ស៊ែរប៊ី និង កូសូវ៉ូ ប្រឈមមុខដាក់គ្នាថ្មី និងផ្តើមបិទព្រំដែន
នៅអឺរ៉ុប ប្រទេស ស៊ែរប៊ី និង កូសូវ៉ូ បានប្រកាសបិទព្រំដែន ប៉ែកខាងជើង កាលពីថ្ងៃពុធ បន្ទាប់ពីលេចកំហឹងប្រជាជន ប្រមាណជាង ១០ថ្ងៃមកហើយ។ កូសូវ៉ូ តាមរយៈរដ្ឋមន្ត្រីក្រសួងយុត្តិធម៌ បានចោទប្រកាន់ ស៊ែរប៊ី ថាចេះតែរករឿងបង្កហេតុ បង្កអស្ថិរភាព ដោយសំអាងលើ រុស្ស៊ី ជាខ្នងបង្អែក ហើយការយករុស្ស៊ីជាទីអាងនេះ គឺ«ខុសធ្ងន់ហើយ»។ ចំពោះស្ថានការណ៍ប្រឈមមុខដាក់គ្នា រវាង ស៊ែរប៊ី និង កូសូវ៉ូ នៅពេលនេះ ប្រទេស អាល្លឺម៉ង់ បានសម្តែងក្តីព្រួយបារម្ភជាខ្លាំង។
ចុះផ្សាយនៅថ្ងៃ៖
ស្តាប់ - ០២:២២
នៅភាគខាងជើង ស៊ែរប៊ី ប៉ុស្តិ៍ត្រួតពិនិត្យព្រំដែន ចំនួន ២ ក្នុងចំណោម ៥ ត្រូវបិទទ្វារ។ ការបិទច្រកផ្លូវជាដំបូង គឺមកពីពលរដ្ឋស៊ែរប៊ី ផ្តើមយកឡានកាំមីញ៉ុង ទៅបង្ខាំងផ្លូវ ពីរបីថ្ងៃហើយ ទើបភាគី កូសូវ៉ូ សម្រេចចិត្តបិទទ្វារព្រំដែនជាផ្លូវការដែរ។
ឬសគល់នៃបញ្ហា ព្រោះតែ ពលរដ្ឋនៅភាគខាងជើង កូសូវ៉ូ ដែលភាគច្រើនជាជនជាតិដើម ស៊ែរប៊ី មិនពេញចិត្តនឹងការដឹកនាំរបស់រដ្ឋាភិបាលកូសូវ៉ូ ហើយក្នុងចិត្តរបស់ពួកគេក៏មិនដែលទទួលស្គាល់ រដ្ឋបាលក្រុងព្រីស្ទីណា (Pristina) ជារដ្ឋាភិបាល របស់ខ្លួនដែរ។ ពលរដ្ឋនៅភាគខាងជើង កូសូវ៉ូ នេះ មានដើមកំណើតស៊ែរប៊ី ប្រមាណ ៥ ម៉ឺននាក់ នៅតែបន្តទទួលស្គាល់ថា រដ្ឋធានី ប៊ែលហ្គ្រាដ (Belgrade ) របស់ស៊ែរប៊ី គឺជារដ្ឋធានីផ្លូវការរបស់ខ្លួន បើទោះបីជា កូសូវ៉ូ បានទទួលឯករាជ្យ តាំងពីឆ្នាំ ២០០៨ ទៅហើយក្តី។
ក្នុងតំបន់នេះ ប្រមាណ ២អាទិត្យមុន មន្ត្រីប៉ូលីសជាន់ខ្ពស់ម្នាក់ ដើមកំណើតស៊ែរប៊ី ត្រូវអាជ្ញាធរកូសូវ៉ូ ចាប់ខ្លួននិងកាត់ទោស។ ភ្លាមៗ ពួកក្រុមពលរដ្ឋនៅភាគខាងជើងនេះ បានធ្វើបាតុកម្មទាមទារឲ្យដោះលែងវិញ ហើយបណ្តាចៅក្រម រដ្ឋអាជ្ញា និងមន្ត្រីរដ្ឋការជាច្រើននាក់ ក៏បានសម្រុកនាំគ្នាលាឈប់ពីតំណែងដែរ ជាការសម្តែងមតិមិនទទួលស្គាល់ការដឹកនាំរបស់រដ្ឋាភិបាលកូសូវ៉ូ នៅលើតំបន់របស់ខ្លួន។
សញ្ញាណស្ថានការណ៍កាន់តែមិនស្រួល ព្រោះគំនិតប្រកាន់ជាតិសាសន៍និងជាតិនិយម កាន់តែផុសកញ្ជ្រោលឡើង នៅខាងស៊ែរប៊ី។ រដ្ឋមន្ត្រីក្រសួងការពារជាតិស៊ែរប៊ី បានចេញបញ្ជាឲ្យកងទ័ពទាហាន ឋិតនៅក្នុងភាពប្រចាំការជានិច្ច ដើម្បីត្រៀមប្រយុទ្ធ ហើយថ្ងៃពុធដែរ ភាគី រុស្ស៊ី ក៏បានសម្តែងការគាំទ្រ ស៊ែរប៊ី ថែមទៀត ដែលអាចនឹងធ្វើឲ្យស្ថានការណ៍ កាន់តែឡើងក្តៅមួយកម្រិតទៀត។ ចំណែក រដ្ឋាភិបាលក្រុងប៊ែរឡាំង របស់អាល្លឺម៉ង់ ក៏បានសម្តែងក្តីព្រួយបារម្ភ និងថ្កោលទោស ស៊ែរប៊ី ដែលចង់បញ្ឆេះគំនិតជាតិនិយម។
ទន្ទឹមនឹងគ្នានេះដែរ មេបញ្ជាការ លោក Angelo Michele Ristuccia អ្នកតំណាងបេសកម្មរបស់អង្គការអូតង់ ដើម្បីសន្តិភាពនិងសន្តិភាព ដែលឈរជើងលើទឹកដីកូសូវ៉ូ បានអំពាវនាវឲ្យភាគីទាំងពីរទម្លាក់ចោលការអុជអាលគំនិតជាតិនិយម ហើយបញ្ជៀសកំហឹងជាតិសាសន៍ និងវិលទៅរកតុចរចាជជែកគ្នា ទើបមានដំណោះស្រាយសន្តិភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ