ស្លាប់ស៊ីវិល៦នាក់ ទារកម្នាក់ ក្នុងការវាយប្រហាររុស្ស៊ីលើភាគខាងត្បូងអ៊ុយក្រែន
ក្នុងខណៈដែលយោធាអ៊ុយក្រែនប្រកាសរុលដណ្តើមបានដី៣គីឡូម៉ែត្រការ៉េ នៅតំបន់ភាគកើតជិតបាក់មូដ យោធារុស្ស៊ីក៏សម្រុកវាយប្រហារថ្មីទៀតដែរ។ ការវាយប្រហារលើតំបន់Kherson ភាគខាងត្បូងអ៊ុយក្រែនបានផ្តាច់ជីវិតជនស៊ីវិលយ៉ាងហោច៧នាក់ ក្នុងនោះម្នាក់ជាទារកអាយុទើបបាន២៣ថ្ងៃ និងម្នាក់ជាកុមារអាយុ១២ឆ្នាំ ក្នុងគ្រួសារតែមួយ។ នេះបើតាមសេចក្តីប្រកាសរបស់អាជ្ញាធរអ៊ុយក្រែន។ ចំណែកបារាំងបានប្រកាសបានថ្កោលទោសទង្វើវាយប្រហាររបស់រុស្ស៊ីលើជនស៊ីវិលនេះភ្លាម។
ចុះផ្សាយនៅថ្ងៃ៖
ស្តាប់ - ០២:០៣
នៅក្នុងសារបង្ហោះតាមបណ្តាញតេឡេក្រាម រដ្ឋមន្ត្រីក្រសួងមហាផ្ទៃអ៊ុយក្រែន លោកIgor Klymenko បានប្រកាសថាមានមនុស្សធំបីនាក់ និងក្មេងពីរនាក់ ក្នុងគ្រួសារតែមួយ នៅភូមិChyroka Balka និងមនុស្សពីរនាក់ទៀតនៅភូមិStanislav នៃតំបន់ឃែរសុន បានស្លាប់ដោយរងការវាយប្រហាររបស់រុស្ស៊ី ។ គ្រាប់ផ្លោងរបស់សត្រូវបានផ្តាច់ជីវិតប្តី-ប្រពន្ធនិងកូនអាយុ២៣ថ្ងៃ នៅនឹងកន្លែង ចំណែកកូនក្មេងអាយុ១២ឆ្នាំរងរបួសជាទម្ងន់បានស្លាប់នៅពេលទៅដល់មន្ទីរពេទ្យ។ នេះជាសំណេររបស់លោក Klymenko អមដោយរូបថតបង្ហាញពីផ្សែងខ្មៅខ្មួរខ្មាញ់ឆេះហុយចេញពីលំនៅដ្ឋានមួយផង។
ដោយមិនបង្អង់ ក្រសួងការបរទេសបារាំងបានចេញសេចក្តីថ្លែងការណ៍ថ្កោលទោសយ៉ាងមុតមាំការវាយប្រហារនោះ ថារុស្ស៊ីម៉ាក់ងាយយ៉ាងពេញទំហឹងគោលការណ៍សិទ្ធិមនុស្សធម៌អន្តរជាតិ និងរំលោភច្បាប់អន្តរជាតិយ៉ាងក្រលែតនិងជាម្តងហើយម្តងទៀត។
ជាសរុបមានជនស៊ីវិល១៣នាក់ផ្សេងទៀតបានរងរបួស នៅក្នុងការវាយប្រហាររុស្ស៊ីលើតំបន់ឃែរសុន ភាគខាងត្បូងប្រទេសអ៊ុយក្រែនកាលពីថ្ងៃអាទិត្យ។ ឃែរសុន ជាតំបន់មួយក្នុងចំណោមតំបន់ទាំងបួនរបស់អ៊ុយក្រែនដែលប្រធានាធិបតីរុស្ស៊ី ពូទីន ប្រកាសក្រសោបកាន់កាប់កាលពីខែកញ្ញា២០២២។ នៅសល់មានមួយផ្នែកស្ថិតក្រោមការគ្រប់គ្រងរបស់អ៊ុយក្រែន ប៉ុន្តែរងការវាយប្រហារទម្លាក់គ្រាប់បែកនិងបាញ់ផ្លោងជាញឹកញាប់។ បើតាមអ៊ុយក្រែន ក្មេងប្រមាណ៥០០នាក់ បានស្លាប់និង១១០០នាក់បានរងរបួស តាំងពីរុស្ស៊ីបើកប្រតិបត្តិការយោធាចូលឈ្លានពានអ៊ុយក្រែនមក។
នៅម្ខាងទៀតនៃសរមភូមិ ការវាយប្រហាររបស់អ៊ុយក្រែន ក៏បានបង្កឱ្យមានជនស៊ីវិលម្នាក់ ស្លាប់ដែរ។ នេះបើតាមចៅហ្វាយស្រុកZaïtsevéក្នុងដែនដីគ្រប់គ្រងដោយរុស្ស៊ី។ ចំណែករដ្ឋមន្ត្រីក្រសួងការពារជាតិរុស្ស៊ីវិញ អះអាងថាបានកម្ទេចដ្រូនរបស់អ៊ុយក្រែនបីគ្រឿងដែលហោះចូលតំបន់Belgorod និងKoursk ជាប់ព្រំដែនអ៊ុយក្រែន។ ការវាយប្រហារដោយដ្រូនអ៊ុយក្រែនកើតមានស្ទើរជារៀងរាល់ថ្ងៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ