ហ្វាំងឡង់បានលើកឡើងជាលើកទី១ ពីបេក្ខភាពរបស់អង្គការអូតង់ដោយគ្មានស៊ុយអែត
នៅក្នុងប្រទេសហ្វាំងឡង់ ប្រមុខការទូតលោកប៉េកា ហាវីស្តូបានលើកឡើងក្នុងថ្ងៃអង្គារ ទី២៤ មករាពីបេក្ខភាពរបស់ហ្វាំងឡង់ចូលអង្គការអូតង់ដោយមិនរង់ចាំប្រទេសស៊ុយអែត។ តែលោកហាវីស្តូមិនភ្លេចបញ្ជាក់ថា វាហាក់ដូចជារហ័សពេកដែលហ្វាំងឡង់ត្រូវសម្រេចចិត្តយ៉ាងនោះ និងថា ជម្រើសចូលអូតង់រួមគ្នាជាមួយប្រទេសស៊ុយអែតនៅតែជាជម្រើសអាទិភាពទី១ ដដែល។ ការលើកឡើងរបស់ហ្វាំងឡង់ពេលនេះបានធ្វើឡើង ក្រោយពីមានភាពតានតឹងថ្មីរវាងស៊ុយអែត និងប្រទេសតួកគី។
ចុះផ្សាយនៅថ្ងៃ៖
ស្តាប់ - ០២:២៥
គឺតាមរយៈកាណាល់ទូរទស្សន៍រដ្ឋមួយដែលប្រមុខការទូតហ្វាំងឡង់លោកប៉េកា ហាវីស្តូបានបញ្ជាក់ថា ហ្វាំងឡង់ត្រូវធ្វើការវាយតម្លៃលើស្ថានការណ៍ជាក់ស្តែងដើម្បីសម្រេចលើជម្រើសចូលអង្គការអូតង់។ តាមលោកហាវីស្តូ មានជម្រើសពីរដែលហ្វាំងឡង់អាចពិចារណាពេលនេះ ទី១ ធ្វើដំណើរតែម្នាក់ឯងដោយគ្មានប្រទេសស៊ុយអែត បើស៊ុយអែតមិនអាចទៅមុខបាន និងទី២ បន្តរងចាំស៊ុយអែតដើម្បីធ្វើដំណើររួមគ្នា។ តែលោកហាវីស្តូមិនភ្លេចរម្លឹកថា ជម្រើសធ្វើដំណើររួមគ្នាជាមួយស៊ុយអែតនៅតែជាជម្រើសទី១ ដែលហ្វាំងឡង់ចង់បាន។
ការលើកឡើងរបស់ហ្វាំងឡង់ដូចនេះបានធ្វើឡើង ក្រោយពីមានភាពតានតឹងថ្មីរវាងប្រទេសស៊ុយអែត និងប្រទេសតួកគី។ ភាពតានតឹងថ្មីនោះ គឺការដុតគម្ពីសាសនាអ៊ីស្លាមរបស់ជនស្តាំនិយមជ្រុលស៊ុយអែតនៅក្នុងបាតុកម្មរៀបចំក្បែរស្ថានទូតតួកគីក្នុងក្រុងស្តុកខុល ប្រទេសហ្វាំងឡង់នាចុងសប្តាហ៍កន្លងទៅ។ នេះជាព្រឹត្តិការណ៍ទី២ ដែលតួកគីមិនអាចទទួលយកបាន បន្ទាប់ពីព្រឹត្តិការណ៍ជួបជុំរបស់ក្រុមគាំទ្រគួដឌីស្ថានកាលពីសប្តាហ៍កន្លងទៅ។ ក្នុងថ្ងៃចន្ទ ទី២៣ មករា ប្រធានាធិបតីតួកគីលោកអ៊ែរដូហ្កានបានបញ្ជាក់ដោយមិនលាក់លៀមថា ស៊ុយអែតមិនអាចពឹងលើការគាំទ្ររបស់តួកគីក្នុងការចូលជាសមាជិកអូតង់បានទៀតឡើយ។
គឺព្រឹត្តិការណ៍ទាំងពីរផ្ទួនគ្នានៅស៊ុយអែតនេះហើយដែលប្រមុខការទូតហ្វាំងឡង់លោកហាវីស្តូយល់ថា អាចធ្វើឲ្យការសុំចូលអូតង់របស់ហ្វាំងឡង់ និងស៊ុយអែតមានភាពយឺតយ៉ាវ។ យ៉ាងណាក៏ដោយ ប្រមុខការទូតស៊ុយអែតបានសុំឲ្យលោកហាវីស្តូបំភ្លឺលំអិតបន្ថែមនូវអ្វីដែលបានលើកឡើង។ គួររម្លឹកថា ហ្វាំងឡង់ និងស៊ុយអែតបានដាក់ពាក្យសុំចូលជាសមាជិកអូតង់រួមគ្នាក្នុងថ្ងៃតែមួយកាលពីខែឧសភា ឆ្នាំ ២០២២។ តែដើម្បីអាចចូលបាន លុះត្រាតែមានការយល់ព្រមពីសមាជិកអូតង់ទាំង ៣០ប្រទេស ក្នុងនោះក៏មានតួកគីមួយដែរ។
ចំណោតនៅត្រង់ថា តួកគីកំពុងបន្តរារាំងបេក្ខភាពស៊ុយអែតដោយបានដាក់លក្ខខណ្ឌមួយចំនួន ពិសេសឲ្យស៊ុយអែតឈប់គាំទ្រពួកគួដឌីស្ថាន PKK នៅតួកគី និងលើកបំរាមហាមលក់អាវុធឲ្យតួកគី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ