បេឡារុសនឹងប្រយុទ្ធរួមជាមួយទ័ពរុស្ស៊ី លុះណាតែខ្លួនរងការវាយប្រហារ
បេឡារុស នឹងចូលរួមប្រយុទ្ធជាមួយកងកម្លាំង រុស្ស៊ីនៅអ៊ុយក្រែន ល្គឹកណាតែខ្លួនរងការវាយប្រហារ នេះជាសេចក្តី ថ្លែងរបស់មេដឹកនាំ បេឡារុស លោក Alexandre Loukachenko នៅថ្ងៃ ព្រហស្បតិ៍ ទី ១៦ កុម្ភៈ ក្នុងជំនួបដ៏កម្រ ជាមួយ បណ្តាតំណាងប្រព័ន្ធផ្សព្វផ្សាយ នៅក្រុង Minsk។
ចុះផ្សាយនៅថ្ងៃ៖
”ខ្ញុំត្រៀមប្រយុទ្ធរួមគ្នាជាមួយរុស្ស៊ី ដោយចេញពីដែនដីបេឡារុសទៅ តែក្នុងករណីមួយគត់ គឺ ប្រសិនបើ មានទាហានណាម្នាក់ប្រដាប់ដោយអាវុធ ពីខាងដែនដីអ៊ុយក្រែន ចូលមកក្នុងដែនដីបេឡារុស ដើម្បីសម្លាប់អ្នកស្រុកយើង”។ លោកប្រធានានាធិបតីបេឡារុស បានថ្លែង ទាំងលំអិតថា ការនេះមានសុពលភាពមិនសម្រាប់អ៊ុយក្រែនប៉ុណ្ណោះទេ តែ ក៏សម្រាប់គ្រប់ប្រទេសជិតខាងយើង។ នរណា ក៏ដោយដែលឈ្លានពានមកលើយើង នឹងរងការវាយបកទៅវិញ កាន់តែឃោរឃៅពុំខាន។ ដូច្នេះ សង្គ្រាម នឹងវិវឌ្ឍទៅ ក្នុងទម្រង់ផ្សេង!។ នេះជាការព្រមានរបស់លោក Loukachenko។
បេឡារុស ដើរតួជា ខ្នងបង្អែក សម្រាប់ប្រតិបត្តិការវាយលុករុស្ស៊ីដែលបញ្ឆេះឡើង កាលពីមួយឆ្នាំមុន ទល់ នឹងអ៊ុយក្រែន។ សព្វថ្ងៃនៅមាន ពួកទាហាននិងបរិក្ខារយោធារុស្ស៊ី ស្ថិតនៅប្រចាំការនៅឡើយនៅបេឡារុស។
តាមអ្នកវិភាគជាច្រើន វិមានក្រេមឡាំងរមែងដាក់សម្ពាធលើលោក Loukachenko ឲ្យគាត់បញ្ជាកងទ័ពរបស់គាត់ចូលរួមក្នុងប្រតិបត្តិការវាយលុកនៅអ៊ុយក្រែន។ ប៉ុន្តែ មេដឹកនាំបេឡារុស នៅតែប្រកែក ទោះបីគាត់ អាស្រ័យយ៉ាងខ្លាំងលើការគាំទ្រនយោបាយ ក៏ដូចជា សេដ្ឋកិច្ច ពីខាងក្រុងម៉ូស្គូ ជាពិសេស តាំងពីមាន ផ្ទុះឡើងជា រលកតវ៉ាប្រឆាំងអំណាចគាត់ ក្នុងឆ្នាំ ២០២០។
ដោយឡែកមេដឹកនាំបេឡារុស បានប្រកាសថា នៅថ្ងៃសុក្រ គាត់នឹងជួបសន្ទនា ជាមួយ សមភាគីរុស្ស៊ី លោក វ៉្លាឌីមៀរ ពូទីន។
នៅដំណាច់ខែមករាកន្លងទៅ លោក ពូទីន បានសុំរដ្ឋាភិបាលរុស្ស៊ីឲ្យចរចាអំពី ការបង្កើតជា មជ្ឈមណ្ឌល ហ្វឹកហាត់យោធារួមជាមួយបេឡារុស។
កាលពីកណ្តាលខែតុលា បេឡារុស និង រុស្ស៊ី ថែមទាំងបានទម្លាយឲ្យដឹងអំពី ការបង្កើត កងកម្លាំងយោធា រួមគ្នា ដែលតាម ក្រុង Minsk គឺ សម្រាប់បំពេញ បេសកកម្ម”ការពារ”សុទ្ធសាធ។
ប្រទេសទាំងពីរ តែងធ្វើជារឿយៗ លំហាត់សឹកទ្រង់ទ្រាយធំ ហេតុដែលញ៉ាំងឲ្យលេចចេញមកជា ពាក្យ ចចាមអារ៉ាមថា កងទ័ពបេឡារុស អាចចូលរួមដែរក្នុង ប្រតិបត្តិការវាយលុករុស្ស៊ី នៅអ៊ុយក្រែន។
ដើម្បីសបញ្ជាក់ពីសារៈសំខាន់របស់បេឡារុស នៅក្នុងយុទ្ធសាស្ត្រយោធារុស្ស៊ី ដើម្បីប្រតិបត្តិការវាយលុកនៅអ៊ុយក្រែន លោក ពូទីន ដែលក្នុងមួយឆ្នាំចុងក្រោយ កម្រវត្តមាននៅពីមុខសាធារណជន កាលពីខែធ្នូ ស្រាប់តែបាន អញ្ជើញទៅធ្វើទស្សនកិច្ចនៅ ក្រុង Minsk រដ្ឋធានីបេឡារុស។
មុននេះពីរខែ ម៉ូស្គូ និង ក្រុង Minsk បានប្រកាសអំពីការដាក់ឲ្យឈរជើង នៅបេឡារុស គឺ កងកម្លាំងយោធា ចម្រុះ រុស្ស៊ី និង បេឡារុសក្នុងចំនួន ៩.០០០ នាក់ និង រថក្រោះ ប្រមាណ ១៧០ គ្រឿង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ