សង្គ្រាមអ៊ុយក្រែន៖ តើប្រតិបត្តិការវាយបកយកទឹកដីវិញឈានដល់ណា?
មានតែការសុំចុះចាញ់ទេ ទើបរុស្ស៊ីព្រមបញ្ឈប់ប្រតិបត្តិការយោធានៅអ៊ុយក្រែន។ នេះជាការសេចក្តីថ្លែងការណ៍របស់ម៉ូស្គូនៅថ្ងៃចន្ទទី៧សីហា ត្រូវជាមួយថ្ងៃក្រោយការបិទបញ្ចប់ជំនួបប្រជុំស្តីពីអ៊ុយក្រែននៅអារ៉ាប៊ីសាអូឌីតដែលភាគីអ៊ុយក្រែនយល់ថាមានលក្ខណៈបែបស្ថាបនា តែជាបរាជ័យសម្រាប់រុស្ស៊ី។ នៅថ្ងៃអាទិត្យម្សិលមិញ រុស្ស៊ីបានបើកការវាយប្រហារតាមផ្លូវអាកាសយ៉ាងសន្ធាប់ជាថ្មី ដោយបានអះអាងថាបានវាយចំមជ្ឈមណ្ឌលសាងសង់យានអាកាស នៅភាគខាងលិចប្រទេសអ៊ុយក្រែនផង។ ចំណែកអ៊ុយក្រែន ដែលបានប្រតិបត្តិការវាយបកយកទឹកដីវិញ តាំងពីពីរខែមក ត្រូវការកាន់តែច្រើនឡើងៗអាវុធយុទ្ធភណ្ឌពីសម្ព័ន្ធមិត្ត។
ចុះផ្សាយនៅថ្ងៃ៖
ស្តាប់ - ០២:១១
ទ័ពអាកាសអ៊ុយក្រែនបានអះអាងអំពីការកម្ចាត់មីស៊ីលបណ្តែតរុស្ស៊ីបានប្រមាណពី៣០ទៅ៤០គ្រាប់ និងដ្រូនរុស្ស៊ីផលិតដោយអ៊ីរ៉ង់ទាំងអស់។ តែរុស្ស៊ីក៏មានប្រើមីស៊ីលអ៊ីពែរសូនិកដែលពិបាកចាប់សញ្ញា និងធ្លាក់ត្រូវចំមូលដ្ឋានទ័ពអាកាសអ៊ុយក្រែន ក្នុងតំបន់ភាគខាងលិចអ៊ុយក្រែនឆ្ងាយពីសមរភូមិជួរមុខ។ នេះបើតាមសារតេឡេក្រាមរបស់ក្រសួងការពារជាតិរុស្ស៊ី។ អ្នកទទួលខុសត្រូវមូលដ្ឋានបានបញ្ជាក់ថាមានការវាយប្រហារបីលើកតាំងពីល្ងាចថ្ងៃសៅរ៍មក ដោយធ្វើឱ្យខូចខាតចំណតរថយន្ត អគារជាច្រើន និងឃ្លាំងស្តុកសំណល់ពោត។
រុស្ស៊ីបានសម្រុកវាយប្រហារយ៉ាងខ្លាំងនារយៈពេលប៉ុន្មានថ្ងៃមកនេះ។ កាលពីថ្ងៃសៅរ៍ ប្រធានាធិបតីអ៊ុយក្រែនលោកហ្សេឡេនស្គី បានរៀបរាប់អំពីការវាយប្រហាររុស្ស៊ីមកលើអគារនៃមជ្ឈមណ្ឌលស្ថាបនាយន្តហោះMotor Sich ដែលមានទីស្នាក់ការនៅក្រុងហ្សាប៉ូរីចា ភាគខាងត្បូងដែលកាន់កាប់មួយភាគដោយរុស្ស៊ី និងការវាយប្រហារលើមជ្ឈមណ្ឌលបញ្ចូលឈាមនៅKoupiansk ក្រុងកៀកខ្សែប្រយុទ្ធនៅភាគឥសានប្រទេស។ ការផ្លោងទម្លាក់គ្រាប់នោះបានបង្កឱ្យមានមនុស្សស្លាប់និងរបួសជាច្រើននាក់ទៀត។
ប៉ុន្តែរុស្ស៊ីក៏រងការវាយប្រហារផ្លូវអាកាសពីសំណាក់អ៊ុយក្រែនវិញដែរ។ អ៊ុយក្រែនបានជ្រើសរើសបើកប្រតិបត្តិការវាយបកយកទឹកដីវិញ ជាច្រើនមុខព្រួញ៖ នៅភាគខាងត្បូងក្នុងតំបន់ប៊ែរហ្យង់និងបេលីតូប៉ូល តំបន់ហ្សាប៉ូរីចា និងខាងកើតក្នុងតំបន់ដូណេតស្ក៍ពិសេសជុំវិញបាក់ម៉ូតដោយរុលទៅមុខបានយ៉ាងលឿន។ ក្រៅអំពីការរំកិលលើសមរភូមិប្រយុទ្ធ អ៊ុយក្រែនក៏សម្រុកវាយប្រហារលើបណ្តាញផ្គត់ផ្គង់កម្លាំងដល់យោធារុស្ស៊ី ជាស្ពានយុទ្ធសាស្ត្រពីរ ដែលតភ្ជាប់តំបន់ឃែរសុនក្រោមកណ្តាប់ដៃរុស្ស៊ីទៅតំបន់គ្រីមេ កាលពីចុងសប្តាហ៍កន្លងទៅ។ ស្ពានទាំងពីររងការខូចខាតជាដំណំ ដែលជំរុញឱ្យរុស្ស៊ីត្រូវបង្ខំចិត្តងាកទៅប្រើផ្លូវនៅប៉ែកខាងកើត សម្រួលការវាយប្រការរបស់កងកាំភ្លើងធំអ៊ុយក្រែន។ ស្ថានភាពបែបនេះ ផ្តល់ប្រៀបច្រើនដល់កងកម្លាំងអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ