ការសិក្សាបារាំង ៖ មេឃក្តៅខ្លាំង (ធម្មតា) ក៏អាចជាកត្តាមរណៈមួយដែរ
ក្នុងបរិបទនៃការប្រែប្រួលអាកាសធាតុ ដែលអមដោយការឡើងកម្តៅសីតុណ្ហភាពខុសប្រក្រតី ភ្នាក់ងារសុខភាពសាធារណៈបារាំង បានអះអាងនៅថ្ងៃសុក្រទី ២៣មិថុនានេះថា កម្តៅមានឥទ្ធិពលអាក្រក់ខ្លាំងលើអត្រាមរណៈនៅក្នុងប្រទេសបារាំង ក្នុងអំឡុងរដូវក្តៅ។ តាំងពីឆ្នាំ២០១៤ដល់ឆ្នាំ២០២២ មានមនុស្សប្រមាណពី ៣ម៉ឺនទៅបីម៉ឺនប្រាំពាន់នាក់ បានស្លាប់ ដោយហេតុតែអាកាសធាតុក្តៅ មិនចាំទាល់តែមានរលកកម្តៅខ្លាំងហួសហេតុនោះឡើយ។
ចុះផ្សាយនៅថ្ងៃ៖
ស្តាប់ - ០២:២០
ក្នុងអំឡុងពេលមានរលកកម្តៅខ្លាំងហួសហេតុម្តងៗ មានមនុស្សច្រើននាក់ណាស់បានបាត់បង់ជីវិត។ ភ្នាក់ងារសុខភាពសាធារណៈបារាំងធ្លាប់បានផ្តល់តួលេខទាក់ទងនឹងកំណើនមរណភាព ពេលមានរលកកម្តៅខ្លាំងហួសប្រមាណម្តងៗ។ ឧទាហរណ៍ នៅឆ្នាំ២០២២ រលកកម្តៅខ្លាំងហួសហេតុបីលើក បានធ្វើអត្រាមរណៈឡើងច្រើនលើសប្រក្រតីចំនួន៣ពាន់នាក់។
ប៉ុន្តែបើតាមការសិក្សាថ្មីចេញផ្សាយដោយអាជ្ញាធរសុខាភិបាលបារាំងនៅថ្ងៃសុក្រនេះ នារដូវក្តៅ សីតុណ្ហភាពក្តៅខ្លាំងធម្មតា ក៏អាចសម្លាប់មនុស្សបានដែរ។ នៅរដូវក្តៅពីឆ្នាំ២០១៤ដល់ឆ្នាំ២០២២ បារាំងសម្គាល់ឃើញមាន មរណភាពដោយហេតុអាកាសធាតុក្តៅប្រមាណពី ៣ម៉ឺន ទៅ៣៥០០០នាក់ ក្នុងនោះ មួយភាគបី មានអាយុក្រោម៧៥ឆ្នាំ។ ហើយបីភាគបួននៃមរណភាពដោយកម្តៅ នៅក្រៅរយៈពេលមានរលកកម្តៅខ្លាំង។
ដើម្បីអាចចេញសេចក្តីសន្និដ្ឋាននេះបាន ការសិក្សាបានប្រើវិធីសាស្ត្រគណនាដ៏ស្មុគស្មាញ ពិបាកពន្យល់ណាស់ និងជាការប៉ាន់ប្រមាណទេ។ កំរិតមរណភាពខ្ពស់ពិតក៏អាស្រ័យផងដែរទៅលើជម្រើសនៃ វិធីគណនា។ តែនេះជាលើកទីមួយដែលមានការសិក្សាវាយតម្លៃអំពី អត្រាមរណភាព ក្នុងអំឡុងពេលមានសីតុណ្ហភាពក្តៅ ព្រមទាំងសាកល្បងញែកឱ្យឃើញថាកម្តៅធម្មតា ក៏ជាអាចកត្តាមរណៈ ប៉ះពាល់ដល់សុខភាពមួយដែរ មិនមែនបាច់ទាល់តែជាអាកាសធាតុក្តៅខ្លាំងហួសហេតុទេ។
បារាំងបានចាប់អារម្មណ៍គិតគូរនិងមានវិធានការជាពិសេស អំពីសុខភាពសាធារណៈនៅពេលមេឃឡើងកម្តៅតាំងពីឆ្នាំ២០០៣ ដែលកាលណោះរលកកម្តៅ បានសម្លាប់ជីវិតពលរដ្ឋបារាំង ភាគច្រើនជាមនុស្សចាស់អស់ ១៥០០០នាក់។ ប៉ុន្តែសម្រាប់អ្នកស្រាវជ្រាវរបស់ភ្នាក់ងារសុខភាពសាធារណៈបារាំង ការផ្តុំគំនិតលើតែរលកកម្តៅខ្លាំង ជាការមើលស្រាលឥទ្ធិពលនៃភាពក្តៅធម្មតាចំពោះសុខភាព និងពិសេសមរណភាព។ ប្រឈមនឹងកម្តៅអាចនាំឱ្យមនុស្សគ្រប់វ័យស្លាប់បានទាំងអស់។ នេះបើតាមប្រធានភ្នាក់ងារសុខាភិបាលបារាំងដដែល។ ការសិក្សាចេញផ្សាយចំពេលដែលឧតុនិយមបារាំងបានព្រមានអំពីគ្រោះក្តៅខ្លាំង អាចលើសកំរិតធម្មតា ក្នុងរដូវក្តៅ ខែមិថុនាកក្កដានិងសីហាខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ