លោកស្ហុលស៍៖សហភាពអឺរ៉ុបមិនត្រូវចាញ់សម្លុត និងការបំភិតបំភ័យដោយការបង្ហាញសាច់ដុំរបស់លោកពូទីនទេ
នៅថ្ងៃអង្គារ ទី៩ ឧសភា សភាអឺរ៉ុបបានបើកសម័យប្រជុំពេញអង្គនៅក្នុងទីក្រុងស្រ្តាសបួរប្រទេសបារាំង។ សម័យប្រជុំនេះបានធ្វើឡើងចំថ្ងៃប្រារព្ធទិវាអឺរ៉ុប និងចំពេលដែលរុស្ស៊ីបានរៀបចំប្រារព្ធខួប ៧៨ឆ្នាំនៃជ័យជម្នះលើអាល្លឺម៉ង់ណាហ្ស៊ីក្នុងសង្រ្គាមលោកលើកទី២។ នាយករដ្ឋមន្រ្តីអាល្លឺម៉ង់លោកអូឡាហ្វ ស្ហុលស៍ដែលត្រូវបានសភាអឺរ៉ុបអញ្ជើញឲ្យចូលរួមបានថ្លែងបញ្ជាក់ថា សហភាពអឺរ៉ុបមិនត្រូវចាញ់សម្លុតដោយការបង្ហាញកម្លាំងរបស់ប្រធានាធិបតីរុស្ស៊ីលោកពូទីនទេ និងបានគូសបញ្ជាក់ថា គ្មាននរណាម្នាក់ចង់ឃើញការត្រឡប់វិញនូវសម័យដែលអ្នកខ្លាំងជាអ្នកបង្កើតច្បាប់ដើម្បីអនុវត្តលើទឹកដីអឺរ៉ុបឡើយ។ តាមលោកស្ហុលស៍ សហភាពអឺរ៉ុបត្រូវតែផ្លាស់ប្តូរដោយពង្រីកសមាជិកបន្ថែម និងធ្វើកំណែទម្រង់។
ចុះផ្សាយនៅថ្ងៃ៖
ស្តាប់ - ០១:៣២
« យើងបានធ្វើការជ្រើសយកអឺរ៉ុបមួយធំ។ យើងបាននិយាយប្រាប់ពលរដ្ឋប្រុស ស្រីគ្រប់រូបនៅតំបន់បាល់កង់ខាងលិច នៅប្រទេសអ៊ុយក្រែន នៅប្រទេសម៉ុលដាវី និងក៏នៅប្រទេសហ្សកហ្ស៊ី។ អស់លោកស្ថិតនៅជាមួយយើង។ យើងចង់ឱ្យអស់លោកមានចំណែករួមរស់ជាមួយសហភាពអឺរ៉ុបរបស់យើង។ នេះមិនមែនជាការលះបង់ ជាសេចក្តីសប្បុរស ឬជាមនុស្សធម៌នោះទេ។
តែនេះជាការបញ្ជាក់អំពីភាពជឿជាក់របស់យើង និងភាពរឹងមាំនៃសេដ្ឋកិច្ចរបស់យើង។ ទន្ទឹមគ្នានេះ វាក៏នឹងបញ្ជាក់ផងដែរពីការធានាសន្តិភាពយូរអង្វែងនៅអឺរ៉ុប បន្ទាប់ពីមានការផ្លាស់ប្តូរសម័យកាលដែលបង្កចេញពីសង្រ្គាមរុស្ស៊ីឈ្លានពានអ៊ុយក្រែន។ ភូមិសាស្ត្រនយោបាយអឺរ៉ុបមួយក៏ត្រូវបានវាស់វែងដោយសមត្ថភាពខ្លួនឯងក្នុងការរក្សាពាក្យសន្យារបស់ខ្លួនជាមួយអ្នកជិតខាងភ្លាមៗដែរ។
គោលនយោបាយពង្រីកខ្លួនដោយស្មោះត្រង់ដាក់ការអនុវត្តនូវការសន្យារបស់ខ្លួន ពិសេស និងមុនគេទាក់ទងនឹងតំបន់បាល់កង់ខាងលិច ដែលយើងបានសន្យាបញ្ចូលជាសមាជិកភាពកាលពី ២០ឆ្នាំមុន »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ