យ៉ាងហោច២២នាក់ស្លាប់ និងជាង៣០០នាក់របួស នៅលីបង់ ក្នុងភេរវកម្មបំផ្ទុះរថយន្ត
នៅប្រទេសលីបង់ ភេរវកម្មបំផ្ទុះរថយន្តមួយបានកើតឡើង នៅជាយក្រុងភាគខាងត្បូងប្រទេស កាលពីថ្ងៃព្រហស្បតិ៍ម្សិលមិញ សម្លាប់មនុស្សយ៉ាងហោច២២នាក់ និងធ្វើអោយរបួសជាង៣០០នាក់ទៀត ប្រទេស។ ក្រុមភេរវជនមួយឈ្មោះ ក្រុម Aïcha ដែលគេមិនធ្លាប់ស្គាល់ពីមុនមក បានប្រកាសថាខ្លួនជាអ្នកបង្កភេរវកម្មនេះ។ ប៉ុន្តែ រដ្ឋាភិបាលលីបង់បានចោទអ៊ីស្រាអែល ថានៅពីក្រោយខ្នងភេរវកម្ម ព្រោះថាភេរវកម្មនេះបានកើតឡើងនៅដែនដីក្រុមអេស្បូឡា ដែលជាអតីតសត្រូវរបស់អ៊ីស្រាអែល ក្នុងសង្គ្រាមរវាងប្រទេសលីបង់ និងអ៊ីស្រាអែល កាលពីឆ្នាំ២០០៦។ នៅថ្ងៃសុក្រនេះ នាយករដ្ឋមន្ត្រីអ៊ីស្រាអែល ស៊ីមន ពែររេស បានបដិសេធដាច់ខាតថា អ៊ីស្រាអែលមិនពាក់ព័ន្ធនឹងអំពើភេរវកម្មនៅលីបង់នោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៤
រដ្ឋាភិបាលលីបង់បានយកថ្ងៃសុក្រនេះ ជាថ្ងៃកាន់ទុក្ខដល់ជនរងគ្រោះក្នុងអំពើភេរវកម្មបំផ្ទុះរថយន្ត កាលពីថ្ងៃព្រហស្បតិ៍ម្សិលមិញ។ នៅព្រឹកថ្ងៃសុក្រនេះ អ្នកស៊ើបអង្កេតនៅបន្តការងារខ្លួន នៅកន្លែងកើតហេតុនៅឡើយ។ ទីភ្នាក់ងារព័ត៌មានជាតិ បានប្រាប់ថា បុរសម្នាក់ និងកុមារ៣នាក់ នៅបាត់ខ្លួននៅឡើយ។
ម្សិលមិញ ភេរវកម្មបំផ្ទុះរថយន្តសម្លាប់មនុស្សនេះ បានកើតឡើង នៅជាយក្រុងភាគខាងត្បូង លីបង់។ ទីនោះសំបូរដោយសកម្មជនក្រុមអេស្បូឡា កាន់សាសនាអ៊ីស្លាមនិកាយស៊ីអ៊ីតរស់នៅ។ ក្រុមអេស្បូឡានេះ គឺជាដៃគូសំខាន់របស់រដ្ឋាភិបាលប្រទេសស៊ីរី ក្នុងការកំចាត់ក្រុមឧទ្ទាម។ កាលពីសង្គ្រាមរវាងលីបង់ និងអ៊ីស្រាអែល ក្នុងឆ្នាំ២០០៦ ក្រុមអេស្បូឡាគឺជាទ័ពប្រយុទ្ធដ៏មោះមុតរបស់លីបង់ ហើយអ៊ីស្រាអែលបានចាញ់សង្គ្រាមឆ្នាំ២០០៦។
ដោយសារមូលហេតុនេះហើយ ទើបប្រធានាធិបតីលីបង់ លោក មីសេល ស្លីម៉ាន បានចោទថា អ៊ីស្រាអែលនៅពីក្រោយខ្នង អំពើភេរវកម្មនៅលីបង់ កាលពីថ្ងៃព្រហស្បតិ៍ ដើម្បីសងសឹកការចាញ់សង្គ្រាមឆ្នាំ២០០៦។ រដ្ឋាភិបាលលីបង់ហាក់មិនរវល់ដល់ក្រុមភេរវជន Aïcha ដែលបានប្រកាសថា ខ្លួនបានបង្កភេរវកម្មបំផ្ទុះរថយន្តនេះឡើយ។ ក្រុម Aïcha ជាក្រុមអ៊ីស្លាមនិកាយស៊ុននីត គេមិនធ្លាប់ស្គាល់ក្រុមនេះពីមុនមកនោះទេ។ ក្រុមអៃសា បានប្រកាសថា សកម្មជនខ្លួនសុទ្ធតែជាក្រុមឧទ្ទាមស៊ីរី។
គួររំលឹកថា លីបង់គឺជាប្រទេសជិតខាងរបស់ស៊ីរី។ ប្រទេសនេះបែងចែកចេញជាពីរបក្សពួក គឺមានក្រុមអេស្បូឡាកាន់សាសនាអ៊ីស្លាមនិកាយស៊ីអ៊ីត ជាអ្នកដឹកនាំបណ្តាជនគាំទ្រប្រធានាធិបតីស៊ីរី និងក្រុមម្ខាងទៀត ជាក្រុមបង្អាប់រដ្ឋាភិបាលស៊ីរី។ ការបែងចែកជាបក្សពួកនេះ បានបង្កអោយមានភាពតានតឹងរវាងបណ្តាអ្នកកាន់សាសនាអ៊ីស្លាមនិកាយស៊ីអ៊ីត និងនិកាយស៊ុននីត។
អង្គការសហប្រជាជាតិបានថ្កោលទោសអំពើភេរវកម្មនៅថ្ងៃព្រហស្បតិ៍ ហើយបានអំពាវនាវអោយប្រទេសលីបង់ចៀសវាងការលូកដៃចូលក្នុងវិបត្តិជម្លោះនៅស៊ីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ