អ៊ុយក្រែន វាយប្រហារលើ ជំរំយោធារបស់រុស្ស៊ី ផ្ទុះឆេះច្រើនកន្លែង នៅគ្រីមេ
ក្នុងតំបន់គ្រីមេ នាថ្ងៃសៅរ៍ មានការវាយប្រហារជាច្រើន ទៅលើ ស្ពាន និងមូលដ្ឋានជំរំយោធារបស់រុស្ស៊ី ដែលបណ្តាលឲ្យផ្ទុះឆេះជាច្រើនកន្លែង។ ចំណែកប្រជាពលរដ្ឋជាច្រើនពាន់នាក់ ត្រូវរដ្ឋអំណាចតំបន់គ្រីមេ ណែនាំឲ្យរត់រកកន្លែងសុវត្ថិភាព។ បើតាមអាជ្ញាធររុស្ស៊ីនៅតំបន់គ្រីមេផ្ទាល់ គឺការវាយប្រហារនេះ ជាស្នាដៃរបស់អ៊ុយក្រែន ក៏ប៉ុន្តែ ភាគីអ៊ុយក្រែនពុំបានអះអាងថាជាទង្វើរបស់ខ្លួន នោះឡើយ។ ភ្លាមៗ ប្រធានាធិបតីរុស្ស៊ី វ្ល៉ាឌីមៀរ ពូទីន បានសន្យាដាច់ខាតថានឹងវាយបកទៅវិញ ឲ្យសមនឹងទង្វើ។
ចុះផ្សាយនៅថ្ងៃ៖
អាជ្ញាធរតំបន់គ្រីមេ ដែលគាំទ្ររុស្ស៊ី បានចោទប្រកាន់ទៅលើ អ៊ុយក្រែន ថាបានប្រើយន្តហោះដ្រូនបាញ់ប្រហារ បំផ្ទុះកន្លែងស្តុកអាវុធយោធារុស្ស៊ី ហើយនិង បាញ់កម្ទេចស្ពាន និងកន្លែងផ្សេងទៀត នៅក្នុងតំបន់គ្រីមេ នាប៉ុន្មានថ្ងៃជាប់គ្នាមកនេះ។ នេះបើតាមការលើកឡើងរបស់ អភិបាលតំបន់គ្រីមេ លោក Sergueï Aksionov ដែលជ្រើសតាំងបន្ទុបដោយរដ្ឋអំណាចក្រុងម៉ូស្កូ។ អភិបាលតំបន់គ្រីមេ រូបនេះ បានឲ្យដឹងទៀតថា ប្រជាពលរដ្ឋរស់នៅក្បែរកន្លែងផ្ទុះ ត្រូវណែនាំឲ្យចេញឆ្ងាយប្រមាណ ៥គីឡូម៉ែត្រ ដើម្បីបញ្ជៀសគ្រោះថ្នាក់ហានិភ័យ។
គេបានសង្កេតឃើញថា ពលរដ្ឋមួយចំនួននៅគ្រីមេ កំពុងតែភ័យបារម្ភពីសុវត្ថិភាព ហើយបានភៀសខ្លួន ដែលនាំឲ្យមានបញ្ហាកក់ស្ទះចរាចរណ៍ជាច្រើនកន្លែង ទាំងផ្លូវគោក និងផ្លូវដែក។ ការកក់ស្ទះផ្លូវ ក៏ជាចំណែកមួយ នៃការវាយប្រហារទៅលើស្ពាន គែរឆឺ ( Kertch) ដែរ។ ស្ពាននេះ តភ្ជាប់ពីប្រទេសរុស្ស៊ី ទៅកាន់ដែនដីកោះគ្រីមេ បន្ទាប់ពី រុស្ស៊ី បានលេបត្របាក់យក គ្រីមេ ក្នុងការឧបសម្ព័ន្ធរបស់ខ្លួន នៅឆ្នាំ២០១៤។
នៅថ្ងៃសៅរ៍ ស្ពានគែរឆឺ Kertch ត្រូវរងការវាយប្រហារជាថ្មី បន្ទាប់ពីឆ្នាំមុន ត្រូវរងគ្រោះពីការបំផ្ទុះរួចម្តងហើយ។ កាលពីថ្ងៃសុក្រ ក្នុងវេទិកាសន្តិសុខ Colorado ប្រធានាធិបតីអ៊ុយក្រែន វ៉ូឡូឌីមៀរ ហ្សេឡេនស្គី មានប្រសាសន៍លើកឡើងថា ស្ពាននេះ បានសាងសង់ឡើងដោយរំលោភបំពានខុសផ្ទុយអំពីច្បាប់អន្តរជាតិ និងគួរតែត្រូវ«កម្ទេចចោល»។
នៅក្នុងវេទិកាសន្តិសុខ នេះដែរ អ្នកទីប្រឹក្សាការទូត របស់ប្រធានាធិបតីបារាំង បានប្រកាសថា ប្រទេសចិន បានផ្តល់គ្រឿងសម្ភារៈបរិក្ខារយោធាឲ្យ រុស្ស៊ី ទៅប្រើក្នុងសង្គ្រាមច្បាំងអ៊ុយក្រែន។ អ្នកទីប្រឹក្សាការទូតបារាំង បញ្ជាក់ថា ចិនប៉េកាំង ផ្តល់បច្ចេកវិទ្យាមុខពីរដល់រុស្ស៊ី សម្រាប់វិស័យយោធាផងនិងស៊ីវិលផង។
ពីភាគីក្រុងមូស្កូវិញ តាមការប្រកាសរបស់ក្រសួងការពារជាតិរុស្ស៊ី គឺ នៅថ្ងៃសៅរ៍ អ្នកកាសែតរុស្ស៊ីម្នាក់លោក Rostislav Jouravlev ធ្វើការឲ្យទីភ្នាក់ងារសារព័ត៌មានរុស្ស៊ី Ria Novosti បានស្លាប់បាត់បង់ជីវិត ហើយអ្នកកាសែតរុស្ស៊ីបីបួននាក់ទៀត ក៏រងរបួសដែរ ពីព្រោះតែការវាយប្រហារនិងទម្លាក់គ្រាប់បែករបស់អ៊ុយក្រែន នៅតំបន់ Zaporijjiaប៉ែកខាងត្បូងអ៊ុយក្រែន។ អាជ្ញាធររុស្ស៊ី ចោទប្រកាន់ទៀតថា អ៊ុយក្រែនប្រើគ្រាប់បែកចង្កោមសម្លាប់អ្នកកាសែតរុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ