បិត ទាក់ទិននឹងកូវីដ១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ