ថ្ងៃជោគជ័យរបស់មហាបាតុកម្មរបស់ប្រជាជនអេហ្ស៊ីព្ទ
តើមានអ្នកណាដែលនឹកស្មានដល់ថា នឹងមានថ្ងៃនេះកើតឡើងនៅក្នុងប្រទេសអេហ្ស៊ីព្ទ។ នៅទីបំផុត ការចុះដើរតាមផ្លូវតវ៉ារបស់ប្រជាជនរយៈពេល ១៨ថ្ងៃបានទទួលផលជាផ្លែផ្កា។ សម្រែកទាមទាររបស់បាតុករ នៅទីបំផុតបានធ្វើឲ្យលោកប្រធានាធិបតី មូបារ៉ាក់ សុខចិត្ត ចុះចេញពីតំណែង នៅល្ងាចថ្ងៃម្សិលមិញ និងប្រគល់អំណាចគ្រប់គ្រងកិច្ចការប្រទេសទៅឲ្យកងទ័ព។ នៅទីលានសេរីភាព Tahrir និងនៅទីក្រុងធំៗ ក្នុងប្រទេសអេហ្ស៊ីព្ទ ប្រជាជនអេហ្ស៊ីព្ទធ្វើបុណ្យអបអរនឹងដំណឹងចុះចេញពីតំណែងរបស់លោក Hosni Moubarak និងចាត់ទុកនេះព្រឹត្តិការណ៍លើកនេះថា ជាប្រវត្តិសាស្រ្តថ្មីសម្រាប់ប្រទេសអេហ្ស៊ីព្ទ។
ចុះផ្សាយនៅថ្ងៃ៖ កែប្រែថ្ងៃទី៖
បទយកការណ៍រៀបចំដោយឈាង បុប្ផា
ព្រឹត្តិការណ៍បាតុកម្មទាមទាររយៈពេល១៨របស់ប្រជាជនអេហ្ស៊ីព្ទដែលបានសម្រេចរហូតបណ្តេញលោកមូបារ៉ាក់ ឲ្យចុះចេញពីតំណែងប្រធានាធិបតី។
ថ្ងៃទី អង្គារ២៥ មករា៖ បន្ទាប់ពីបានឃើញ ជោគជ័យបដិវត្តន៍ផ្កាម្លិះ នៅប្រទេសទុយនីស៊ី បាតុកម្មនោះផ្តើមចេញមកពីប្រជាជនអេហ្ស៊ីព្ទសុទ្ធសាធ ដោយគ្មានការណែនាំ ពីគណបក្សប្រឆាំងណាមួយទេ។ ប្រជាជនធ្វើបាតុកម្មព្រោះពួកគេមិនសប្បាយចិត្ត នឹងភាពក្រីក្រ និងឃើញអំពើពុករលួយរបស់ថ្នាក់ដឹកនាំ។ គ្រាន់តែ ក្នុងថ្ងៃបាតុកម្មដំបូង បាតុករបីនាក់បានស្លាប់ នៅក្នុងការបង្រ្កាបរបស់ប៉ូលិស។
ថ្ងៃទីសុក្រ ២៨ មករា៖ នៅក្រោយពេលសូត្រធម៌រួច ប្រជាជនបានប្រមូលផ្តុំគ្នា ជាថ្មី តវ៉ាឲ្យលោកមូបារ៉ាក់ដែលកាន់អំណាចជាង ៣០ឆ្នាំ ចុះចេញពីតំណែង ប៉ុន្តែដូចលើកមុន ពួកគេក៏ត្រូវប៉ូលិសបង្រ្កាប។ នៅថ្ងៃនោះ បម្រាមគោចរ ត្រូវគេប្រកាសឡើង ហើយប្រព័ន្ធអ៊ិនធ័រណេត ត្រូវបានកាត់ផ្តាច់សឹងទាំងស្រុង។ អ្នកកាសែតបរទេសត្រូវគេលួចវាយ និងចាប់ឃាត់ខ្លួន។
ថ្ងៃទី សៅរ៍ ២៩ មករា៖ ក្រោយ បាតុកម្មទ្រង់ទ្រាយធំ និងមិនធ្លាប់មានក្នុងប្រទេសអេហ្ស៊ីព្ទ ប្រធានាធិបតី លោកមូបារ៉ាក់ បានចេញមុខមកប្រកាសបង្កើតតំណែងអនុប្រធានាធិបតីដែលគាត់ធ្លាប់តែបដិសេធមិនឲ្យមានកន្លងមក។ នៅថ្ងៃនោះលោកបានតែងតាំងទាហានម្នាក់ជានាយករដ្ឋមន្រ្តីអេហ្ស៊ីព្ទ។ ការតវ៉ានៅតែមានជាហូរហែរ ព្រោះប្រជាជននៅតែមិនយល់ស្របនឹងកំណែទម្រង់របស់លោកមូបារ៉ាក់។
ថ្ងៃទី ចន្ទ ៣១ មករា៖ រដ្ឋមន្រ្តីការពារជាតិអេហ្ស៊ីព្ទ លោក Mohamed Hussein Tantaoui បានឡើងកាន់តំណែងជាឧបនាយករដ្ឋមន្រ្តី។ ទាហានដែលកាន់តែឈានចូលកាន់អំណាចសំខាន់ៗរបស់រដ្ឋាភិបាល។ នៅល្ងាចថ្ងៃចន្ទនោះ ទាហានប្រកាសថា ការទាមទាររបស់ប្រជាជនស្របច្បាប់ ហើយទាហានសន្យាមិនប្រើកម្លាំងដើម្បីបង្រ្កាបទៅលើបាតុករទេ។ ការសន្យារបស់ទាហានដែលមានអំណាចខ្លាំងក្នុងរដ្ឋាភិបាលអេហ្ស៊ីព្ទ បានធ្វើឲ្យប្រជាជនរឹតតែមានសង្ឃឹម នឹងប្រកាសយកថ្ងៃទី មួយកុម្ភៈ ធ្វើជាថ្ងៃជួបជុំធំ។ ការអំពាវនាវបានធ្វើឲ្យប្រជាជនអេហ្ស៊ីព្ទផ្សេងទៀតចូលរួម រហូតធ្វើឲ្យគេវាយតម្លៃថា មានប្រជាជនមួយលាននាក់បានមកតវ៉ានៅទីលានសេរីភាព Tahrir។
ថ្ងៃទី អង្គារ១ កុម្ភៈ៖ នៅយប់ថ្ងៃមហាបាតុកម្មនោះ លោកមូបារ៉ាក់បានចេញមុខប្រកាសតាមទូរទស្សន៍ជាលើកទីពីរ។ លើកនោះ លោកបានប្រកាសថា លោកនឹងមិនឈរឈ្មោះជាបេក្ខជនប្រធានាធិបតីនៅអាណត្តិក្រោយនេះទេ។ ប៉ុន្តែលោកនឹងនៅកាន់អំណាចរហូតដល់ចប់អាណត្តិរបស់លោក នៅខែកញ្ញាខាងមុខ។ បាតុករនៅតែមិនពេញចិត្តនឹងការធ្វើសម្បទានលើកទីពីររបស់ប្រធានាធិបតី និងទាមទារដាច់ខាតឲ្យលោកមូបារ៉ាក់ចុះចេញពីតំណែង។
នៅព្រឹកថ្ងៃពុធ ទី ២ កុម្ភៈ៖ ក្រុមគាំទ្រលោកមូបារ៉ាក់ បានដើរបាតុកម្ម និងលើកគ្នាវាយប្រហារមកលើក្រុមប្រឆាំង ដែលបន្តតវ៉ា នៅទីលានសេរីភាព Tahrir។ ក្រុមអ្នកប្រឆាំង បានចោទពួកអ្នកគាំទ្រ លោកម៉ូបារ៉ាក់ថា បានប្រើអាវុធ បាញ់ប្រហារមកលើពួកគេ ហើយមានអ្នកខ្លះ ជាប៉ូលិស និងដៃជើងរបស់លោកមូបារ៉ាក់។ អំពើហិង្សា វាយប្រហារគ្នា គប់ដុំថ្មដាក់គ្នាទៅវិញទៅមក បានបន្តដល់ថ្ងៃព្រហស្បតិ៍ទី ៣កុម្ភៈ។
ថ្ងៃទី សុក្រ៤ កុម្ភៈ៖ ប្រជាជនអេហ្ស៊ីព្ទច្រើនពាន់នាក់ដើរក្បួនបាតុកម្មដោយស្ងប់ស្ងាត់។ ថ្ងៃនោះមានឈ្មោះថា ថ្ងៃចាកចេញ គឺសំដៅការលាចេញពីតំណែងរបស់លោកមូបារ៉ាក់។
ថ្ងៃ សៅរ៍ ៦ កុម្ភៈ៖ អនុប្រធានាធិបតីបានអញ្ជើញក្រុមបក្សប្រឆាំងឲ្យចូលរួមក្នុងតុចរចាដែលនេះមិនធ្លាប់មានទេក្នុងប្រវត្តិសាស្រ្ត៥០ឆ្នាំចុងក្រោយនៅ អេហ្ស៊ីព្ទ។ ការចរចាមិនបានទទួលលទ្ធផល ប្រជាជនអេហ្ស៊ីព្ទកាន់តែច្រើនឡើងៗ បានមកប្រមូលផ្តុំគ្នានៅទីលានសេរីភាព។
ល្ងាចថ្ងៃព្រហស្បតិ៍ ១០៖ នៅពេលកងទ័ពបានចេញសេចក្តីប្រកាសទីមួយ ថា ខ្លួននឹងចេញមុខអន្តរាគមន៍។ ប្រជាជនដែលមើលឃើញថា កងទ័ពនៅខាងខ្លួន ចាប់ផ្តើមសង្ស័យថា នឹងអាចមានរដ្ឋប្រហារ។ ប៉ុន្តែ នៅពេលប្រធានាធិបតីចេញមុខប្រកាសនៅតាមទូរទស្សន៍ថា លោកនឹងមិនស្តាប់តាមការបញ្ជាពីអន្តរជាតិ ហើយលោកនៅតែបន្តកាន់អំណាច ប្រជាជនអេហ្ស៊ីព្ទមានការខកចិត្ត និងចាប់ផ្តើមផ្ទុះកំហឹង ដោះស្បែកជើងគប់លើរូបលោកមូបារ៉ាក់ដែលលេចនៅតាមកញ្ចក់ទូរទស្សន៍។
ព្រឹកថ្ងៃសុក្រ ១១ កុម្ភៈ៖ បាតុករបានដើរសំដៅទៅស្ថានីយ៍ទូរទស្សន៍ និងវិមានរដ្ឋាភិបាល ប៉ុន្តែ ដំណឹងពីអ្នកនាំពាក្យរបស់គណបក្សរបស់លោកមូបារ៉ាក់បានឲ្យដឹងថា លោកម៉ូបារ៉ាក់បានចាកចេញ ទៅCharm El Chequeរួចទៅហើយ។ ទើបតែពេលយប់ថ្ងៃសុក្រដែលអនុប្រធានាធិបតី លោកស៊ូលេម៉ាន ប្រកាសថា លោកមូបារ៉ាក់បានលាលែងចេញពីតំណែង និងប្រគល់កិច្ចការប្រទេសទៅឲ្យកងទ័ពកាន់កាប់វិញ។
ប្រជាជនអេហ្ស៊ីព្ទអាចអបអរនឹងជ័យជំនះរបស់ខ្លួន ដោយបានបណ្តេញប្រធានាធិបតីចេញពីអំណាច ប៉ុន្តែ ចូរកុំភ្លេចថា មានប្រជាជនជិត៣០០នាក់ដែលបានស្លាប់ នៅក្នុងបាតុកម្មនៅអេហ្ស៊ីព្ទ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ