រដ្ឋមន្រ្តីបរិស្ថានបារាំង៖បើយើងមិនធ្វើអ្វីសោះ កាកសំណល់ប្លាស្ទិកនឹងមានច្រើនជាងត្រីនៅក្នុងមហាសមុទ្រនាឆ្នាំ ២០៦០
ការបំពុលដោយប្លាស្ទិកជាប្រធានបទនៃកិច្ចប្រជុំកំពូលអន្តរជាតិដែលនឹងរៀបចំក្នុងប្រទេសបារាំងពីថ្ងៃចន្ទ ទី២៩ ឧសភាដល់ថ្ងៃសុក្រ ទី២ មិថុនា។ កម្មវត្ថុនៃកិច្ចប្រជុំកំពូល គឺអនុម័តលើសន្ធិសញ្ញាមួយស្តីពីការប្រយុទ្ធប្រឆាំងនឹងការបំពុលដោយប្លាស្ទិកចំពោះបរិស្ថាន និងសុខភាពរបស់មនុស្សលោក។ តែមុននឹងកិច្ចប្រជុំកំពូលនេះឈានមកដល់ បារាំងបានរៀបចំកិច្ចប្រជុំថ្នាក់រដ្ឋមន្រ្តីការបទេស និងរដ្ឋមន្រ្តីបរិស្ថានមកពីប្រមាណ ៦០ប្រទេសក្នុងថ្ងៃសៅរ៍ ទី២៧ ឧសភា។ សម្រាប់សហភាពអឺរ៉ុប ប្រទេសបារាំង និងក្រុមប្រទេស ៥៥ប្រទេសទៀតយល់ថា គេត្រូវកាត់បន្ថយកាផលិតប្លាស្ទិក។ តែជំហរនេះត្រូវបានប្រទេសមួយចំនួនជំទាស់ដោយពួកគេចង់គិតគូរពីការគ្រប់គ្រងលើកាកសំណល់ប្លាស្ទិក និងចង់ឲ្យអាទិភាពលើការកៃច្នៃប្លាស្ទិកចាស់ៗដើម្បីប្រើឡើងវិញ។ ករណីនេះត្រូវបានរដ្ឋមន្រ្តីបរិស្ថានបារាំងលោកគ្រីស្តូហ្វ បេឈូលើកឡើងពីសហរដ្ឋអាមេរិក។
ចុះផ្សាយនៅថ្ងៃ៖
ស្តាប់ - ០២:០៣
« សហរដ្ឋអាមេរិកមានស្ថានភាពប្លែកខុសពីគេ ហើយបើខ្ញុំហ៊ាននិយាយ គឺជាប្រទេសដែលបានប្រើប្លាស្ទិកច្រើនជាងគេ។ បើគេគិតជារួមនៅក្នុងពិភពលោកទាំងមូល ការប្រើប្លាស្ទិករបស់មនុស្សម្នាក់ៗក្នុងមួយឆ្នាំមានបរិមាណចំនួន ៦០គីឡូក្រាម។ តែនៅសហរដ្ឋអាមេរិក ពលរដ្ឋម្នាក់ៗបានប្រើប្លាស្ទិកដល់ទៅ ២៦០គីឡូក្រាមក្នុងមួយឆ្នាំឯណោះ ខណៈដែលពលរដ្ឋអឺរ៉ុបម្នាក់ៗបានប្រើប្លាស្ទិកចំនួន ១៥០គីឡូក្រាមក្នុងមួយឆ្នាំ។
ម្យ៉ាងទៀត អ្វីដែលខុសគ្នារវាងសហរដ្ឋអាមេរិក និងប្រទេសខ្លះនៅត្រង់ថា ការប្រើប្លាស្ទិកនៅក្នុងប្រទេសខ្លះចាប់ផ្តើមធ្លាក់ចុះ ដូចករណីការធ្លាក់ចុះបន្តិចម្តងៗនៅក្នុងប្រទេសបារាំង ខណៈដែលនៅក្នុងប្រទេសផ្សេងទៀត ការប្រើប្លាស្ទិកបានកើនឡើងយ៉ាងខ្លាំង។ យើងបានដឹងថា ប្រទេសនៅអាស៊ី ប្រទេសនៅមជ្ឈិមបូព៌ា និងសហរដ្ឋអាមេរិកសុទ្ធសឹងជាប្រទេសផលិតប្លាស្ទិក។ តែឥឡូវនេះ អ្វីៗបាន និងកំពុងផ្លាស់ប្តូរ។
កាលពី ៦ខែមុន ពោលនៅមុនកិច្ចប្រជុំលើកទី១ អស់លោកអាចចោទសួរខ្ញុំថា តើគេអាចលើកយករឿងកាត់បន្ថយការប្រើប្រាស់ប្លាស្ទិកនេះទៅនិយាយជាមួយសហរដ្ឋអាមេរិក និងជប៉ុនដែរ ឬទេ។ ខ្ញុំអាចនិយាយបានថា ក្នុងរយៈពេលតែ ៦ខែ ជប៉ុនបានក្លាយពីប្រទេសដែលគេគិតថានឹងត្រូវនិយាយជំនះលើរឿងនេះទៅជាប្រទេសដែលបានចុះកិច្ចសន្យាកាត់បន្ថយការប្រើប្លាស្ទិកក្នុងកម្រិតខ្ពស់បំផុតដោយខ្លួនឯង។ ចាប់ពីពេលនេះត ទៅ ជប៉ុនបានស្ថិតក្នុងចំណោម ៥៥ប្រទេសដែលបានសន្យាយ៉ាងម៉ឹងម៉ាត់។
ដូច្នេះច្បាស់ណាស់ ផ្លូវនៅចំពោះមុខយើងគឺការពង្រីកបន្ថែមនូវចំនួនប្រទេសដែលសន្យាកាត់បន្ថយការប្រើប្លាស្ទិកជាមួយនឹងការចូលរួមរបស់សាធារណជនទូទៅ។ គ្មានប្រជាជនណាម្នាក់ក្នុងលោកនេះដែលមិនបានអើពើនឹងការបំពុលដោយប្លាស្ទិកទេ។ ចាប់ផ្តើមពីចំណុចនេះ គេមិនអាចលាក់បាំងពីការបំពុលដោយប្លាស្ទិកបានឡើយ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ