លោកប្លីងកិន៖ ការបះបោររបស់ទាហានវ៉ាក់ណែបង្ហាញមុខមាត់ពិតនៃការប្រេះស្រាំក្នុងជួរថ្នាក់ដឹកនាំរុស្ស៊ី
ការបះបោររបស់ពួកទាហានស៊ីឈ្នួលវ៉ាក់ណែ ដើម្បីផ្ចាញ់ផ្ចាលថ្នាក់ដឹកនាំរុស្ស៊ី មានរយៈពេលខ្លីតែមួយថ្ងៃគត់ បន្ទាប់ពី មេទាហានវ៉ាក់ណែយល់ព្រមដកទ័ពចេញពីរុស្ស៊ី កាលពីថ្ងៃអាទិត្យទី ២៥មិថុនា ជាថ្នូរនឹងការលើកលែងទោសពីរដ្ឋអំណាចរុស្ស៊ី ដែលបើកការស៊ើបអង្កេតឧក្រិដ្ឋកម្មប្រឆាំង មេទាហានវ៉ាក់ណែ។ សម្រាប់ប្រមុខការបរទេសអាមេរិក លោកអង់តូនី ប្លីងកិន ទាហានបះបោរវ៉ាក់ណែដកខ្លួនចេញពីទីក្រុងរុស្ស៊ី Rostov មែន ប៉ុន្តែ ភាពជ្រួលច្របល់មិនទាន់ចប់ នៅរុស្ស៊ី ហើយនឹងជះឥទ្ធិពលអាក្រក់ទៅលើប្រតិបត្តិការយោធារបស់រុស្ស៊ី នៅក្នុងសង្រ្គាមអ៊ុយក្រែន។
ចុះផ្សាយនៅថ្ងៃ៖
ស្តាប់ - ០២:៥១
បន្ទាប់ពីតាមដាន និងពិភាក្សាជាប្រចាំជាមួយសម្ព័ន្ធមិត្តអឺរ៉ុប ស្តីពីជម្លោះផ្ទៃក្នុងប្រទេសរុស្ស៊ី ប្រមុខការបរទេសអាមេរិក លោកអង់តូនី ប្លីងកិនបានធ្វើអត្ថាធិប្បាយជាលើកទី១ ពីស្ថានការណ៍នៅរុស្ស៊ី។ សម្រាប់រដ្ឋមន្រ្តីការបរទេសអាមេរិក ការបះបោររបស់ទាហានស៊ីឈ្នួលវ៉ាក់ណែ ដែលលើកគ្នាចូលកាន់កាប់ទីស្នាក់ការកងទ័ពរុស្ស៊ី នៅRostov និងដង្ហែរក្បួនសំដៅម៉ូស្គូ ដោយគ្មានឧបសគ្គ រារាំងពីខាងកងទ័ពរុស្ស៊ី គឺជាការផ្ចាញ់ផ្ចាលដោយផ្ទាល់នឹងអំណាចរបស់ប្រធានាធិបតីរុស្ស៊ី លោកពូទីន។ ម្យ៉ាងវាបានបង្ហាញពីអំណាចប្រេះស្រាំរបស់លោកពូទីន។
តាមប្រមុខការបរទេសអាមេរិក ហេតុការណ៍នៅទីក្រុងម៉ូស្គូ នៅចុងសប្តាហ៍នេះ ជាព្រឹត្តិការណ៍មិននឹកស្មានដល់ ព្រោះថា សម្ព័ន្ធមិត្តដ៏ជិតស្និទ្ធរបស់លោកពូទីន និងកម្លាំងទាហានស៊ីឈ្នួលវ៉ាក់ណែ ដែលលោកពូទីនជាអ្នកបញ្ជូនទៅធ្វើសង្រ្គាមនៅអ៊ុយក្រែន ស្រាប់តែបែរងាកមកប្រឆាំងមេដឹកនាំរុស្ស៊ី និងគំរាមកំហែងអំណាចកណ្តាលរបស់វិមានក្រេមឡាំង។
“កាលពី១៦ខែមុន កងទ័ពរុស្ស៊ីបានឈ្លានពានវាយចូលជិតដល់មាត់ទ្វាររដ្ឋធានីកៀវរបស់អ៊ុយក្រែន។ ប៉ុន្តែ នៅចុងសប្តាហ៍នេះ កងទ័ពរុស្ស៊ីត្រូវពង្រាយចាំការពាររដ្ឋធានីម៉ូស្គូ របស់រុស្ស៊ី ពីការគំរាមកំហែងរបស់ពួកទាហានស៊ីឈ្នួលវ៉ាក់ណែ ដែលលោកពូទីនខ្លួនឯងជាអ្នកបង្កើតឡើង”។ នេះជាប្រសាសន៍របស់រដ្ឋមន្រ្តីការបរទេសអាមេរិក មុននឹងបន្ថែមថា មេទ័ពស៊ីឈ្នួលវ៉ាក់ណែ លោកព្រីហ្គោហ្ស៊ីនផ្ទាល់ ក៏បានចោទសួរពីគោលដៅធ្វើសង្រ្គាមរបស់រុស្ស៊ីនៅអ៊ុយក្រែន។
នៅក្នុងសារតេឡេក្រាម ដើម្បី អំពាវនាវឲ្យប្រជាជនរុស្ស៊ីចូលរួមជាមួយខ្លួនដើម្បីនឹងប្រឆាំងមេដឹកនាំយោធារុស្ស៊ី មេវ៉ាក់ណែនិយាយថា សង្រ្គាមរុស្ស៊ីនៅអ៊ុយក្រែនមិនមែនធ្វើឡើងដើម្បីប្រជាជនរុស្ស៊ី ប៉ុន្តែ ដើម្បីផលប្រយោជន៍របស់មេអំណាចធំៗនៅរុស្ស៊ី។ មួយវិញទៀត អ៊ុយក្រែន និងអូតង់ មិនបានគំរាមកំហែងរុស្ស៊ី ដូចការលើកឡើងរបស់ថ្នាក់ដឹកនាំរុស្ស៊ី។
សម្រាប់រដ្ឋមន្រ្តីការបរទេស ការប្រេះស្រាំនៃអំណាចរបស់លោកពូទីននឹងអាចជះឥទ្ធិពលមួយផ្នែកទៅលើសតិអារម្មណ៍របស់កងទ័ពរុស្ស៊ី ដែលធុញទ្រាន់ លែងជឿទុកចិត្ត និងលែងចង់ដើរតាមថ្នាក់ដឹកនាំ ក្នុងការធ្វើសង្រ្គាមនៅអ៊ុយក្រែន។ វានឹងជួយអ៊ុយក្រែនទាញផលប្រយោជន៍បានខ្លះ ប៉ុន្តែ ប្រមុខការបរទេសអាមេរិកប្រយ័ត្នប្រយែង មិនទាន់ហ៊ាននិយាយថា ជម្លោះផ្ទៃក្នុងនៅរុស្ស៊ី នឹងអាចជះឥទ្ធិពល ធ្វើឲ្យមានការប្រែប្រួលធំដុំ នៅក្នុងសង្រ្គាមអ៊ុយក្រែន។
ក្រសួងការបរទេសរុស្ស៊ី តាំងពីថ្ងៃសៅរ៍បានព្រមានប្រទេសលោកខាងលិច កុំឲ្យកេងចំណេញ ពីបញ្ហាផ្ទៃក្នុងរបស់រុស្ស៊ី។ ចំណែកអ្នកនាំពាក្យរបស់វិមានក្រេមឡាំងថា ហេតុការណ៍នៅចុងសប្តាហ៍មិនប៉ះពាល់ដល់ប្រតិបត្តិការពិសេសរបស់រុស្ស៊ី នៅអ៊ុយក្រែន។ នៅចុងសប្តាហ៍នេះ កងទ័ពរុស្ស៊ីនៅបានវាយរុញច្រានទាហានអ៊ុយក្រែន នៅភាគកើត និងខាងត្បូងអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ