ប្រធានាធិបតីកូសូវ៉ូសុខចិត្តចុះពីតំណែង និងប្រគល់ខ្លួនទៅឲ្យតុលាការអន្តរជាតិក្រុងឡាអេ
ប្រធានាធិបតី កូសូវ៉ូ និងមនុស្សជំនិត ៣នាក់ផ្សេងទៀត ត្រូវបានតុលាការទីក្រុងឡាអេ កាលពីយប់ថ្ងៃព្រហស្បតិ៍ម្សិលមិញ សម្រេចដាក់ឃុំ ក្នុងបទចោទប្រកាន់ ប្រព្រឹត្តឧក្រិដ្ឋកម្មសង្រ្គាម ក្នុងអំឡុងសង្រ្គាមប្រយុទ្ធគ្នាជាមួយ កងទ័ពស៊ែរប៊ី កាលពី ៣០ឆ្នាំមុន។ លោក Hashim Thaci អតីតប្រធានផ្នែកនយោបាយរបស់ក្រុមឧទ្ទាមដើម្បីឯករាជ្យកូសូវ៉ូ បានប្រកាសចុះចេញពីតំណែង ប្រធានាធិបតី នៅព្រឹកថ្ងៃ ព្រហស្បតិ៍ មុននឹងធ្វើដំណើរទៅ ទីក្រុងឡាអេ ដើម្បីប្រឈមនឹងការចោទប្រកាន់របស់តុលាការ។
ចុះផ្សាយនៅថ្ងៃ៖
ស្តាប់ - ០២:៣១
តាមសេចក្តីប្រកាសរបស់តុលាការពិសេស នៅទីក្រុងឡាអេ លោកប្រធានាធិបតីកូសូវ៉ូ Hashim Thaci និងជនសង្ស័យបីរូបផ្សេងទៀត ត្រូវបានបញ្ជូនទៅកាន់មន្ទីរឃុំឃាំងរបស់តុលាការ នៅទឹកដីហូឡង់ កាលពីយប់ថ្ងៃព្រហស្បតិ៍។
នៅថ្ងៃព្រហស្បតិ៍ លោក Hashim Thaci ដែលដឹកនាំកូសូវ៉ូ ជាង១០ឆ្នាំ បានសុខចិត្តចុះចេញពីតំណែង និងបានប្រគល់ខ្លួនទៅឲ្យតុលាការអន្តរជាតិ នៅទីក្រុងឡាអេ។ លោកប្រធានាធិបតីកូសូវ៉ូ Hashim Thaci អាយុ ៥២ឆ្នាំ បានអះអាងថា លោកចុះចេញពីតំណែង ដើម្បីរក្សាការពារភាពថ្លៃថ្នូរមុខងារប្រធានាធិបតីកូសូវ៉ូ ពោលគឺនៅបន្ទាប់ពីចៅក្រមរបស់តុលាការអន្តរជាតិទីក្រុងឡាអេ បានសម្រេច ចោទប្រកាន់រូបលោកជាផ្លូវការ កាលពីខែមិថុនាកន្លងទៅ។
នៅក្នុងសន្និសីទកាសែត នៅថ្ងៃព្រហស្បតិ៍ លោក Hashim Thaci និយាយថា វាជាកាលៈទេសៈមួយ ដ៏លំបាក សម្រាប់គ្រួសារ របស់លោក និងអ្នកដែលជឿទុកចិត្តលើលោក នៅក្នុងរយៈពេល ៣ទសវត្សរ៍ នៃការប្រយុទ្ធ ដើម្បីសេរីភាព ឯករាជ្យភាព និងការកសាងជាតិកូសូវ៉ូ។ ប៉ុន្តែ មេក្រុមនយោបាយរបស់ឧទ្ទាមដើម្បីឯករាជ្យកូសូវ៉ូ បានសន្យាដែរថា លោកនឹងសហការជាមួយតុលាការអន្តរជាតិ ពីព្រោះលោកជឿទៅលើការពិត ការផ្សះផ្សារជាតិ និងអនាគតរបស់កូសូវ៉ូ។
តាមកាសែតក្នុងស្រុក លោកប្រធានាធិបតី Hashim Thaci និងជនសង្ស័យបីរូបទៀត ដែលជិតស្និទ្ធនឹងលោក ដូចជា អតីតអ្នកនាំពាក្យ ហើយនិងអតីតប្រធានក្រុមស៊ើបការណ៍សម្ងាត់របស់ពួកឧទ្ទាមជាដើម បានធ្វើដំណើរតាមយន្តហោះយោធាកូសូវ៉ូ នៅទីក្រុងPristina សំដៅទីក្រុងឡាអេ។ អ្នកទាំង៤ ត្រូវគេសង្ស័យថា មានជាប់ពាក់ព័ន្ធនឹងការបាត់ខ្លួន ដោយបង្ខំរបស់អ្នកប្រឆាំងអាល់បានី ការធ្វើទារុណកម្ម និងការសម្លាប់រង្គាលលើជនជាតិស៊ែប៊ី ជនជាតិរ៉ូម នៅក្នុង និងក្រោយសង្រ្គាមកូសូវ៉ូ នៅចុងទសវត្សរ៍ ឆ្នាំ ១៩៩០។
លោកប្រធានាធិបតី Thaci ធ្លាប់បានអះអាងថា លោកគ្មានកំហុស និងថា ដោយ ចោទប្រកាន់រូបលោក តុលាការអន្តរជាតិកំពុងព្យាយាមសរសេរ កែប្រែប្រវត្តិសាស្រ្ត។
សូមបញ្ជាក់ថា នៅក្នុងសង្រ្គាមកូសូវ៉ូ ដែលបានសម្លាប់ មនុស្សជាង ១៣ ០០០នាក់ ដែលភាគច្រើនជាជនជាតិអាល់បានី ក្រុមឧទ្ទាម ដើម្បីឯករាជ្យ កូសូវ៉ូ និងកងទ័ព ស៊ែរប៊ី បានធ្វើសង្រ្គាមប្រយុទ្ធ គ្នា ដោយគ្មានត្រាប្រណី។ អតីតមេដឹកនាំកងទ័ព និងប៉ូលិសស៊ែរប៊ី ធ្លាប់ត្រូវតុលាការអន្តរជាតិទីក្រុងឡាអេ សម្រេចផ្តន្ទាទោសរួចហើយ ក្នុងបទប្រព្រឹត្តឧក្រិដ្ឋកម្ម សង្រ្គាម ដែលនៅក្នុងនោះ ប្រជាជនស៊ីវិលអាល់បានី រាប់ម៉ឺននាក់ ត្រូវបានសម្លាប់ ធ្វើទារុណកម្ម និងផ្លាស់ទី ចេញពីផ្ទះសម្បែង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ