នាយករដ្ឋមន្ត្រីអង់គ្លេស ទៅអាមេរិកដើម្បីជជែកអំពីបច្ចេកវិទ្យានិងការការពារជាតិ
លោក រីស៊ី ស៊ូណាក់ នាយករដ្ឋមន្ត្រីអង់គ្លេស បានអញ្ជើញទៅដល់ក្រុងវ៉ាស៊ីនតោន នៅថ្ងៃល្ងាចថ្ងៃអង្គារម្សិលមិញ ដើម្បីបំពេញទស្សនកិច្ចរបស់ពេលពីរថ្ងៃ។ នៅរសៀលថ្ងៃព្រហស្បតិ៍ទី៨មិថុនា លោកស៊ូណាក់ នឹងចូលជួបលោកប្រធានាធិបតីអាមេរិក ចូបៃដិន ដើម្បីពិភាក្សាអំពីតួនាទីរបស់អង់គ្លេស ក្នុងវិស័យបច្ចេកវិទ្យាបញ្ញាសិប្បនិម្មិត នាពេលអនាគតផង និងក្នុងវិស័យការពារជាតិផង។
ចុះផ្សាយនៅថ្ងៃ៖
ស្តាប់ - ០១:៤៧
ឡុងដ៍ និងវ៉ាស៊ីនតោន មានជំហរតែមួយ មិនថាក្នុងជម្លោះនៅអ៊ុយក្រែន ឬការប្រឈមជាមួយចិនទេ តែលោកនាយករដ្ឋមន្ត្រីស៊ូណាក់ ត្រូវការចង់ពង្រឹងតួនាទីរបស់អង់គ្លេសនៅលើឆាកអន្តរជាតិបន្ថែមទៀត ក្រោយពីចាកចេញពីអឺរ៉ុបផង និងកម្តៅទំនាក់ទំនងអាមេរិក-អង់គ្លេស ដែលធ្លាក់ចុះខ្លាំងក្រោមរដ្ឋបាលរបស់ប្រមុខរដ្ឋាភិបាលអង់គ្លេសពីររូបមុន គឺលោក បូរីស ចនស៊ុន និងលោកស្រី លីស ទ្រូស្ស៍ ឱ្យប្រសើរឡើងវិញផង។
ជាងនេះទៅទៀត បើតាមសារព័ត៌មានអង់គ្លេស លោក ស៊ូណាក់ ប្រាថ្នាជួប ជាមួយប្រធានាធិបតីអាមេរិកចូបៃដិន នៅសេតវិមាន ដើម្បីស្វែងរកការគាំទ្រពីអាមេរិក ឱ្យគាំទ្រសំណើសុំដាក់ទីតាំងអនាគតការិយាល័យគ្រប់គ្រង់បញ្ញាសិប្បនិម្មិត នៅទីក្រុងឡុងដ៍ ដែលធ្លាប់មានបទពិសោធន៍ និងវត្តមានផ្នែកបច្ចេកវិទ្យាច្រើន។ ប៉ុន្តែ សហរដ្ឋអាមេរិកកំពុងពិភាក្សាដោយផ្ទាល់ជាមួយសហភាពអឺរ៉ុប ដើម្បីដាក់ឱ្យដំណើរការពាក្យសន្យារបស់ក្រុមប្រទេសមហាឧស្សាហកម្មG៧ កាលពីខែមុន ជុំវិញការប្រើប្រាស់ប្រកបដោយទំនួលខុសត្រូវបច្ចេកវិទ្យាបញ្ញាសិប្បនិម្មិត។ ថ្វីបើក្នុងផ្នែកបញ្ញាសិប្បនិម្មិតនិងពាណិជ្ជកម្ម អាមេរិក មានជំហរស្របគ្នាខ្លាំងនឹង អង់គ្លេស ជាងជាមួយសហភាពអឺរ៉ុបក៏ដោយ ក៏បើតាមអ្នកវិភាគលោកចូបៃដិន ទំនងជាមិនបណ្តោយតាមទេ។
សង្គ្រាមអ៊ុយក្រែន ជាសំណុំរឿងដ៏ចម្បង នៃជំនួបរវាងលោកស៊ូណាក់នឹងលោកបៃដិន ដោយមិនរំលងឡើយសំណុំរឿងការពារជាតិ។ បើតាមសារព័ត៌មានអង់គ្លេសមួយចំនួនធំ លោកស៊ូណាក់ ចង់រុញរដ្ឋមន្ត្រីការពារជាតិអង់គ្លេសឱ្យបានក្លាយជាប្រធានអង្គការអូតង់ ជំនួសលោក ស្តុលទែនប៊ែរ ដែលនឹងផុតអាណត្តិនៅខែតុលាខាងមុខ។ តែអ្នកនាំពាក្យក្រុមប្រឹក្សាសន្តិសុខអាមេរិក ថាអាមេរិកមានជំហរប្រយ័ត្នប្រយែងខ្លាំងដែរ ដោយសមាជិកអឺរ៉ុបមួយចំនួនចង់ឃើញមេដឹកនាំអូតង់ថ្មីជាស្ត្រី ជាលើកទីមួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ