ប្រមុខការទូតអឺរ៉ុបក្រើនរំលឹកប្រទេសក្រីក្រ ប្រយ័ត្នចាញ់ឧបាយកល អន្ទាក់គ្រាប់ធញ្ញជាតិរុស្ស៊ី
លោកJosep Borrell ប្រមុខការទូតអឺរ៉ុប បានចេញលិខិតមួយនៅថ្ងៃព្រហស្បតិ៍ទី៣សីហា ដោយបានក្រើនរំលឹក ឲ្យប្រទេសក្រីក្រ និងប្រទេសកំពុងអភិវឌ្ឍន៍ ប្រុងប្រយ័ត្ន កុំចាញ់បោកឧបាយកលរបស់រុស្ស៊ី ដែលយកគ្រាប់ធញ្ញជាតិជាអន្ទាក់។ លិខិតនេះ ត្រូវបានលោកប្រមុខការទូតអឺរ៉ុប ផ្ញើទៅកាន់ប្រទេសក្រីក្រមួយចំនួន ព្រមទាំងសមាជិកប្រទេសសេដ្ឋកិច្ចនាំមុខ G20 ដោយលោកបានអំពាវនាវ ឲ្យបានការរួមសាមគ្គីនិយាយក្នុងសំឡេងតែមួយ ដើម្បីទៅអូសទាញរុស្ស៊ី ឲ្យវិលត្រលប់មកចូលរួម ក្នុងកិច្ចព្រមព្រៀងនាំចេញគ្រាប់ធញ្ញជាតិអ៊ុយក្រែនវិញ។
ចុះផ្សាយនៅថ្ងៃ៖
ស្តាប់ - ០២:៣៨
នៅក្នុងលិខិតនេះ លោកប្រមុខការទូតអឺរ៉ុប បានលើកឡើងថា សំណើរបស់លោកពូទីន ដែលថាចង់ជួយប្រទេសក្រីក្រ តាមរយៈការលក់គ្រាប់ធញ្ញជាតិឲ្យក្នុងតម្លៃថោកនោះ ធាតុពិតគឺវាជាអន្ទាក់ ធ្វើឲ្យប្រទេសក្រីក្រស្ថិតនៅក្រោមក្រញ៉ាំឥទ្ធិពលរុស្ស៊ី ហើយនឹងធ្វើឲ្យប្រទេសទាំងនេះ កាន់តែប្រឈមខ្លាំងឡើងនឹងហានិភ័យវិបត្តិសេដ្ឋកិច្ច អសន្តិសុខស្បៀងអាហារ។
លោកJosep Borrell បានរំលឹកថា ស្ថានការណ៍បច្ចុប្បន្ន ដែលកំពុងតែធ្វើបាបប្រទេសក្រីក្រ ជាពិសេសនៅតំបន់អាហ្វ្រិក គឺរុស្ស៊ីជាអ្នកធ្វើឲ្យវាកើតឡើង។ តម្លៃស្បៀងអាហារ គ្រាប់ធញ្ញជាតិ ដូចជាស្រូវសាឡី និងគ្រាប់ពោតបានឡើងថ្លៃខ្លាំង បន្ទាប់ពីរុស្ស៊ីបានសម្រេចចាកចេញពីកិច្ចព្រមព្រៀងជាមួយអ៊ុយក្រែន។ ជាងនេះទៀត រុស្ស៊ីបានថែមទាំងបាញ់មីស៊ីល និងប្រើយានដ្រូន មកវាយបំផ្លាញកំពង់ផែ និងឃ្លាំងស្តុកគ្រាប់ធញ្ញជាតិរបស់អ៊ុយក្រែនថែមទៀត។ យោងតាមតួលេខបូកសរុបជាងមួយឆ្នាំមកនេះ គឺគ្រាប់ធញ្ញជាតិអ៊ុយក្រែនចន្លោះពី ១៦ម៉ឺន ទៅ១៨ម៉ឺនតោន ដែលត្រូវបានរុស្ស៊ីវាយកម្ទេច។ ជាក់ស្តែងកាលពីថ្ងៃពុធទី២សីហា រុស្ស៊ីបានបាញ់មីស៊ីលវាយប្រហារឃ្លាំងស្តុក នៅលើដងទន្លេDanube ហើយបានបណ្តាលឲ្យខូចខាតគ្រាប់ធញ្ញជាតិដែលអ៊ុយក្រែនបម្រុងនាំចេញ ចំនួនប្រមាណ៤ម៉ឺនតោន។
លោកប្រមុខការទូតអឺរ៉ុបបានចាត់ទុក សំណើររបស់លោកពូទីន ដែលអះអាងថាចង់ជួយប្រទេសក្រីក្រ ដោយសន្យាលក់គ្រាប់ធញ្ញជាតិឲ្យក្នុងតម្លៃថោកនោះ ថាជាសំណើដែលគ្មានការអៀនខ្មាសទាល់តែសោះ ខណៈដែលរុស្ស៊ីគឺជាអ្នករារាំងការនាំចេញរបស់អ៊ុយក្រែន ហើយបានធ្វើឲ្យទីផ្សារជ្រួលច្របល់។ ពោលគឺរុស្ស៊ីកំពុងតែប្រើគោលនយោបាយ យកស្បៀងអាហារធ្វើជាអាវុធ គម្រាមសម្លុតពិភពលោក។
នៅក្នុងលិខិតនេះដែរ លោកប្រមុខការទូតអឺរ៉ុប បានបញ្ជាក់ជំហររបស់សហភាពអឺរ៉ុប ថាអឺរ៉ុបមិនដែលបានប្រើទណ្ឌកម្ម រារាំងការនាំចេញគ្រាប់ធញ្ញជាតិរបស់រុស្ស៊ី ឬធ្វើឲ្យប្រទេសក្រីក្រត្រូវប្រឈមនឹងបញ្ហាស្បៀងអាហារឡើយ។ ពាក្យចោទមួរបង្កាច់ទាំងនេះ គឺជាភាសាឃោសនាបោកប្រាស់របស់លោកពូទីនតែប៉ុណ្ណោះ ដើម្បីមានលេសដកខ្លួនចេញពីកិច្ចព្រមព្រៀងគ្រាប់ធញ្ញជាតិជាមួយអ៊ុយក្រែន ដែលអង្គការសហប្រជាជាតិនិងតួកគីបានខំប្រឹងខ្នះខ្នែងសម្របសម្រួល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ