អ៊ុយក្រែន និងរុស្ស៊ីប្រើដ្រូនវាយប្រហារគ្នាទៅវិញ ទៅមកពេញមួយយប់ថ្ងៃសៅរ៍
ទីក្រុងម៉ូស្គូ និងទីក្រុងកៀវ ក្លាយជាគោលដៅនៃការវាយប្រហារដ្រូន នៅយប់ថ្ងៃសៅរ៍ ឈានចូលដល់ថ្ងៃអាទិត្យទី ១៩វិច្ឆិកា។ យោងតាមក្រសួងការពារជាតិរុស្ស៊ី អ៊ុយក្រែនបានប្រើដ្រូនវាយប្រហារតំបន់ជាយក្រុងម៉ូស្គូ ប៉ុន្តែ មិនបានបង្កការខូចខាតធ្ងន់ធ្ងរ ឬសម្លាប់ជីវិតមនុស្ស។ នៅខាងអ៊ុយក្រែន រដ្ឋធានីបានរងការវាយប្រហារដោយរលកដ្រូនរបស់រុស្ស៊ី នៅ២យប់ជាប់ៗគ្នា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៧
រុស្ស៊ី និងអ៊ុយក្រែនបានប្រើដ្រូនវាយប្រហារលើរដ្ឋធានីគ្នាទៅវិញ ទៅមក។ នៅយប់ថ្ងៃសៅរ៍ ឈានចូលដល់ថ្ងៃអាទិត្យ ទាំងរដ្ឋធានីកៀវរបស់អ៊ុយក្រែន និងម៉ូស្គូរបស់រុស្ស៊ីបានក្លាយជាផ្ទាំងស៊ីបវាយប្រហាររបស់ដ្រូន។ យោងតាមក្រសួងការពារជាតិរុស្ស៊ី ប្រព័ន្ធការពារដែនអាកាសបានទប់ស្កាត់ បាញ់ទម្លាក់ដ្រូនរបស់អ៊ុយក្រែន មិនឲ្យបង្កការខូចខាត ឬសម្លាប់ជីវិតមនុស្ស។
វាជារឿងកម្រដែលម៉ូស្គូ រងការវាយប្រហាររបស់ដ្រូនអ៊ុយក្រែន។ ម៉ូស្គូ និងតំបន់ជុំវិញ ធ្លាប់រងការវាយប្រហារដ្រូនអ៊ុយក្រែន កាលពីខែឧសភា នៅមុនអ៊ុយក្រែនប្រកាសបើកសមរភូមិប្រយុទ្ធដណ្តើមទឹកដីពីរុស្ស៊ីមកវិញ កាលពីខែមិថុនា។
នៅអ៊ុយក្រែនឯណោះវិញ ទីក្រុងកៀវបានរងរលកវាយប្រហារដ្រូនរបស់រុស្ស៊ី នៅ២យប់ជាប់ៗគ្នា។ បើតាមមន្រ្តីយោធាជាន់ខ្ពស់របស់អ៊ុយក្រែន នៅយប់ថ្ងៃសៅរ៍ កងទ័ពរុស្ស៊ីបានបញ្ជូនដ្រូនផលិតឡើងនៅអ៊ីរ៉ង់ឈ្មោះ Shahed ដែលមានសមត្ថភាពនាំយកគ្រឿងផ្ទុះ ទៅទម្លាក់លើទីក្រុងកៀវ។ ប៉ុន្តែ ជាសរុប ដ្រូនពី ១៥ ទៅ២០គ្រឿង ដែលកងទ័ពរុស្ស៊ី បញ្ជូនពីគ្រប់ទិស សំដៅទីក្រុងកៀវ ត្រូវប្រព័ន្ធការពារដែនអាកាសបាញ់កម្ទេចគ្មានសល់។
នៅមួយថ្ងៃមុន កៀវបានរងការវាយប្រហាររលកដ្រូនរបស់រុស្ស៊ី នៅក្នុងចំនួនដ៏ច្រើនមិនធ្លាប់មាន គិតចាប់តាំងពីខែកញ្ញា។ នៅចំពោះមុខការវាយប្រហារដ្រូនរបស់រុស្ស៊ី សំដៅរដ្ឋធានីក្បាលម៉ាស៊ីនរបស់អ៊ុយក្រែន ប្រធានាធិបតីអ៊ុយក្រែន លោកហ្សេឡេនស្គីគិតរួចហើយថា រុស្ស៊ីកំពុងគ្រោងដៅវាយប្រហារសាជាថ្មី ទៅលើប្រព័ន្ធថាមពលរបស់អ៊ុយក្រែន ដើម្បីឲ្យអ៊ុយក្រែន គ្មានភ្លើងសម្រាប់ដុតកំដៅ នៅរដូវត្រជាក់ខាងមុខ។
នៅសមរភូមិប្រយុទ្ធនៅភាគខាងកើតឯណោះវិញ កងទ័ពអ៊ុយក្រែន នៅថ្ងៃអាទិត្យនេះអះអាងថា គេវាយដណ្តើមយកបានទឹកដីអ៊ុយក្រែន ក្នុងចម្ងាយពី៣ ទៅ ៨គីឡូម៉ែត្រ នៅត្រង់សមរភូមិប្រយុទ្ធ ជាប់ទន្លេ Dniepro ក្នុងខេត្តKherson ភាគខាងត្បូងប្រទេស ដែលកំពុងស្ថិតក្រោមការកាន់កាប់របស់កងទ័ពរុស្ស៊ី។
ក្រសួងការពារជាតិរុស្ស៊ី នៅមិនទាន់ឆ្លើយតបទៅនឹងការលើកឡើងរបស់កងទ័ពអ៊ុយក្រែន។ បើសិនអ៊ុយក្រែន ពិតជាវាយយកបានទឹកដីរបស់ខ្លួនបន្ថែមទៀត នៅតំបន់ Kherson នោះជាស្នាដៃសម្រេចបានដ៏ធំធេងរបស់កងទ័ពអ៊ុយក្រែន បន្ទាប់ពីអ៊ុយក្រែនបរាជ័យ នៅតែក្នុងការប្រយុទ្ធដណ្តើមយកទឹកដីរបស់ខ្លួនពីរុស្ស៊ី។ ទោះបានជំនួយយោធា សព្វាវុធសន្ធឹកសន្ធាប់ពីប្រទេសលោកខាងលិច អ៊ុយក្រែនដែលបានបើកការវាយប្រយុទ្ធទ្រង់ទ្រាយធំតាំងពីខែមិថុនាមក នៅមិនអាចវាយបំបែកខ្សែប្រយុទ្ធដ៏រឹងមាំរបស់កងទ័ពរុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ