សភាហ្វាំងឡង់អនុម័តច្បាប់អនុញ្ញាតឲ្យប្រទេសចូលជាសមាជិកអូតង់
ហ្វាំងឡង់រលាស់ចោលអព្យាក្រិត្យភាព នៅក្រោយសង្រ្គាមរុស្ស៊ីឈ្លានពានអ៊ុយក្រែន។ នៅក្រោយបើកការពិភាក្សា តាំងពីថ្ងៃចន្ទ សភាហ្វាំងឡង់ ដោយគ្មានការភ្ញាក់ផ្អើល បានបោះឆ្នោតអនុម័តច្បាប់ ដែលអនុញ្ញាតឲ្យហ្វាំងឡង់ចូលជាសមាជិករបស់អង្គការអាត្លង់ទិកអូតង់។ ការអនុម័តច្បាប់របស់សភាហ្វាំងឡង់នៅមិនទាន់គ្រប់គ្រង ដើម្បីអាចចូលជាសមាជិករបស់អូតង់ ដោយគេត្រូវរង់ចាំ ភ្លើងខៀវពីតួកគី និងហុងគ្រី សមាជិកចុងក្រោយរបស់អូតង់ ដែលនៅអល់អែក មិនទាន់ផ្តល់សច្ចាប័នទទួលយកហ្វាំងឡង់ជាសមាជិកថ្មីរបស់អូតង់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៩
សភាហ្វាំងឡង់បោះឆ្នោត អនុម័តច្បាប់ដែលអនុញ្ញាតឲ្យហ្វាំងឡង់ចូលជាសមាជិករបស់អូតង់ ជាមួយសំឡេងគាំទ្រដ៏ច្រើនលើសលប់ ចំនួន ១៨៣ (សំឡេងប្រឆាំង ៧)។ ច្បាប់ថ្មីដែលសភាបោះឆ្នោត កាលពីថ្ងៃពុធ នឹងទៅបិទបញ្ចប់អព្យាក្រិត្យភាព ដែលហ្វាំងឡង់បានអនុវត្ត ប្រកាន់យក អស់ជាងកន្លះសតវត្សរ៍។
នៅក្នុងសារធ្វីត រដ្ឋមន្រ្តីការពារជាតិហ្វាំងឡង់ បានស្វាគមការបោះជំហានដ៏សំខាន់របស់ហ្វាំងឡង់ ដើម្បីចូលជាសមាជិករបស់អង្គការអូតង់។
ត្រូវចាប់បង្ខំឲ្យប្រកាន់ជំហរអព្យាក្រិត្យ អស់កន្លះសតវត្សរ៍ នៅក្រោមការដាក់សម្ពាធរបស់សហភាពសូវៀត ក្នុងសម័យសង្រ្គាមលោកលើកទី២ ហ្វាំងឡង់នៅបានប្រកាស មិនចូលបក្សសម្ព័ន្ធយោធា អស់៣សតវត្សរ៍ នៅក្រោយសង្រ្គាមត្រជាក់។ ប៉ុន្តែ សង្រ្គាមរុស្ស៊ីឈ្លានពានអ៊ុយក្រែន កាលពី១ឆ្នាំមកនេះ បានធ្វើឲ្យហ្វាំងឡង់ ដែលមានព្រំដែនដ៏វែងជាមួយរុស្ស៊ី ប្រមាណ ១៣៤០ គីឡូម៉ែត្រ ត្រូវផ្លាស់ប្តូរខ្សែបន្ទាត់នយោបាយ ដើម្បីទទួលបានអន្តរាគមការពារពីបក្សសម្ព័ន្ធអូតង់ ក្នុងករណីមានការឈ្លានពានពីបរទេស។
នៅថ្ងៃពុធ គ្រប់គណបក្សនយោបាយបោះឆ្នោតគាំទ្រច្បាប់អនុញ្ញាតឲ្យហ្វាំងឡង់ចូលជាសមាជិករបស់អង្គការអូតង់។ លើកលែងតែសមាជិកសភាមកពីគណបក្សស្តាំនិយមជ្រុល៧នាក់ប៉ុណ្ណោះ ដែលបោះឆ្នោតប្រឆាំង ក្នុងហេតុផលថា ច្បាប់ចែងមិនច្បាស់លាស់ពីការតាំងពង្រាយអាវុធនុយក្លេអ៊ែរក្នុងទឹកដីហ្វាំងឡង់។
សភាអនុម័តច្បាប់អនុញ្ញាតឲ្យហ្វាំងឡង់ក្លាយជាសមាជិករបស់អូតង់ ប៉ុន្តែ ហ្វាំងឡង់នៅមិនទាន់អាចចូលជាសមាជិកភា្លម របស់អូតង់ ដរាបណាគ្មានភ្លើងខៀវរបស់តួកគី និងហុងគ្រី សមាជិកចុងក្រោយ ២របស់អូតង់ ដែលមិនទាន់បោះឆ្នោតផ្តល់សច្ចាប័នទទួលយកហ្វាំងឡង់ និងស៊ុយអែត ជាសមាជិកថ្មីរបស់អូតង់។
នៅដើមសប្តាហ៍នេះ រដ្ឋាភិបាលតួកគីនិយាយថា សភាអាចបោះឆ្នោត ផ្តល់សច្ចាប័ន ទទួលយកហ្វាំងឡង់ ដោយគ្មានស៊ុយអែត។ ទំនាក់ទំនងតួកគី ជាមួយស៊ុយអែតបានចាប់តានតឹង នៅក្រោយ តួកគីចោទប្រកាន់រដ្ឋាភិបាលស៊ុយអែតថា បានផ្តល់ជំរក ការពារសកម្មជនជ្រុលនិយមគួដ ដែលជាសត្រូវរបស់តួកគី។ ខឹងអន់ចិត្តអាជ្ញាធរស៊ុយអែត ដែលអនុញ្ញាតឲ្យមានបាតុកម្មប្រឆាំងលោកប្រធានាធិបតីអ៊ែរដូហ្កាន និងដុតគម្ពីកូរ៉ាន តួកគីប្រកាសមិនគាំទ្រស៊ុយអែតជាសមាជិករបស់អូតង់។
ហុងគ្រីឯណោះវិញគ្មានបញ្ហា ផ្ទាល់ជាមួយ ស៊ុយអែត និងហ្វាំងឡង់។ ប៉ុន្តែ ការរារែករបស់ហុងគ្រីដែលមិនទាន់ផ្តល់សច្ចាប័នទទួលយកហ្វាំងឡង់ និងស៊ុយអែត ជាសមាជិករបស់អូតង់ ត្រូវគេមើលឃើញថា មានជាប់ពាក់ព័ន្ធនឹងជំហរស្រពិចស្រពិលរបស់ហុងគ្រី ដែលមិនចង់ធ្វើឲ្យរុស្ស៊ីថ្នាំងថ្នាក់ចិត្តនឹងខ្លួន។ នៅថ្ងៃពុធ សភាហុងគ្រី ទើបចាប់ពិភាក្សាច្បាប់ស្តីពីការផ្តល់សច្ចាប័នដល់ហ្វាំងឡង់ និងស៊ុយអែត ដោយគ្មានបញ្ជាក់ថ្ងៃដែលត្រូវបោះឆ្នោតអនុម័ត។
នៅហ្វាំងឡង់ នៅក្រោយភ្លើងខៀវរបស់សភា ប្រធានាធិបតីមាន រយៈពេល៣ខែដើម្បីចុះហត្ថលេខាលើច្បាប់។ បន្ទាប់ពីនោះ ហ្វាំងឡង់នៅរង់ចាំតែការផ្តល់សច្ចាប័នរបស់សមាជិកចុងក្រោយរបស់អូតង់ គឺតួកគី និងហុងគ្រី ដើម្បីក្លាយជាសមាជិកផ្លូវការ របស់អូតង់។ ក្នុងពេលរង់ចាំ ហ្វាំងឡង់ កាលពីថ្ងៃអង្គារទី ២៨កុម្ភៈ បានចាប់ផ្តើមសាងសង់ជញ្ជាំងប្រវែង ២០០គីឡូម៉ែត្រ នៅព្រំដែនសរុបជាមួយរុស្ស៊ី ប្រវែង ១៣៤០គីឡូម៉ែត្រ។ ការងារសាងសង់ជញ្ជាំងដែលមានតម្លៃ៣៦០លានអឺរ៉ូ នឹងបញ្ចប់នៅឆ្នាំ ២០២៦៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ