សន្និសីទអន្តរជាតិនៅកង់គូនរកឃើញកិច្ចព្រមព្រៀងស្តីអំពីបញ្ហាអាកាសធាតុ
នៅទីបំផុត ជិត២០០ ប្រទេស ដែលបានចូលរួមក្នុងសន្និសីទអង្គការសហប្រជាជាតិ ស្តីពីអាកាសធាតុ នៅទីក្រុងកង់គូន ប្រទេសម៉ិចស៊ិក ទើបបានអនុម័ត លើកិច្ចព្រមព្រៀងមួយខ្សែ ដើម្បីប្រយុទ្ធប្រឆាំងនឹងការឡើងកម្តៅនៃភពផែនដី រួមទាំងការបង្កើតមូលនិធិសម្រាប់ជួយប្រទេសក្រីក្រផង។ កិច្ចព្រមព្រៀងនេះ ជាការផ្តល់សន្ទុះថ្មីមួយ សម្រាប់ការចរចាបន្តពីពិធីសារក្យូតូ ដែលត្រូវលើកទៅធ្វើនៅពេលក្រោយ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ អៀង សុខម៉ិញ
ប្រទេសចំនួនជិត២០០ បានអនុម័តទទួលយកកិច្ចព្រមព្រៀង ស្តីពីយន្តការមួយចំនួន រួមទាំងការបង្កើតឲ្យមានមូលនិធិបៃតង សម្រាប់ជួយប្រទេសក្រីក្រ ក្នុងការប្រយុទ្ធប្រឆាំងនឹងការឡើងកម្តៅនៃភពផែនដី។ លទ្ធផលជាវិជ្ជមាននៃសន្និសីទក្រុងកង់គូន ដែលគេពុំសូវរង់ចាំ ជាមុន និងដែលបានជួបភាពចម្រូងចម្រាសយ៉ាងខ្លាំង រហូតពន្យារមួយថ្ងៃបន្ថែមទៀតនេះ បាននិងកំពុងផ្តល់ក្តីសង្ឃឹមថ្មី និងសន្ទុះថ្មី ដល់ដំណើរការចរចាស្តីពីអាកាសធាតុ។ ព្រោះការខកចិត្តបានអង្រួនចិត្តពិភពលោកយ៉ាងខ្លាំង បន្ទាប់ពីសន្និសីទឆ្នាំមុន នៅក្រុងកូពេនហាក ប្រទេសដាណឺម៉ាក បិទបញ្ចប់ដោយគ្មានលទ្ធផលមក។
សម្រាប់លោកស្រីរដ្ឋមន្ត្រីក្រសួងការបរទេសម៉ិចស៊ិក ដែលជាប្រធានអង្គសន្និសីទលើកនេះ កិច្ចព្រមព្រៀងក្រុងកង់គូននេះ ជាការបើកសករាជថ្មីឲ្យអន្តរជាតិរួមគ្នាធ្វើសហប្រតិបត្តិការ ប្រឆាំងទប់ទល់នឹងការផ្លាស់ប្តូរអាកាសធាតុ។ ប៉ុន្តែកិច្ចព្រមព្រៀងនេះ បានធ្វើឡើងដោយគ្មាន បូលីវី។ ប្រទេសតែមួយគត់ដែលប្រឆាំងនៅក្នុងអង្គសន្និសីទ។ ជាការឆ្លើយតបនឹងបូលីវី លោកស្រីរដ្ឋមន្ត្រីការបរទេសម៉ិចស៊ិក បានបញ្ជាក់ថា ការយល់ព្រមច្រើនគ្នា (ច្បាប់Consensus) ដែលបូលីវីលើកយកមកសំអាង មិនមែនមានន័យថា “យល់ព្រមជាឯកច្ឆន្ទ” ហើយតំណាងប្រតិភូម្នាក់មិនអាចយកច្បាប់វេតូមកប្រើ ដើម្បីប្រឆាំងនឹងចេតនា និងការខិតខំប្រឹងប្រែង ដែលសម្រេចបានហើយនោះឡើយ។
កិច្ចព្រមព្រៀងកង់គូននេះ ក៏ជាការបើកចំហទុកប្រធានបទរសើបៗទាំងឡាយ ទាក់ទងនឹងការចរចាសំណុំរឿងបន្តពីពិធីសារក្រុងក្យូតូដែរ។ ពិធីសារក្យូតូ ដែលចម្រូងចម្រាសខ្លាំង និងដែលត្រូវបានអង្គសន្និសីទសម្រេចលើកយកទៅពិភាក្សា នៅពេលក្រោយទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ