អ៊ុយក្រែន វាយប្រហារកម្ទេចមូលដ្ឋានទីបញ្ជាការយោធារុស្ស៊ី ១កន្លែង នៅតំបន់គ្រីមេ
ថ្ងៃសុក្រ ទី២២ ខែកញ្ញា រដ្ឋបាលទីក្រុងកៀវ អះអាងទទួលស្គាល់ថា កងទ័ពអ៊ុយក្រែន បានវាយប្រហារកម្ទេចមូលដ្ឋានទីបញ្ជាការយោធារុស្ស៊ី ១កន្លែង ដែលតាំងទីលើនៅសមុទ្រខ្មៅ នៃតំបន់គ្រីមេ។ ចំណែក ក្រសួងការពារជាតិរុស្ស៊ី បានឲ្យដឹងថា «ស្លាប់»ទាហានម្នាក់ ហើយក្រោយមក ប្រកាសថា «បាត់ខ្លួន»ម្នាក់ ទៅវិញ។ ថ្ងៃសុក្រដដែល ប្រធានាធិបតីអ៊ុយក្រែន បានបន្តដំណើរទស្សនកិច្ច នៅកាណាដា និងបានសុំឲ្យប្រទេសនេះឲ្យបន្តជួយគាំទ្រអ៊ុយក្រែនបន្តទៀត រហូតដល់ទទួល«ជ័យជម្នះ»។ ភ្លាមៗ នាយករដ្ឋមន្ត្រីកាដាណា ក៏បានប្រកាសជួយបន្ថែម ទាំងជំនួយយោធានិងជំនួយវិនិយោគទុន ។
ចុះផ្សាយនៅថ្ងៃ៖
ស្តាប់ - ០៣:០៣
តំបន់គ្រីមេ ជាដែនដីអ៊ុយក្រែន ដែលត្រូវ រុស្ស៊ី កាត់ផ្តាច់ និងទាញមកដាក់នៅក្នុងឧបសម្ព័ន្ធដែនដីរុស្ស៊ី នៅឆ្នាំ២០១៤។ ក្នុងសង្គ្រាម ជាង ១ឆ្នាំមកនេះ តំបន់គ្រីមេ ក៏ក្លាយជាកន្លែងយុទ្ធសាស្ត្រ និងជា ទីបញ្ជាការយោធាដ៏សំខាន់១ សម្រាប់រុស្ស៊ីរៀបចំកងទ័ព និងស្តុកគ្រឿងសព្វាវុធ ក្នុងការវាយប្រហារសឹក នៅប៉ែកខាងត្បូង អ៊ុយក្រែន។
ស្រាប់តែនៅថ្ងៃសុក្រ រដ្ឋបាលទីក្រុងកៀវ អះអាងថា កងទ័ពអ៊ុយក្រែន បានវាយប្រហារកម្ទេចទីបញ្ជាការយោធារុស្ស៊ី ១កន្លែង តាំងទីលើនៅសមុទ្រខ្មៅ នៃតំបន់គ្រីមេ ។ បើតាមទីភ្នាក់ព័ត៌មានរុស្ស៊ី TASS គឺ កន្លែងកើតហេតុត្រូវឆេះខូចខាត និងធ្វើឲ្យស្លាប់ទាហានរុស្ស៊ីម្នាក់។ ប្រភពដដែលក៏ បញ្ជាក់ថា មីស៊ីលអ៊ុយក្រែន ចំនួន៥ ត្រូវទ័ពរុស្ស៊ីកម្ទេចចោលវិញដែរ។ គួររម្លឹកថា ទីបញ្ជាការយោធារុស្ស៊ីនេះ ក៏ធ្លាប់រងការវាយប្រហារម្តងដែរ នៅខែសីហា ឆ្នាំ២០២២ ដែលកាលនោះ បណ្តាយឲ្យរបួសមនុស្ស ៦ នាក់។
ការវាយប្រហាររបស់អ៊ុយក្រែនលើកនេះ គឺបានធ្វើឲ្យរំខានជាខ្លាំង ដល់ដំណើរការរៀបចំទុកដាក់ស្តុកអាវុធ និងដឹកជញ្ជូនគ្រឿងចម្បាំងតាមផ្លូវទឹក។ ថ្នាក់ដឹកនាំរុស្ស៊ី ទទួលបន្ទុកនៅតំបន់ Sébastopol បានទទួលបញ្ជា តាំងពីព្រលឹមថ្ងៃសុក្រ ថាឲ្យផ្អាកដឹកជញ្ជូនអាវុធ តាមផ្លូវទឹក រហូតដល់តែមានការសម្រេចចិត្ត ជាថ្មី។
ទន្ទឹមនឹងគ្នានេះដែរ នៅតំបន់ Donetsk ឯណោះ ដែលទទួលរងការវាយប្រហារធ្ងន់ធ្ងរជាង១ឆ្នាំមកហើយ អភិបាលក្រុងដែលគាំទ្ររុស្ស៊ី បានអះអាងថាភ្លើងសង្គ្រាមនៅតែបន្តក្តៅគគុក ហើយការវាយប្រហារ ទម្លាក់គ្រាប់បែក នៅតែមានមិនដាច់សូរ។ អភិបាលតំបន់ Poltava ក៏ថាដែរ ហេដ្ឋារចនាសម្ព័ន្ធស៊ីវិល កំពុងត្រូវខូចខាតខ្លាំង ដោយប្រឈមនឹងការវាយបករបស់អ៊ុយក្រែន។
អ៊ុយក្រែន សុំ កាដាណា បន្តជួយរហូតដល់«ឈ្នះសង្គ្រាម»
នាថ្ងៃសុក្រដដែល ប្រធានាធិបតីអ៊ុយក្រែន បានបន្តដំណើរទស្សនកិច្ច នៅប្រទេសកាណាដា គឺបន្ទាប់ពី ទស្សនកិច្ច នៅអង្គការសហប្រជាជាតិ និងសហរដ្ឋអាមេរិក។ ក្នុងជំនួបជាមួយនាយករដ្ឋមន្ត្រី លោក ហ្សូសស្តាំង ទ្រុយដូ គឺ លោក វ៉ូឡូឌីមៀរ ហ្សេឡេនស្គី បានសុំឲ្យកាណាដាបន្តជួយគាំទ្រអ៊ុយក្រែនបន្តទៀត រហូតដល់«ទទួលជ័យជម្នះ»។
ពីចំណែកខ្លួន លោក ហ្សូសស្តាំង ទ្រុយដូ បានប្រកាសជួយថវិកា ៦៥០ លានដុល្លារកាណាដា ហើយផ្តល់រថគ្រោះ ប្រមាណ ៥០គ្រឿង ព្រមទាំង ជួយហ្វឹកហ្វឺនអ្នកបើកយន្តហោះអ៊ុយក្រែន ឲ្យចេះប្រើ យន្តហោះចម្បាំងដ៏ទំនើប ម៉ាក F-16។ មិនតែប៉ុណ្ណោះ ថ្នាក់ដឹកនាំទាំង២បានចុះកិច្ចព្រមព្រៀងប្តូរពាណិជកម្មក្នុងរង្វង់ទឹកប្រាក់ ១,២ ពាន់លានអឺរ៉ូ ទៀតផង។
តាំងពីផ្ទុះសង្គ្រាមរុស្ស៊ីនៅអ៊ុយក្រែន ជាង ១ ឆ្នាំមក គឺ កាដាណា បានជាប្រទេសទទួលជនភៀសខ្លួនអ៊ុយក្រែន ច្រើនជាងគេ លំដាប់លេខ២ គឺមាន ចំនួន ១៧៥ ០០០ នាក់ ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ