ប្លាស្ទិក ជាប្រភពបញ្ចេញឧស្ម័នផ្ទះកញ្ចក់លំដាប់ទី៥ពិភពលោក
ជំនួបចរចាស្វែងរកសន្ធិសញ្ញាអន្តរជាតិប្រឆាំងនឹងបរិស្ថានពុលដោយប្លាស្ទិក ចាប់បើកធ្វើនៅក្រុងប៉ារីស នាថ្ងៃចន្ទទី ២៩ឧសភារហូតដល់ថ្ងៃទី ២មិថុនា២០២៣។ ក្រោមការដឹកនាំរបស់អង្គការសហប្រជាជាតិ តំណាង១៧៥ប្រទេស ត្រូវប្រឹងប្រែងធ្វើយ៉ាងណាសម្រេចតាក់តែងច្បាប់ប្រឆាំងនឹងការបំពុលបរិស្ថានដោយប្លាស្ទិកឱ្យចេញជារូបរាងនៅដំណាច់ឆ្នាំ២០២៤។ ជាពេលវេលាដ៏ខ្លីណាស់សម្រាប់ការចរចាខ្នាតអន្តរជាតិ ដែលមានចរន្តពីរកំពុងប្រកួតប្រជែងគ្នាគឺ ម្ខាងចង់កំរិតនិងកាត់បន្ថយផលិតផលប្លាស្ទិក ឯម្ខាងទៀត ចង់ផ្តល់អាទិភាពដល់ការកែច្នៃប្លាស្ទិកឡើងវិញថាជាដំណោះស្រាយទល់នឹងសំរាមប្លាស្ទិក។
ចុះផ្សាយនៅថ្ងៃ៖
ស្តាប់ - ០១:១១
ក្រុមអ្នកការពារបរិស្ថានបានរិះគន់គម្រោងដែលផ្តោតលើការគ្រប់គ្រងសំរាមប្លាស្ទិក ថាជាការធ្វើសម្បទានដល់វិស័យប្លាស្ទិកនិងគីមីឥន្ធនៈ។ អង្គការGreepeace បានចេញរបាយការណ៍ផ្គុំលទ្ធផលស្រាវជ្រាវរបស់អ្នកវិទ្យាសាស្ត្រដែលលើកឡើងថា ដំណើរការកែច្នៃប្លាស្ទិកឡើងវិញ ក៏អាចបញ្ចេញធាតុគីមីយ៉ាងច្រើនទៅក្នុងបរិយាកាស។ គ្រប់គ្រងផលិតផលគីមីមានជាតិប្លាស្ទិក និងកាត់បន្ថយផលិតផលប្លាស្ទិកតែម្តង ទើបជាដំណោះស្រាយពិតនៃវិបត្តិប្លាស្ទិក។ មានធាតុគីមីប្រមាណ១៣០០០មុខត្រូវបានគេយកមកផ្សំសម្រាប់ផលិតវត្ថុប្លាស្ទិក ហើយក្នុងនោះ ជាង៣០០០ធាតុជាតំណាងគ្រោះថ្នាក់សម្រាប់សុខភាព។ នេះបើរបាយការណ៍របស់កម្មវិធីបរិស្ថានអង្គការសហប្រជាជាតិ(PNUE)។
ផលិតផលប្លាស្ទិក ដែលជាង៨០%នឹងក្លាយជាសំរាមក្នុងរយៈពេលមិនដល់មួយឆ្នាំផងនោះ ប៉ះពាល់ដល់បរិស្ថាននិងសុខភាពហើយ ដល់អាកាសធាតុទៀត។ បើតាមនាយិកាអង្គការគ្មានសំរាមប្លាស្ទិកបារាំង Zero waste France ប្រសិនបើរាប់សំរាមជាប្រទេស នោះវាត្រូវជាប់ចំណាត់ថ្នាក់ទី៥ ខាងបញ្ចេញឧស្ម័នផ្ទះកញ្ចក់នៅលើពិភពលោក។ ដូច្នេះពិភពលោកត្រូវតែបញ្ឈប់ការផលិតប្លាស្ទិក។
អ្នកស្រីនាយិកា Juliette Franquet ៖
“ប្លាស្ទិក ចាប់ជះឥទ្ធិពល តាំងពីដំណាក់កាលផ្តើមផលិតដែលប្រើថាមពលផូស៊ីល (ប្រេងកាតនិងឧស្ម័ន) និង លាយជាមួយសារធាតុគីមីបន្ថែមជាច្រើនមុខទៀតណាស់។ សារធាតុគីមីបន្ថែមនោះខ្លះពុល និង ខ្លះបង្កគ្រោះថ្នាក់ខ្លាំងណាស់ សម្រាប់បរិស្ថាន និងសុខភាពរបស់មនុស្សសត្វ។ មានពពូជសត្វសមុទ្ទយ៉ាងហោចជាង៧រយប្រភេទដែលកំពុងប្រឈមនឹងការគំរាមកំហែងដោយប្លាស្ទិក។ ផលិតផលប្លាស្ទិករាយប៉ាយដល់គ្រប់ទិសទីក្នុងរយៈពេលតែប៉ុន្មានទសវត្សរ៍។ ឥលូវនេះ ឱ្យតែចង់រក នោះគេនឹងឃើញភ្លាមប្លាស្ទិក នៅលើដី នៅក្នុងទឹក និងសូម្បីតែក្នុងខ្យល់ក៏មានដែរ។ ការសិក្សាបានបញ្ជាក់អំពីលទ្ធផលដ៏អាក្រក់ក្រៃ ដោយយើងស្រូបដង្ហើមនិងលេបប្លាស្ទិកជារៀងរាល់ថ្ងៃ ក្នុងបរិមាណប៉ុនក្រេឌីខាត ក្នុងសប្តាហ៍។ ដូច្នេះត្រូវបញ្ឈប់ការផលិតប្លាស្ទិកជាចាំបាច់បំផុត ប្រសិនបើចង់បញ្ចៀសសារធាតុពុលប្លាស្ទិកនេះ”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ