សហភាពអឺរ៉ុបដាក់របាំងមិនឲ្យនាំចូលផលិតផលដែលបានមកពីការកាប់បំផ្លាញព្រៃឈើ
នៅថ្ងៃពុធ ទី១៩ មេសា សហភាពអឺរ៉ុបបានអនុម័តច្បាប់ហាមការនាំចូលផលិតផលដែលបានមកពីការចូលរួមកាប់បំផ្លាញព្រៃឈើ។ គួរបញ្ជាក់ថាបច្ចុប្បន្ន ផលិតផលនាំចូលសហភាពអឺរ៉ុបចំនួន ១៦% ជាផលិតផលដែលបានមកពីការចូលរួមកាប់បំផ្លាញព្រៃឈើ។ អត្រានេះបានធ្វើឲ្យសហភាពអឺរ៉ុបក្លាយជាអ្នកកាប់បំផ្លាញព្រៃឈើត្រូពិកលំដាប់ទី២ បន្ទាប់ពីប្រទេសចិន។ ម៉ាឡេស៊ី និងឥណ្ឌូណេស៊ីដែលជាប្រទេសនាំប្រេងដូងចេញច្រើនជាងគេក្នុងលោកបរិហារលើច្បាប់របស់អឺរ៉ុបដោយចាត់ទុកជាការរើសអើង។ ចំណែកក្រុមអង្គការក្រៅរដ្ឋាភិបាលបានសាទរចំពោះច្បាប់នេះ តែបានគូសបញ្ជាក់ពីការលំបាកក្នុងការអនុវត្តន៍។ ក្រៅពីម៉ាឡេស៊ី និងឥណ្ឌូណេស៊ី ច្បាប់របស់អឺរ៉ុបហាមការនាំចូលផលិតផលដែលបានមកពីការចូលរួមកាប់បំផ្លាញព្រៃឈើក៏មានជាប់ពាក់ព័ន្ធនឹងប្រទេសអាហ្សង់ទីនដែរ ពិសេសផលិផលសាច់បសុសត្វដែលសហភាពអឺរ៉ុបនាំចូលពីអាហ្សង់ទីនចំនួន ១២%។ តែលោកដាដូរ ឈីហ្សា អ្នកតំណាងឧស្សាហកម្មសាច់បសុសត្វនៅអាហ្សង់ទីនបានធានាថា បសុសត្វអាហ្សង់ទីនមិនបានចិញ្ចឹមលើដីដែលបានពីការកាប់បំផ្លាញព្រៃឈើទេ និងថា ការបន្តដាក់របាំងរដ្ឋបាលសម្រាប់សាច់បសុសត្វអាហ្សង់ទីននៅក្នុងទីផ្សារអឺរ៉ុបនឹងអាចជំរុញឲ្យអ្នកចិញ្ចឹមសត្វអាហ្សង់ទីនបង្វែរការលក់ទៅឲ្យអ្នកផ្សេងវិញ។
ចុះផ្សាយនៅថ្ងៃ៖
ស្តាប់ - ០០:៥៦
« ប្រាកដហើយសព្វថ្ងៃនេះ យើងបាននាំសាច់គោដែលមិនសូវមានគុណភាពទៅកាន់ប្រទេសចិន ពោលគឺសាច់ដែលមិនសូវមានខ្លាញ់ និងដែលទីផ្សារក្នុងស្រុកមិនត្រូវការ។ ប្រទេសចិនបានទិញក្នុងតម្លៃថ្លៃជាងសហភាពអឺរ៉ុប និងសឹងគ្មានការរឹតបន្តឹងអ្វីទាំងអស់។ ការរកស៊ីជាមួយចិនមានភាពងាយស្រួលណាស់។
ដូច្នេះ បើមានអ្នកទិញណាម្នាក់យល់ព្រមទិញក្នុងតម្លៃដូចគ្នា ឬមួយក៏ថោកជាងនេះបន្តិច តែមិនស្នើឲ្យយើងបំពេញសំណុំបែបបទច្រើនស្មុគស្មាញ ឬមួយក៏បង្កភាពងាយស្រួលក្នុងរឿងឯកសារនោះ វាច្បាស់ហើយដែលយើងធ្វើការរកស៊ីជាមួយអ្នកទិញនោះ។ វាកាន់តែមានភាពងាយស្រួលសម្រាប់ក្រុមហ៊ុន រោងចក្រ សហគ្រាស »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ