អ្នកវិភាគ៖ លោកខាងលិច មិនចង់ឲ្យលោកពូទីនឈ្នះ តែក៏មិនចង់ឃើញរុស្ស៊ីចលាចលវឹកវរដោយសាររបបពូទីនដួលរលំដែរ
ព្រឹត្តិការណ៍បះបោររបស់ក្រុមទាហានស៊ីឈ្នួល Wagner ដែលប៉ុនប៉ងផ្តួលរំលំរដ្ឋាភិបាលរុស្ស៊ី បានធ្វើឲ្យបណ្តាប្រទេសលោកខាងលិច មានភ្ញាក់ផ្អើលជាខ្លាំង។ វាបានបង្ហាញឲ្យឃើញពីការប្រេះស្រាំ មិនមានអ្វីទប់ឲ្យរឹងមាំខ្លាំងនោះឡើយ នៅក្នុងរបបដឹកនាំរបស់លោកពូទីន។ តែយ៉ាងណាក៏ដោយ ប្រតិកម្មពីក្រុមប្រទេសលោកខាងលិច មានអាមេរិក អង់គ្លេស និងបណ្តាប្រទេសសហភាពអឺរ៉ុបជាដើម គឺគេមានប្រុងប្រយ័ត្នខ្លាំងណាស់ ដោយមិនបង្ហាញការត្រេកអរ សប្បាយចំពោះការចុះខ្សោយនៃអំណាចរបស់លោកពូទីននោះទេ។
ចុះផ្សាយនៅថ្ងៃ៖ កែប្រែថ្ងៃទី៖
សម្រង់បទសម្ភាសន៍របស់លោក Frédéric Charillon សាស្ត្រាចារ្យជំនាញទំនាក់ទំនងអន្តរជាតិ នៅ Essec Business School
« យើងកំពុងស្ថិតនៅក្នុងកាលៈទេសៈ ដែលគ្រប់គ្នាមិនចង់ឲ្យរុស្ស៊ី ធ្លាក់ចូលទៅក្នុងស្ថានការណ៍ដែលអាក្រក់ ជាងនេះនោះទេ។
ខ្ញុំមិនហ៊ានថា ដូចក្នុងករណី បាឆា អាល់អាសាដនោះឡើយ។ យើងទាំងអស់គ្នានៅចាំទេ កាលនោះ មេដឹកនាំផ្តាច់ការស៊ីរី បាឆា អាល់អាសាដ ត្រូវគេថ្កោលទោស ស្តីបន្ទោសពីគ្រប់ទិសទី ថាបានធ្វើអាក្រក់យ៉ាងណានៅស៊ីរី។ តែទន្ទឹមគ្នានោះ មានមតិមួយចំនួនទៀត គេគិតថា បើរបប បាឆា អាល់អាសាធ រលំ គឺស្ថានការណ៍នឹងចលាចល ក្រឡាប់ចាក់ទាំងស្រុង។
សម្រាប់កាលៈទេសៈនៅរុស្ស៊ីពេលនេះ គឺខ្ញុំយល់ឃើញថា វាមិនខុសគ្នាប៉ុន្មានទេ។ ពោលគឺ មតិតាមដានពីខាងក្រៅមានការស្ទាក់ស្ទើ និង ទើសទាល់ណាស់។ និយាយឲ្យចំទៅ សឹងតែគ្រប់រដ្ឋាភិបាលប្រទេសលោកខាងលិច ធ្លាប់បានលើកឡើងថា ក្នុងសង្រ្គាមនៅអ៊ុយក្រែន គឺមិនត្រូវទុកឲ្យពូទីន ឈ្នះជាដាច់ខាត។ តែទន្ទឹមគ្នានេះ គេចោទជាសំណួរថា ចុះបើរបបដឹកនាំរបស់ពូទីន ស្រាប់តែដួលរលំភ្លាមៗ តើស្ថានការណ៍នៅរុស្ស៊ី នឹងទៅជាយ៉ាងណា? តើរវាងការដួលរលំនៃរបបពូទីន និងភាពចលាចលវឹកវរ សង្គ្រាមស៊ីវីលនៅរុស្ស៊ី តើគួរជ្រើសយកមួយណា? »
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ