WHOបារម្ភពី ការផ្ទុះជំងឺផ្លូវដង្ហើមនៅភាគខាងជើងប្រទេសចិន
អង្គការសុខភាពពិភពលោកសំដែងក្តីបារម្ភពីការកើនឡើងនៃករណីជំងឺផ្លូវដង្ហើមនៅក្នុងប្រទេសចិន។ នៅក្នុងសេចក្តីថ្លែងការណ៍កាលពីថ្ងៃពុធទី ២២វិច្ឆិកា អង្គការសុខភាពពិភពលោកដែលមានទីស្នាក់ការនៅទីក្រុងហ្សឺណែវប្រទេសស៊្វីសបានសរសេរថា ខ្លួនបានដាក់លិខិតជាផ្លូវការទៅកាន់ភាគីចិនឲ្យផ្តល់ទិន្នន័យបន្ថែមទាក់ទងនឹងករណីផ្ទុះជំងឺផ្លូវដង្ហើមមួយរយៈចុងក្រោយនេះ នៅភាគខាងជើងប្រទេសចិន ដូចជានៅទីក្រុងប៉េកាំងជាដើម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:០៩
នៅក្នុងសេចក្តីថ្លែងការណ៍កាលពីថ្ងៃពុធ អង្គការសុខភាពពិភពលោកបានសំដែងក្តីបារម្ភនៅចំពោះមុខនៃការកើនឡើងករណីអ្នកជំងឺផ្លូវដង្ហើមនៅភាគខាងជើងប្រទេសចិន និងបានស្នើសុំជាផ្លូវការឲ្យភាគីចិនផ្តល់ទិន្នន័យបន្ថែម ទាក់ទងនឹងការកើនឡើង ចំនួនអ្នកជំងឺផ្លូវដង្ហើម និងករណីឆ្លងជំងឺផ្លូវដង្ហើមនៅក្នុងចំណោមកុមារ។
អង្គការសុខភាពពិភពលោកស្នើសុំព័ត៌មានលម្អិតស្តីពីការកើនឡើងករណីជំងឺផ្លូវដង្ហើមនៅប្រទេសចិន បន្ទាប់ពីគណៈកម្មការសុខភាពជាតិចិនលើកឡើងកាលពីសប្តាហ៍មុនថា ករណីជំងឺផ្លូវដង្ហើមបានហក់កើនឡើង ដោយសារតែការលុបចោលវិធានការរឹតបន្តឹងសុខភាព និងម្យ៉ាងដោយសារតែមេរោគ និងបាក់តេរីដែលបង្កជំងឺរលាកសួតចាប់លេចមុខនៅក្នុងរដូវរងាចុងឆ្នាំ។ ស្រង់សំដីដោយកាសែតក្នុងស្រុកចិន អ្នកជំនាញខាងផ្នែកជំងឺឆ្លងរាតត្បាតនៃមជ្ឈមណ្ឌលគ្រប់គ្រងការពារជំងឺឆ្លងបាននិយាយថា នៅរដ្ឋធានីប៉េកាំងដែលស្ថិតនៅភាគខាងជើងប្រទេស ករណីឆ្លងជំងឺផ្លូវដង្ហើមចាប់កើនឡើងវិញ នៅក្នុងខណៈពេលដែលប៉េកាំងកំពុងជួបអាកាសធាតុត្រជាក់ខ្លាំង រហូតដល់ក្រោមសូន្យ នៅចុងសប្តាហ៍នេះ។
អង្គការសុខភាពពិភពលោកនៅមិនទាន់បានទទួលចម្លើយពីអាជ្ញាធរសុខភាពចិន។ នៅក្នុងសំណើផ្លូវការទៅកាន់ភាគីចិនកាលពីថ្ងៃពុធទី ២២វិច្ឆិកា អង្គការសុខភាពពិភពលោកទាមទារចង់បានព័ត៌មានលម្អិត ទាក់ទងនឹងប្រភេទមេរោគដែលកំពុងឆ្លងរាលដាល ដូចជាមេរោគជំងឺគ្រុនផ្តាសាយ មេរោគកូវីដ និងលទ្ធផលនៃការធ្វើតេស្តរកមេរោគក្នុងចំណោមអ្នកជំងឺជាកុមារ ព្រមទាំងព័ត៌មានស្តីពីសមត្ថភាពរបស់មន្ទីរពេទ្យក្នុងការទទួលដាក់អ្នកជំងឺផ្លូវដង្ហើម។
នៅក្នុងសេចក្តីថ្លែងការណ៍របស់ខ្លួន អង្គការសុខភាពពិភពលោកបានអំពាវនាវឲ្យគេចាត់វិធានការបង្ការទប់ស្កាត់ការវិលត្រលប់ជំងឺកូវីដ ជំងឺផ្លូវដង្ហើម តាមរយៈការចាក់វ៉ាក់សាំង ពាក់ម៉ាស និងស្ថិតនៅឆ្ងាយពីអ្នកជំងឺ។ អត្រានៃការឆ្លងជំងឺផ្លូវដង្ហើមនៅភាគខាងជើងប្រទេសចិន រួមទាំងការលេចចេញនូវមេរោគបំប្លែងខ្លួនថ្មីៗកំពុងធ្វើឲ្យអង្គការសុខភាពពិភពលោកបារម្ភថា ជំងឺកូវីដ១៩កំពុងវិលវល់ មិនទាន់ទៅណាឆ្ងាយ។
ទាក់ទងនឹងជំងឺកូវីដផ្ទុះឡើងដំបូងនៅឆ្នាំ២០១៩ ដែលគេសង្ស័យថាមានប្រភពចេញពីទីក្រុងវូហាន ប្រទេសចិន អង្គការសុខភាពពិភពលោករិះគន់ចិនថា ខ្វះតម្លាភាព លាក់តួលេខ បិទខ្ទប់មិនឲ្យគេដឹងពីស្ថានភាពជំងឺឆ្លងកូវីដ និងមិនសហការចែករំលែកទិន្នន័យជំងឺឆ្លងកូវីដ ជាមួយទីភ្នាក់ងារសុខភាពរបស់អង្គការសហប្រជាជាតិ។
កាលពីខែ កញ្ញាកន្លងទៅ ពោលគឺនៅជាង៣ឆ្នាំក្រោយការផ្ទុះជំងឺកូវីដ១៩ អង្គការសុខភាពពិភពលោកនៅតែទទូចសុំភាគីចិនដើម្បីបើកទា្វរឲ្យអ្នកជំនាញទៅបេសកកម្មជាថ្មីនៅក្នុងប្រទេសចិន។ គោលដៅគឺដើម្បីស្វែងរកអត្តសញ្ញាណ និងប្រភពឆ្លងរបស់មេរោគកូវីដ១៩។ ប៉ុន្តែ រហូតមកដល់ពេលនេះ គ្មានទេ ចម្លើយតបពីភាគីចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ