បារាំង៖ក្រុមហ៊ុន Dassault Aviation ទទួលបានការបញ្ជាទិញ និងប្រាក់ចំណេញខ្ពស់ក្នុងឆ្នាំ ២០២២
នៅក្នុងប្រទេសបារាំង ក្រុមហ៊ុនផលិតយន្តហោះ Dassault Aviation បានផ្សព្វផ្សាយនាថ្ងៃព្រហស្បតិ៍ ទី៩ មីនានូវលទ្ធផលដែលទទួលបានក្នុងឆ្នាំ ២០២២។ តាមលទ្ធផលដែលទទួលបាន ២០២២ ជាឆ្នាំដែលក្រុមហ៊ុនទទួលបានការបញ្ជាទិញ និងទទួលបានប្រាក់ចំណេញច្រើន។ ជោគជ័យនេះបានពីការលក់យន្តហោះចម្បាំងរ៉ាហ្វាល់ (Rafal) និងយន្តហោះស៊ីវិលហ្វាល់កុន (Falcon)។ សម្រាប់អគ្គនាយកក្រុមហ៊ុន Dassault Aviation ឆ្នាំ ២០២២ ជាឆ្នាំប្រវត្តិសាស្រ្តទាក់ទងនឹងការបញ្ជាទិញ។
ចុះផ្សាយនៅថ្ងៃ៖
ស្តាប់ - ០២:២៩
២០ ៩០០លានអឺរ៉ូ នេះជាទឹកប្រាក់ដែលក្រុមហ៊ុនផលិតយន្តហោះបារាំង Dassault Aviation ទទួលបានក្នុងឆ្នាំ ២០២២ ពោលមានការកើនឡើងដល់ទៅ ៧៤% ធៀបនឹងឆ្នាំ ២០២១។ ចំណែកប្រាក់ចំណេញមាន ៧១៦លានអឺរ៉ូ ពោលបានកើនឡើងជាង ១៨%។ គ្រាន់តែក្នុងឆ្នាំ ២០២២ មួយ Dassault Aviation លក់បានយន្តហោះចម្បាំងរ៉ាហ្វាល់ថ្មីចំនួន ៩២គ្រឿង ខណៈដែលការលក់សរុបមានតែ ១៣៣គ្រឿងគិតតាំងពីការដាក់យន្តហោះនេះឲ្យប្រើប្រាស់ក្នុងឆ្នាំ ២០២១។ ឆ្នាំ ២០២១ លក់បានត្រឹម ៤៩គ្រឿង។
ក្នុងចំណោមយន្តហោះចម្បាំងរ៉ាហ្វាល់ថ្មីទាំង ៩២គ្រឿងដែលបានលក់ក្នុងឆ្នាំ ២០២២ ប្រទេសអេមីរ៉ាតអារ៉ាប់រួមបានទិញចំនួន ៨០គ្រឿងក្នុងទឹកប្រាក់ ១៤ ០០០លានអឺរ៉ូ ប្រទេសក្រិកបានទិញបន្ថែមចំនួន ៦គ្រឿង និង ៦គ្រឿងដំបូងសម្រាប់ប្រទេសឥណ្ឌូណេស៊ីនៅក្នុងកុងត្រាដែលឥណ្ឌូណេស៊ីបានបញ្ជាទិញសរុបចំនួន ៤២គ្រឿង។ ទាក់ទងនឹងការលក់យន្តហោះស៊ីវិលហ្វាល់កុនវិញ ក្រុមហ៊ុនទទួលបានការបញ្ជាទិញចំនួន ៦៤គ្រឿងក្នុងឆ្នាំ ២០២២ ពោលកើនឡើងចំនួន ២៥% ធៀបនឹងឆ្នាំ ២០២១ ដែលលក់បានត្រឹម ៥១គ្រឿង។
ដោយឡែក បើបូកសរុបគិតត្រឹមដំណាច់ឆ្នាំ ២០២២ ក្រុមហ៊ុន Dassault Aviation ទទួលបានការបញ្ជាទិញយន្តហោះចម្បាំងរ៉ាហ្វាល់ចំនួន ១៦៤គ្រឿង និងយន្តហោះស៊ីវិលហ្វាល់កុនចំនួន ៨៧គ្រឿងដែលមានតម្លៃជាទឹកប្រាក់សរុបចំនួន ៣៥ ០០០លានអឺរ៉ូ។ បើធៀបនឹងរយៈពេលដូចគ្នានាដំណាច់ឆ្នាំ ២០២១ គឺមានការកើនឡើងជាង ៦៨%។ សុខភាពល្អខ្លាំងជាប្រវត្តិសាស្រ្តនេះបានធ្វើឲ្យតម្លៃភាគហ៊ុនរបស់ក្រុមហ៊ុន Dassault Aviation នៅផ្សារភាគហ៊ុនក្នុងក្រុងប៉ារីសស្ទុះឡើងនាថ្ងៃព្រហស្បតិ៍ ទី៩ មីនានេះ។
តែក្រុមហ៊ុនបានទទួលស្គាល់ថា នៅក្នុងបរិបទសព្វថ្ងៃនៃវិបត្តិថាមពល ការខ្វះវត្ថុធាតុដើម ឬមួយក៏កំណើនអតិផរណាដែលកំពុងប៉ះពាល់ខ្លាំងដល់ក្រុមហ៊ុនដែលធ្វើការជាមួយ ហ៊ុន Dassault Aviation ការផលិត និងការប្រគល់យន្តហោះឲ្យអតិថិជនក្នុងឆ្នាំ ២០២៣ អាចជួបភាពយឺតយ៉ាវ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ