រដ្ឋមន្រ្តីការបរទេសអាល្លឺម៉ង់ថានឹងមិនរារាំងប៉ូឡូញក្នុងការបញ្ជូនរថក្រោះ Leopard ទៅឲ្យអ៊ុយក្រែន
អស់រយៈពេលជាច្រើនថ្ងៃមកហើយ ដែលប្រមុខរដ្ឋាភិបាលអាល្លឺម៉ង់ទទួលសម្ពាធឲ្យបញ្ជូនរថក្រោះទៅឲ្យអ៊ុយក្រែន ទាំងសម្ពាធពីអ៊ុយក្រែន ក៏ដូចជាសម្ពាធពីសំណាក់បណ្តាប្រទេសសម្ព័ន្ធមិត្តអូតង់។ នៅពេលនេះ លោក អូឡាហ្វ ស្ហុលស៍ ត្រូវរងសម្ពាធមួយបន្ថែមទៀត គឺពីសំណាក់រដ្ឋមន្រ្តីការបរទេសអាល្លឺម៉ង់ខ្លួនឯងផ្ទាល់ ដែលមកពីគណបក្សក្នុងរដ្ឋាភិបាលចម្រុះជាមួយគ្នា ហើយដែលបង្ហាញជំហរចង់អនុញ្ញាតឲ្យប៉ូឡូញបញ្ជូនទៅឲ្យអ៊ុយក្រែននូវរថក្រោះធុន Leopard ដែលទិញពីអាល្លឺម៉ង់។
ចុះផ្សាយនៅថ្ងៃ៖
ស្តាប់ - ០២:០៦
នៅក្នុងបទសម្ភាសន៍ជាមួយទូរទស្សន៍បារាំង កាលពីយប់ថ្ងៃអាទិត្យ លោកស្រី អាណាឡេណា ប៊ែរបុក (Annalena Baerbock) បានលើកឡើងថា អាល្លឺម៉ង់ដឹងថា រថក្រោះមានសារៈសំខាន់ខ្លាំង សម្រាប់អ៊ុយក្រែន ហើយថា អាល្លឺម៉ង់នឹងមិនរារាំងប៉ូឡូញ មិនឲ្យបញ្ជូនរថក្រោះទៅឲ្យអ៊ុយក្រែននោះទេ ប្រសិនបើប៉ូឡូញស្នើសុំ ក៏ប៉ុន្តែ រហូតមកទល់នឹងពេលនេះ អាល្លឺម៉ង់នៅមិនទាន់បានទទួលសំណើជាផ្លូវការពីសំណាក់ប៉ូឡូញនៅឡើយនោះទេ។
គួរបញ្ជាក់ថា ប៉ូឡូញ រួមជាមួយនឹងហ្វាំងឡង់ ធ្លាប់បានលើកឡើងអំពីគម្រោងចង់បញ្ជូនរថក្រោះជាច្រើនគ្រឿងទៅឲ្យអ៊ុយក្រែន។ ក៏ប៉ុន្តែ រថក្រោះទាំងនេះ ជារថក្រោះដែលទិញពីអាល្លឺម៉ង់ ដូច្នេះ ប៉ូឡូញ ក៏ដូចជាហ្វាំងឡង់ដែរ ត្រូវការជាចាំបាច់នូវការឯកភាពពីសំណាក់រដ្ឋាភិបាលអាល្លឺម៉ង់ជាមុន ទើបអាចបញ្ជូនរថក្រោះទាំងនេះបន្តទៅឲ្យអ៊ុយក្រែនបាន។
គិតរហូតមកទល់នឹងពេលនេះ លោកអូឡាហ្វ ស្ហុលស៍ តែងតែប្រកាន់នូវជំហរមួយថា អាល្លឺម៉ង់នឹងមិនធ្វើអ្វីតែឯងនោះទេ គឺចាំបាច់ត្រូវតែធ្វើរួមគ្នាជាមួយប្រទេសសម្ព័ន្ធមិត្តផ្សេងទៀត។ ជាពិសេស អាល្លឺម៉ង់ចង់ឲ្យអាមេរិកបញ្ជូនរថក្រោះធុន M1 Abrams ទៅឲ្យអ៊ុយក្រែនដែរ ទើបអាល្លឺម៉ង់សុខចិត្តបញ្ជូនរថក្រោះ ធុន Leopard របស់ខ្លួនទៅជាមួយគ្នា។
ការសម្រេចអនុញ្ញាត ឬមិនអនុញ្ញាតឲ្យបញ្ជូនរថក្រោះអាល្លឺម៉ង់ទៅឲ្យអ៊ុយក្រែន គឺជាសិទ្ធិអំណាចរបស់លោកអូឡាហ្វ ស្ហុលស៍ ដែលជាប្រមុខរដ្ឋាភិបាល។ ក៏ប៉ុន្តែ ការលើកឡើងជាសាធារណៈរបស់លោកស្រី អាណាឡេណា ប៊ែរបុក អាចជាតម្រុយមួយនៃជំហរចម្រូងចម្រាសគ្នា នៅក្នុងចំណោមរដ្ឋាភិបាលអាល្លឺម៉ង់ ហើយវាអាចជាសម្ពាធមួយបន្ថែមទៀត ទៅលើលោកអូឡាហ្វ ស្ហុលស៍ ពីព្រោះថា លោកស្រី អាណាឡេណា ប៊ែរបុក មកពីគណបក្សដ៏សំខាន់មួយ ដែលមានសំឡេងច្រើនលំដាប់ទីពីរ នៅក្នុងចំណោមគណបក្សទាំងបី នៅក្នុងរដ្ឋាភិបាលចម្រុះ ដឹកនាំដោយអូឡាហ្វ ស្ហុលស៍ បច្ចុប្បន្ន។
កាលពីថ្ងៃសុក្រកន្លងទៅនេះ ប្រធានគណៈកម្មការការពារជាតិនៅសភាអាល្លឺម៉ង់ ហើយដែលមកពីគណបក្សទីបី នៅក្នុងរដ្ឋាភិបាលចម្រុះ ក៏ធ្លាប់បានទាមទារផងដែរឲ្យលោកអូឡាហ្វ ស្ហុលស៍ បញ្ជូនរថក្រោះទៅឲ្យអ៊ុយក្រែន ឬបើអាល្លឺម៉ង់មិនបញ្ជូនរថក្រោះទៅដោយផ្ទាល់ខ្លួនឯងទេនោះ យ៉ាងហោចណាស់ គួរតែអនុញ្ញាតឲ្យប្រទេសផ្សេងយករថក្រោះដែលទិញពីអាល្លឺម៉ង់ បញ្ជូនបន្តទៅឲ្យអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ