រុស្ស៊ី ថារារាំងការវាយលុករបស់អ៊ុយក្រែននៅភាគខាងកើត តែកៀវថារុលទៅមុខនៅBakhmout
ជាសង្គ្រាមព័ត៌មានឬយ៉ាងណា ? នៅថ្ងៃចន្ទទី ៥មិថុនានេះ រុស្ស៊ីបានប្រកាសរារាំងការវាយលុករបស់អ៊ុយក្រែននៅតំបន់ដុនបាស។ ក្រុងកៀវដែលបានប្រកាសត្រៀមលក្ខណៈតាំងពីជាច្រើនខែមកហើយ មិនបានបញ្ជាក់អំពីការបើកប្រតិបត្តិការវាយបកទ្រង់ទ្រាយធំ ដើម្បីដណ្តើមយកដែនដីវិញទេ។ តែអ៊ុយក្រែនថាបានរុញច្រានកងកម្លាំងរុស្ស៊ីនៅបាក់មូដ។
ចុះផ្សាយនៅថ្ងៃ៖
ស្តាប់ - ០២:២៤
ក្រសួងការពារជាតិរុស្ស៊ីបានអះអាង ដោយមិនលម្អិតថា សត្រូវបានបើកយុទ្ធនាការទ្រង់ទ្រាយធំ៥កន្លែង នៅតំបន់ដូណេតស្ក៍ នាថ្ងៃទី៤មិថុនា២០២៣ តែត្រូវបរាជ័យ មិនអាចសម្រេចផែនការឡើយ ព្រមទាំងរងការខាតបង់កម្លាំងទាហានប្រមាណ២៥០នាក់ទៀត។ នេះបើតាមសេចក្តីថ្លែងការណ៍ អមដោយរូបភាពវីដេអូថតពីលើអាកាសឃើញរថក្រោះអ៊ុយក្រែនរងការកម្ទេចពីសំណាក់កងកម្លាំងរុស្ស៊ីផង។ ប្រភពការពារជាតិរុស្ស៊ីដដែលនេះ បានបន្ថែមទៀតថា យោធាអ៊ុយក្រែនបានដឹកនាំបើកប្រតិបត្តិការវាយប្រហារដោយប្រើពលមេកានិច៦កង និងកងពលរថក្រោះពីរកង។ រុស្ស៊ីបានបញ្ជាក់ទៀតថានាយសេនាធិការកងទ័ពរុស្ស៊ីកំពុងស្ថិតប៉ុស្តិបញ្ជាការក្នុងតំបន់ដែលមានការវាយប្រហារពីអ៊ុយក្រែន។ តែនៅតំបន់ហ្សាប៉ូរីចា ទីតាំងរុស្ស៊ីរងការវាយប្រហារយ៉ាងខ្លាំង និងជាងកាលពី ម្សិលទៅទៀត ហើយស្ថានភាពកំពុងយាប់យឺនខ្លាំងណាស់ នេះបើតាមភ្នាក់ងារផ្លូវការរុស្ស៊ីTass។
អាជ្ញាធរអ៊ុយក្រែន មិនបានបញ្ជាក់ព័ត៌មានទាក់ទងនឹងហេតុការណ៍ប្រកាសដោយរុស្ស៊ីទេ។ តែកៀវធ្លាប់បានប្រកាសតាំងពីជាច្រើនខែមកហើយថាកំពុងត្រៀមបើកប្រតិបត្តិការវាយបកទ្រង់ទ្រាយធំដើម្បីដណ្តើមដែនដីមកវិញ។ នៅថ្ងៃអាទិត្យម្សិលមិញ អ៊ុយក្រែនបានបង្ហោះវីដេអូមួយដែរ បង្ហាញអំពីទិដ្ឋភាពទាហានអ៊ុយក្រែនទទួលការណែនាំឱ្យរក្សាភាព ស្ងប់ស្ងាត់ និងពុំធ្វើសេចក្តី ប្រកាសបើកប្រតិបត្តិការទេ។
ផ្ទុយទៅវិញ មេបញ្ជាការកងទ័ពជើងគោកអ៊ុយក្រែន បានបង្ហោះសារតាមបណ្តាញសង្គមនៅព្រឹកថ្ងៃចន្ទនេះថា កងកម្លាំងអ៊ុយក្រែនបានបន្តរុលទៅមុខ ក្នុងតំបន់បាក់មូដ ដែលរុស្ស៊ីចំណាយបង់ខាតយ៉ាងខ្លាំងទម្រាំដណ្តើមបានកាលពីថ្មីៗ។ មេដឹកនាំក្រុមទាហានស៊ីឈ្នួល វ៉ាក់ណែ ក៏បានបញ្ជាក់អំពីការរុលទៅមុខរបស់អ៊ុយក្រែននៅបាក់មូដ ថាបានកាន់កាប់ភូមិនៅភាគខាងជើងមួយចំណែក។ នេះបើតាមសារសំឡេងបង្ហោះដោយភ្នាក់ងារសារព័ត៌មានរបស់គេ។
ក្រៅអំពីការវាយប្រហាររបស់អ៊ុយក្រែននៅតំបន់ដុនបាស នៅថ្ងៃអាទិត្យម្សិលមិញ ក៏មានការប្រយុទ្ធគ្នាយ៉ាងសន្ធោសន្ធៅ រវាងទាហានរុស្ស៊ីនិងយុទ្ធជនរុស្ស៊ីគាំទ្រអ៊ុយក្រែន តាមតំបន់រុស្ស៊ីបែលហ្កូរូដ ជាប់ព្រំដែនអ៊ុយក្រែន។ នេះបើតាមអភិបាលតំបន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ