បារាំងសន្យាប្រគល់រថពាសដែកធុនស្រាល ប្រភេទ AMX-10 ទៅឲ្យកងទ័ពអ៊ុយក្រែន
រដ្ឋាភិបាលបារាំង បានប្រកាសកាលពីល្ងាចថ្ងៃពុធ ទី៤មករាថា នឹងប្រគល់រថពាសដែកធុនស្រាល ប្រភេទ AMX ដែលផលិតដោយបច្ចេកវិទ្យាកងទ័ពបារាំង ទៅឲ្យអ៊ុយក្រែន។ លោកប្រធានាធិបតីបារាំង ម៉ាក្រុង បានឆ្លើយតបទៅនឹងសំណើរសុំ របស់ប្រធានាធិបតីអ៊ុយក្រែន ដើម្បីបង្កើនសមត្ថភាព និងសន្ទុះយកឈ្នះលើកងទ័ពរុស្ស៊ី។ គួរបញ្ជាក់ថា បារាំងផ្តល់ជាជំនួយរថពាសដែក បំពាក់ដោយកាណុងកាំភ្លើង ទៅឲ្យអ៊ុយក្រែននេះ វាគឺជាការបោះជំហានថ្មី និងដំបូងបំផុតហើយ ពីក្រុមប្រទេសលោកខាងលិច នៅក្នុងបរិបទសង្គ្រាមអ៊ុយក្រែន។ កាយវិការនេះ អាចនឹងញាំងឲ្យប្រទេសលោកខាងលិចផ្សេងទៀត ដែលនៅស្ទាក់ស្ទើរនោះ ធ្វើតាមបារាំងក៏ថាបាន។
ចុះផ្សាយនៅថ្ងៃ៖
ស្តាប់ - ០២:៣០
បន្ទាប់ពីបាននិយាយគ្នាតាមទូរស័ព្ទ ជាមួយលោកប្រធានាធិបតីវ្លូឌីមៀរ ហ្សេឡេនស្គី អស់រយៈពេលជាងមួយម៉ោង លោកម៉ាក្រុង ប្រធានាធិបតីបារាំង បានសម្រេចឆ្លើយតប យល់ព្រមប្រគល់រថពាសដែកធុនស្រាលប្រភេទ AMX-10 RC ទៅជួយកងទ័ពអ៊ុយក្រែន។ ជាជំនួយ ដែលបារាំងមានចេតនា ចូលរួមដើម្បីបន្ថែមកម្លាំងសមត្ថភាពឲ្យកងទ័ពអ៊ុយក្រែនយកឈ្នះលើសមរភូមិកាន់តែខ្លាំងថែមទៀត ចំពោះមុខការឈ្លានពានរបស់រុស្ស៊ី។ នេះបើផ្អែកតាមការបញ្ជាក់ ពីវិមានប្រធានាធិបតីបារាំង។
សូមបញ្ជាក់ថា រថពាសដែក AMX-10 RC របស់បារាំង ជារថពាសដែកធុនស្រាល ទំងន់២៥តោន ផលិតទសវត្សឆ្នាំ១៩៨០ មានបំពាក់ដោយកាណុងពីលើទំហំ១០៥mm ហើយអាចបើកបរបាន ក្នុងល្បឿនខ្ទង់៨០គីឡូម៉ែត្រក្នុងមួយម៉ោង។ យោងតាមអ្នកជំនាញកងទ័ពបារាំង ថ្វីបើរថពាសដែកនេះចាស់បន្តិចមែន តែមានវាមានសមត្ថភាពខ្ពស់ ហើយអាចចល័តបានយ៉ាងរហ័ស ពីសមរភូមិទៅសមរភូមិមួយ។ តែយ៉ាងណា មិនទាន់មានការបញ្ជាក់ច្បាស់ ថាបារាំងនឹងប្រគល់ឲ្យអ៊ុយក្រែន ចំនួនប៉ុន្មានគ្រឿងទេ។ បច្ចុប្បន្ន កងទ័ពបារាំងមានរថពាសដែកប្រភេទនេះ ចំនួន២៥០គ្រឿង ហើយកំពុងតែរៀបចំដាក់មកជំនួសដោយរថពាសដែកប្រភេទថ្មីទំនើបជាង ឈ្មោះ Jaguar ទំងន់២៥តោនដូចគ្នា។
គួរកត់សំគាល់ថា នេះជាលើកទីមួយហើយ ដែលរថពាសដែក ផលិតដោយបច្ចេកវិទ្យាកងទ័ពប្រទេសលោកខាងលិច ត្រូវបានបានប្រគល់ទៅឲ្យកងទ័ពអ៊ុយក្រែន។ តាមរយៈកាយវិការនេះ បារាំងចង់បើកទំព័រមុនគេ ក្នុងការបោះជំហានជួយអ៊ុយក្រែនឲ្យកាន់តែខ្លាំងក្លា។ រហូតមកទល់ពេលនេះ អាល្លឺម៉ង់នៅតែស្ទាក់ស្ទើ មិនទាន់សម្រេចថាប្រគល់ឬមិនប្រគល់ រថពាសដែកប្រយុទ្ធ ប្រភេទ Leopard-2 ទៅឲ្យអ៊ុយក្រែនទេ។ អ្នកវិភាគខ្លះ គិតថា ការសម្រេចរបស់បារាំង អាចនឹងជំរុញឲ្យអាល្លឺម៉ង់ធ្វើតាម។
ប្រភពពីវិមានប្រធានាធិបតីបារាំង បញ្ជាក់ថា រដ្ឋមន្រ្តីការពារជាតិបារាំង និងអ៊ុយក្រែន នឹងជួបនិយាយគ្នា ក្នុងពេលដ៏ខ្លីខាងមុខ ដើម្បីនិយាយលំអិត អំពីចំនួនរថពាសដែក ព្រមទាំងដំណើរការនៃដឹកជញ្ជូនប្រគល់វាទៅដល់កងទ័ពអ៊ុយក្រែន។ បន្ថែមពីនេះ ភាគីទាំងពីរបន្តនិយាយគ្នា អំពីជំនួយសព្វាវុធបន្ថែមផ្សេងទៀត ដើម្បីពង្រឹងសមត្ថភាពកងទ័ពអ៊ុយក្រែន។ នៅលើទំព័រTwitter កាលពីល្ងាចថ្ងៃទី៤មករា លោកម៉ាក្រុង បានសរសេរ បារាំងនឹងជួយអ៊ុយក្រែន រហូតទាល់តែអ៊ុយក្រែនបានជ័យជំនះ ហើយអឺរ៉ុបបានសន្តិភាពឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ