លីបង់ញាំញីដោយអំពើភេរវកម្ម ព្រោះចំហាយសង្គ្រាមនៅស៊ីរី ?!
មានស្លាប់យ៉ាងហោចណាស់ ២៧នាក់ និងរបួសជាង៣៥០នាក់ នៅថ្ងៃសុក្រទី ២៣សីហា ក្នុងអំពើភេរវកម្មបំផ្ទុះរថយន្ត ពីរផ្ទួនគ្នា នៅទីក្រុងទ្រីប៉ូលី ក្រុងភាគខាងជើងប្រទេសលីបង់។ បើតាមរដ្ឋមន្ត្រីក្រសួងសុខភិបាល តុល្យការនៃជនរងគ្រោះអាចនឹងធ្ងន់ធ្ងរជាងនេះទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
ទូរទស្សន៍ជាតិលីបង់បានបង្ហាញរូបភាពជនរងគ្រោះ បាត់បង់ជីវិត ដែលភាគច្រើនជាកុមារ រថយន្តជាច្រើនគ្រឿងកំពុងត្រូវអណ្តាតភ្លើងឆាបឆេះ អាគារផ្ទះសម្បែងបាក់បែកខ្ទេចខ្ទី ផ្សែងខ្មៅខ្មួរខ្មាញ់ពេញមេឃ មនុស្សរត់ច្រវ៉ាត់ជួយសង្គ្រោះគ្នាទាំងមានរបួស។
ភេរវកម្មកំពុងទន្ទ្រាញទីក្នុងប្រទេសលីបង់ !ជាភេរវកម្មប្រឆាំងនឹងវិហារអ៊ីស្លាម ក្នុងថ្ងៃសុក្រ ថ្ងៃសូត្រធម៌...
បំផ្ទុះទីមួយ បានលាន់ឮឡើងនៅកណ្តាលក្រុង មិនឆ្ងាយប៉ុន្មានពីគេហដ្ឋានរបស់នាយករដ្ឋមន្ត្រី Najib Mikati ដែលទើបលាលែងចេញពីតំណែង។ គ្រាប់ទីពីរ ត្រូវបានគេដាក់បង្កប់ក្នុងរថយន្តបំផ្ទុះក្បែរកំពង់ផែ ក្បែរផ្ទុះមេប៉ូលិស។
សូមបញ្ជាក់ថា តាំងពីមានវិបត្តិហិង្សាបានផ្ទុះឡើងនៅប្រទេសស៊ីរីមក លីបង់ ជាប្រទេសជិតខាងក៏មិនសូវជាបានសុខប៉ុន្មានដែរ។ លីបង់ ជាពិសេសនៅភាគខាងជើង បានក្លាយជាឆាកល្ខោននៃការប្រយុទ្ធគ្នា រវាងបណ្តាជនលីបង់និកាយស៊ុយនីត និងក្រុមនិកាយអាលាវិត ដូចលោកប្រធានាធិបតីស៊ីរី បាស្ហារ អាល់អាសាទ។ ក្រុមអ៊ីស្លាមស៊ុយនីត ភាគច្រើនជាអ្នកគាំទ្រសកម្មជនបះបោរប្រឆាំងនឹងរបបដឹកនាំស៊ីរីបច្ចុប្បន្ន មិនដូចក្រុមអាលាវិត និងឈីអ៊ីតរបស់ហេស្បូឡាដែលគាំទ្ររបបក្រុងដាម៉ាសទេ។ ដោយហេតុតែមាននិកាយសាសនាខុសគ្នា គំនិតគាំទ្រប្រឆាំងគ្នា អំពើហិង្សាក៏កើតមានញឹកញាប់ ឯភេរវកម្មក៏ញយ។
កាលពីថ្ងៃពុធប្រមុខយោធាលីបង់ បានអះអាងថាកំពុងដឹកនាំធ្វើសង្គ្រាមប្រឆាំងនឹងភេរវនិយម - ដោយតាមបំបែកក្រុមភេរវជនត្រៀមធ្វើសកម្មភាពបំផ្ទុះរថយន្ត តាំងពីជាច្រើនខែមកហើយ។ ជាក់ស្តែងកាលពីថ្ងៃទី១៥សីហា ក្រុមនេះបានធ្វើភេរវកម្មបំផ្ទុះរថយន្តប្រឆាំងនឹងទីស្នាក់ការរបស់ក្រុមហេស្បូឡា នៅជាយរដ្ឋធានីបេរ៉ូត ដែលកាលណោះបានសម្លាប់មនុស្សអស់២៧នាក់ដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ