រុស្ស៊ីផ្តើមសង្គ្រប់អ៊ុយក្រែនជាថ្មីតាមរយៈការវាយប្រហារដោយដ្រូនជាទ្រង់ទ្រាយធំ?
បើតាមអ៊ុយក្រែន រុស្ស៊ីបានវាយប្រហារដោយដ្រូនលើក្រុងកៀវយ៉ាងសន្ធឹកសន្ធាប់បំផុតមិនធ្លាប់មានទេ គិតចាប់តាំងពីផ្ទុះសង្គ្រាមនៅថ្ងៃទី២៤កុម្ភៈ២០២២មក ជាហេតុធ្វើឱ្យក្រុងកៀវមួយភាគធំធ្លាក់ក្នុងភាពងងឹតនិងត្រជាក់ ដោយគ្មានអគ្គីសនីប្រើប្រាស់។
ចុះផ្សាយនៅថ្ងៃ៖
ស្តាប់ - ០២:២២
ស្នូរស៊ីរ៉ែនប្រកាសអាសន្នមានការវាយប្រហារផ្លូវអាកាសបានលាន់រន្ទឺឡើងពេញរដ្ឋធានីកៀវ រយៈពេល៦ម៉ោង ហើយបំណែកដ្រូនធ្លាក់មកបានបង្កឱ្យមានអគ្គិភ័យនិងបំផ្លាញអគារជាច្រើនខ្នង។ “សត្រូវបន្តសាបព្រោះភាពតក់ស្លុត” នេះជាប្រសាសន៍របស់អាជ្ញាធរក្រុងកៀវ អមដោយសេចក្តីប្រកាសរបស់ក្រុមកងទ័ពជើងអាកាស នៅព្រឹកថ្ងៃសៅរ៍ទី ២៥វិច្ឆិកាថា យោធាអាកាសអ៊ុយក្រែនបានកម្ចាត់ដ្រូនប្រយុទ្ធ ប្រភេទshahedបង្ហោះចេញពីរុស្ស៊ីមកបាន៧១គ្រឿង។ ដ្រូនភាគច្រើនត្រូវបានកម្ទេចនៅតំបន់រដ្ឋធានី។
ប៉ុន្តែជាផលវិបាក ការវាយប្រហារនេះ បានធ្វើឱ្យមនុស្ស៥នាក់ ក្នុងនោះម្នាក់ជាកុមារអាយុ១១ឆ្នាំរងរបួស និងបានផ្តាច់ចរន្តអគ្គិសនីជាទ្រង់ទ្រាយធំនៅក្នុងរដ្ឋធានីកៀវ។ មានយ៉ាងហោចណាស់អគារលំនៅឋានចំនួន៧៧ខ្នង និងអគារចំនួន១២០ខ្នងនៅសង្កាត់កណ្តាលក្រុងគ្មានភ្លើងប្រើប្រាស់។ នេះបើតាមប្រភពអាជ្ញាធរអ៊ុយក្រែនដដែល។
ប្រធានាធិបតីអ៊ុយក្រែន បានចាត់ទុកការវាយប្រហារដោយដ្រូនយប់មិញថា មេដឹកនាំរុស្ស៊ីចង់បង្ហាញអំពីមោទនភាពខ្លួនថាមានសមត្ថភាពសម្លាប់មនុស្ស។ អ៊ុយក្រែនមិនអាចបំភ្លេច មិនអាចយល់និងជាពិសេសមិនអាចអនុគ្រោះឱ្យអ្នកប្រព្រឹត្តឧក្រិដ្ឋកម្មប្រល័យពូជសាសន៍ដែលអ៊ុយក្រែនធ្លាប់រងគ្រោះកាលពីដើមសតវត្សរ៍ទី២០ទេ។
អាជ្ញាធរអ៊ុយក្រែនយល់ថារុស្ស៊ីសម្រុកវាយប្រហារដៅលើក្រុងកៀវ និងតំបន់ភាគខាងត្បូងនៅថ្ងៃសៅរ៍នេះ ឱ្យចំថ្ងៃដែលអ៊ុយក្រែនត្រូវប្រារព្ធខួបរងគ្រោះទុរ្ភិក្សអូឡូដូម័រកាលពី៩០ឆ្នាំមុន។ នៅឆ្នាំ១៩៣២-៣៣ ដោយខ្លាចមានការបះបោរទាមទារឯករាជ្យ របបស្តាលីនរបស់អតីតសហភាពសូវៀតបានបង្អត់អាហារនិងសេរីភាពនៃការធ្វើដំណើររហូតបណ្តាលឱ្យពលរដ្ឋអ៊ុយក្រែន ស្លាប់យ៉ាងវេទនាអស់ប្រមាណពី៤ទៅ៨លាននាក់។ សម្រាប់អ៊ុយក្រែន គ្រោះទុរ្ភិក្សហូឡូដូម័រ ជាអំពើប្រល័យពូជសាសាសន៍ តែរុស្ស៊ីបដិសេធ ដោយលើកថាពលរដ្ឋរុស្ស៊ី កាហ្សាក់ស្ថាន ... ក៏រងគ្រោះដែរ។
ការវាយប្រហារដោយដ្រូន និម្មិតរូបនៃសង្គ្រាមនៅអ៊ុយក្រែន បានកើនឡើងយ៉ាងខ្លាំងតាំងពីមួយខែមកនេះ ទាំងពីសំណាក់យោធាអ៊ុយក្រែនដ៏ដូចជាយោធារុស្ស៊ី។ នៅខាងរុស្ស៊ី ម៉ូស្គូក៏បានអះអាងថាកម្ចាត់ដ្រូនអ៊ុយក្រែនបាន១៦គ្រឿងដែរកាលពីថ្ងៃសុក្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ